Home / Author Archives: admin

Author Archives: admin

सिरियामा हवाई हमला, बालबाबालिकासहित ७७ को मृत्यु


८ फागुन, काठमाडौं । सिरियाको राजधानी दमास्कसनजिक सरकारी सेनाले गरेको हवाइ आक्रमणमा ७७ जनाको मृत्यु भएको छ । अरु ३ सय जना घाइते भएका छन् ।

सरकारी सेनाले विद्रोहीलाई मारेको दावी गरे पनि मृत्यु हुनेमा २० जना बालबालिका र धेरै सर्वसाधारण छन् ।

राजधानी दमासकस नजिक गुटा भन्ने स्थानमा हवाइ र रकेट आक्रमण गरिएको हो । सरकारी सेनाले विद्रोहीलाई लक्षित गरी आक्रमण गरेको दावी गरेको छ । तर मृत्यु हुनेमा धेरैजसो सर्वसाधारण रहेको सिरियन अब्जरभेटरी ह्युमन राइट्सले जनाएको छ ।

चार लाखभन्दा बढी व्यक्तिहरुको बसोबास रहेको गुटालाई सन् २०१३ देखि विद्रोहीहरुले नियन्त्रणमा लिएका छन् । यसलाई विद्रोहीबाट मुक्त पार्ने प्रयासमा सरकार लागेको छ । सोमबार हवाइ आक्रमण गरेको सिरियाली सेनाले स्थल आक्रमण पनि गर्ने तयारी गरेको छ ।

विप्लवको बन्दः काठमाडौंमा सामान्य प्रभाव, अरु जिल्लाको अवस्था के छ ?

८ फागुन, काठमाडौं । विप्लव नेतृत्वको नेकपाले आह्वान गरेको नेपाल बन्दको आंशिक प्रभाव परेको छ । काठमाडौं उपत्यकामा बिहानमा अरु दिनको तुलनामा कम गाडी चलेका छन् ।

विराटनगरबाट विप्लव नेतृत्वको नेकपाका नेताहरुलाई प्रहरीले पक्राउ गरेको विरोधमा सोमबार बन्द आह्वान गरिएको हो ।

 

काठमाडौं उपत्यका ट्राफिक प्रहरी महाशाखाले सामान्य रुपमा गाडी चलिरहेको जानकारी दिएको छ । ट्राफिक प्रहरी प्रवक्ता मुकुन्द मरासिनीले अनलाइनखबरसँग भने, ‘अहिलेसम्म अवस्था सामान्य छ । अप्रिय घटना केही भएको छैन । गाडीहरु पनि चलिरहेका छन् ।’

नेकपामा नेताहरु पक्राउ परेको जिल्ला मोरङमा बन्दको प्रभाव सामान्य छ । बजार, कलकारखाना, शैक्षिक संस्थाहरु बन्द छन् । तर, छोटो दुरीका सवारी साधनहरु भने चलिरहेका छन् ।

धनुषाको जनकपुरधाममा बन्दको प्रभाव परेको छैन । यातायातका साधन चलिरहेका छन् । निजी विद्यालयहरु बन्द भए पनि सरकारी विद्यालयहरु भने खुलेका छन् । पूर्वपश्चिम राजमार्गमा सवारी साधन चलिरहेका छन् । वीपी राजमार्गमा छोटो दुरीका सवारी साधन चले पनि बर्दिवासबाट काठमाडौंतर्फ आउने गाडी चलेका छैनन् ।

पोखरामा भने बन्दको प्रभाव छ । पृथ्वी राजमार्ग, भूपी शेरचन राजमार्ग र सिद्धार्थ राजमार्गमा जोडिएको पोखरामा कुनै पनि गाडी आउजाउ गरेका छैनन् । सधैं व्यस्त रहने पर्यटकीय नगरी पोखरा मंगलबार बिहानैदेखि सुनसान छ ।

रुपन्देहीमा पनि बिहान बन्दको प्रभाव देखिएको छ । बुटवलमा साना गाडीहरु चलिरहे पनि ठूला तथा लामो दुरीका सवारी साधनहरु चलेका छैनन् । बजार, पसल, स्कुल कजेलहरु सबै बन्द छन् ।

दाङमा बन्दको पूर्ण प्रभाव परेको छ । बजार, कलकारखाना, यातायात, शिक्षण संस्था सबै ठप्प छन् । तर अप्रिय घटना भने केही भएको छैन ।

सुर्खेतमा सवारी साधन फाट्टफुट्ट चले पनि मुख्य बजार र शिक्षण संस्था खुलेका छैनन् ।

भोजपुरमा विहानैदेखि बन्दको प्रभाव छ । हिले–भोजपुर सहायक राजमार्गमा यातायातका साधन चलेका छैनन् भने शैक्षिक संस्थाहरू पनि खुलेका छैनन् ।

गोर्खा सदरमुकाममा पनि यातायात र बजार बन्द छ ।

source : onlinekhabar

एकताको विषय नटुंगिई माओवादी सरकारमा नजाने, एमालेले गलाउन खोजेको आशंका

काठमाडौँ — एमालेसँग पार्टी एकताको विधि औपचारिक रूपमै टुंगो नलागेसम्म माओवादी केन्द्र केपी ओली नेतृत्वको सरकारमा सहभागी नहुने अडानमा देखिएको छ । बुधबार राति अबेरसम्म चलेको दुई दलबीचको छलफलमा सहमति जुट्न नसकेपछि केन्द्रले बिहीबार सरकारमा आफ्ना तर्फबाट मन्त्री पठाएन ।

 

प्रधानमन्त्री ओलीसहित एमालेका दुई मन्त्रीले मात्र शपथ लिए ।‘पार्टी एकता र सरकारसम्बन्धी दुई दलको छलफल नटुंगिएका कारण हामीले अहिले मन्त्री नपठाएका हौं,’ माओवादी प्रवक्ता पम्फा भुसालले कान्तिपुरसँग भनिन्, ‘केही राजनीतिक र वैचारिक विषय टुंग्याउन बाँकी छन् ।’
माओवादी केन्द्रका प्रमुख नेताहरू बिहीबार बिहान अध्यक्ष पुष्पकमल दाहालको निवास खुमलटारमा बैठक बसेका थिए । बैठकले प्रधानमन्त्रीमा ओलीलाई तत्काल समर्थनसहितको पत्र राष्ट्रपतिकामा पुर्‍याउने तर सरकारमा सामेल नहुने निष्कर्ष निकालेको थियो । खुमलटार बैठकपछि माओवादीको समर्थन रहेको भन्दै दाहालले लेखेको पत्रसहित नेता नारायणकाजी श्रेष्ठ मात्र एमाले नेताहरूसँगै राष्ट्रपति कार्यालय पुगेका थिए । त्यहाँ दाहालले राष्ट्रपतिलाई सम्बोधन गर्दै पठाएको आफ्ना ५३ जना सांसदको केपी ओलीलाई समर्थन रहेको बेहोराको पत्र श्रेष्ठले हस्तान्तरण गरेका थिए ।
बुधबारको वार्तामा दुई दलबीच बिहीबार वाम एकता संयोजन समितिको बैठक बसी बाँकी विषय टुंग्याउने सहमति थियो । तर, बिहीबार बिहानैदेखि प्रधानमन्त्री नियुक्तिसम्बन्धी काममा अल्झिएकाले दुई दलको बैठक हुन सकेन । शुक्रबार दुई दलबीच छलफल हुने माओवादी प्रवक्ता भुसालले जानकारी दिइन् । उक्त बैठक सहमतिमा पुगे माओवादीले ओली नेतृत्वको सरकारमा आफ्ना मन्त्रीहरू पठाउनेछ । नत्र बाहिरै बसेर समर्थन मात्र गर्नेछ ।
नेताहरूका अनुसार बुधबार झन्डै चार घण्टा चलेको बैठकमा प्रधानमन्त्री आलोपालो गर्ने र पार्टीको सैद्धान्तिक विषय के हुने भन्नेमा कुरा मिल्न सकेको थिएन । दुवै पार्टीका अध्यक्ष पार्टीको संयुक्त नेतृत्व गर्ने विषयमा सैद्धान्तिक रूपमा सहमत थिए । तर, सरकारको नेतृत्व पनि ओली र दाहालबीच आलोपालो हुनुपर्ने, समय पनि किटान गर्नुपर्ने माओवादीको अडान थियो ।
एमालेले अहिलेसम्म मान्दै आएको मार्गदर्शक सिद्धान्त ‘जनताको बहुदलीय जनवाद’ (जबज) लाई कतै न कतै उल्लेख गर्नुपर्ने धारणा राखेको थियो । स्रोतका अनुसार बुधबारको बैठकमा एमाले नेता माधवकुमार नेपालले जबजलाई एकीकृत पार्टीको मूल सैद्धान्तिक विषय बनाउनुपर्ने अडान राखेका थिए । महासचिव ईश्वर पोखरेललगायत नेता पनि जबजको दिशाबाटै अघि बढ्नुपर्नेमा जोड दिँदै आएका छन् । बैठकमा नेता नेपालले जबजको विषय उठाएपछि माओवादी नेताहरूले पनि माओवाद राख्नुपर्ने धारणा राखे । यही विषयमा दुई पक्षबीच लामो छलफल भए पनि सहमति जुट्न सकेन । अघिल्ला बैठकमा दुवैका मिलेका सैद्धान्तिक विषय लिपिबद्ध गर्ने र नमिलेकालाई महाधिवेशनमा लैजाने समझदारी थियो । बुधबारको छलफलबाट एमालेले आफूलाई गलाउने नीति लिन खोजेको हो कि भन्ने आशंका माओवादीमा पैदा भएपछि बिहीबारको मन्त्रिपरिषद् विस्तारमा आफ्ना तर्फबाट मन्त्री नै नपठाउने निष्कर्षमा पुगेको हो ।
छलफलमा दुई पार्टीका अध्यक्षको संयुक्त नेतृत्वको विषय टुंगिए पनि अन्य शीर्ष नेताका बारेमा के गर्ने भन्ने स्पष्ट धारणा बनिसकेको थिएन । दुवै दलका प्रमुख नेताले एकता प्रक्रियामा आफ्नो पनि स्थान सुरक्षित होस् भन्ने चाहेका छन् । उनीहरूको भूमिका अहिले नै के हुने भन्ने तय नहुँदा त्यसको प्रभाव बुधबारको वार्तामा पर्‍यो । अब शुक्रबार बिहानैदेखि बस्ने एकतासम्बन्धी बैठकले यो विषयसमेत निरूपण गर्नुपर्नेछ ।

जाँदाजाँदै देउवाले भने– ‘तीन तहको चुनाव गराउनु मेरो उपलब्धि’ दिगो शान्ति, सहमति र एकता कायम राख्दै राष्ट्रको सर्वोपरि हितमा काम गर्न नयाँ सरकारलाई देउवाको शुभकामना

काठमाडौँ — चौथोपटक प्रधानमन्त्रीका रूपमा ८ महिना १० दिन सरकारमा रहेका कांग्रेस सभापति शेरबहादुर देउवाले तीनै तहको निर्वाचन सम्पन्न गर्नेबाहेक मुलुकले सम्झनलायक कुनै काम गरेनन् । बरु, जनभावनाविपरीत विवादास्पद निर्णयका कारण पछिल्लो कार्यकालमा पनि विवादमुक्त रहन सकेनन् ।

 

अघिल्ला तीन कार्यकालको विवादास्पद बहिगर्मनबाट पाठ सिक्दै यसपटक तीनै तहका निर्वाचन गराउन सक्नु नै देउवाको महत्त्वपूर्ण उपलब्धि हो । एमाले अध्यक्ष केपी ओलीलाई बिहीबार सत्ता हस्तान्तरण गर्दैगर्दा देउवाले आफ्नो पछिल्लो कार्यकाललाई पूर्ण सफलताको श्रेणीमा चढाएका छन् ।
ओली प्रधानमन्त्रीमा नियुक्त हुनु एक घण्टाअघि आफ्नो राजीनामा सम्बोधनमा देउवाले निर्वाचन गराउने आफ्नो जिम्मेवारीलाई सफलतापूर्वक पूरा गरेकामा गर्व गरे । ‘नेपालको अत्यन्त विकट डडेल्धुरा जिल्लामा जन्मेको, ५० वर्षभन्दा लामो राजनीतिक यात्रामा करिब ९ वर्ष जेलजीवन बिताएको मजस्तो व्यक्तिका लागि यो कार्य सम्पन्न गर्न सक्नु सन्तोषको विषय भएको छ,’ उनले भने ।
संविधानका केही प्रावधानप्रति असहमति जनाउँदै आन्दोलनरत मधेसकेन्द्रित दललाई निर्वाचनसम्म ल्याउनु उनको ठूलो सफलता रह्यो । मधेसकेन्द्रित दललाई चुनावमा ल्याउन त्यतिबेला भइरहेको ढिलाइप्रति देउवामा ठूलै आशंका उब्जेको थियो । ‘मैले धैर्य नगरेको भए र संविधानप्रति असन्तुष्ट दललाई राजनीतिक मूल धारमा ल्याउने अनवरत प्रयत्न नगरेको भए संक्रमणकाल टुंगिने थिएन,’ सम्बोधनमा देउवाले भने, ‘बल प्रयोग गरेर निर्वाचन गरेको भए प्राविधिक रूपमा संक्रमण त सकिने थियो होला तर मुलुक फेरि हिंसा र अस्थिरताको दुश्चक्रमा फस्ने थियो ।’
‘नयाँ संघीय सरकार निर्माण गर्ने चरणमा हामी पुगेका छौं,’ देउवाले भने, ‘सरकारको नेतृत्वमा नरहे पनि जनताको सुखदु:खमा मेरो पार्टी र म सदासर्वदा क्रियाशील रहनेछौं । नेपाललाई समृद्ध मुलुक बनाउने अभियानमा हाम्रो निष्ठापूर्ण प्रतिबद्धता रहनेछ ।’ उनले तीन तहको निर्वाचनले मुलुकलाई समृद्धिको मार्गमा निर्णायक रूपमा अघि बढाउन बलियो आधारशिला निर्माण गरेको पनि उल्लेख गरे ।
कांग्रेस र माओवादीको सत्ता गठबन्धनबाट देउवा गत जेठ २३ मा प्रधानमन्त्री निर्वाचित भएका थिए । तत्कालीन केपी ओली नेतृत्वको सरकार ढालेर यी दुई दलले आलोपालो सरकारको नेतृत्व गरे । पहिलो चरणमा माओवादी केन्द्रका अध्यक्ष पुष्पकमल दाहाल र दोस्रो चरणमा देउवा प्रधानमन्त्री भए । तर, देउवाले राजीनामा दिँदै गर्दा माओवादी केन्द्रलाई धन्यवादसमेत दिन ‘कन्जुस्याइँ’ गरे । जबकि उनले सरकारमा सहभागी राप्रपा, राप्रपा (प्रजातान्त्रिक), संघीय समाजवादी फोरम र राष्ट्रिय जनता पार्टी (राजपा) लाई भने नामै लिएर धन्यवाद दिए । वाम गठबन्धनमा सामेल भएपछि देउवाले माओवादी केन्द्रका मन्त्रीहरूलाई बिनाविभागीय बनाए र केही समयअघि मात्रै उनीहरूले सरकार छाडेका थिए ।
सम्बोधनमा देउवाले राष्ट्रियताको विषयप्रति एमालेलाई तिखो प्रहार पनि गरे । ‘लोकतन्त्रलाई आस्था नभई साधनका रूपमा मात्र बुझ्ने, राष्ट्रिय एकताबारे संकुचित र हलुका टिप्पणी गर्ने, कुनै भेगका जनताले अधिकारको कुरा गर्दा तिनलाई राष्ट्रविरोधी देख्ने, समृद्धिको गहनतालाई अविश्वसनीय नारामा कैद गर्ने राजनीतिक अवसरवादको जमाना अब सकिनुपर्छ,’ देउवाले भनेका छन् ।
विविध जातजाति, भाषाभाषी, क्षेत्र, धर्म र समुदायबीचको सम्बन्धलाई एउटै मालामा गाँसेर राष्ट्रियतालाई थप मजबुत बनाउने आफ्नो पार्टीको चाहना रहेको उनको भनाइ छ । ‘मौलिक अधिकार, सामाजिक न्याय र आर्थिक प्रगति लोकतान्त्रिक व्यवस्थाभित्र नै सम्भव हुन्छ र अहिंसा लोकतान्त्रिक पद्धतिको अभिन्न अंग हो,’ तीन पृष्ठको लिखित भाषण पढदै देउवाले भने, ‘कांग्रेसले लिँदै आएको यही मान्यता विभिन्न वाद र पथ अँगाल्ने सबैका लागि स्वीकार्य बाटो बनेको छ ।’
अब बन्ने नयाँ सरकारलाई दिगो शान्ति, सहमति र एकता कायम राख्दै राष्ट्रको सर्वोपरि हितमा काम गर्न देउवाले शुभकामना दिएका छन् । देउवाले बालुवाटारबाटै देशवासीका नाममा सम्बोधन गरेका थिए । सम्बोधनपछि उनी सिधै राष्ट्रपति कार्यालय शीतलनिवास पुगेर राजीनामा बुझाएका थिए । देउवाको सम्बोधनअघि नै एमाले अध्यक्ष ओलीको प्रधानमन्त्री दाबी शीतलनिवास पुगिसकेको थियो । ‘ओलीलाई प्रधानमन्त्री नियुक्ति गर्ने विषयमा छलफल चलिरहेकै बेला प्रधानमन्त्रीबाट राजीनामा लिएर आउँदै छु भन्ने खबर आयो,’ राष्ट्रपतिका प्रेस सल्लाहकार माधव शर्माले कान्तिपुरसँग भने, ‘त्यसो भनेको केही मिनेटमै प्रधानमन्त्री शीतलनिवास आउनुभयो । प्रधानमन्त्रीको नियुक्ति हुनु केही समयअघि उहाँको राजीनामा स्वीकृत भएको हो ।’
‘मैले मुलुकको सर्वोच्च कार्यकारी पद सम्हाल्न आउँदा गरेका संविधान कार्यान्वयन गर्ने र शान्तिपूर्ण रूपमा आम सहभागितामा निर्वाचन गराउने प्रतिबद्धता पूरा गरेको छु,’ सम्बोधनमा देउवाले भने, ‘संघीयता कार्यान्वयनका लागि नयाँ ऐन, प्रशासनिक पुन:संरचनाअनुरूप जनशक्तिको व्यवस्था र अन्य प्राविधिक तयारीलाई तीव्रता दिएको छु ।’
उनले आफूले सम्झनलायक काम नगरेको घुमारो पाराले स्विकारेका छन । आफ्नो नेतृत्वमा सरकार निर्माण भएदेखि नै निर्वाचनका काममा व्यस्त हुनुपर्ने र आचारसंहिताले बाँधिनुपर्ने अवस्थाका कारण चाहेजतिको गतिमा विकासका काम अघि बढाउन नसकेको उनले बताए । तैपनि ठूला पूर्वाधार निर्माणमा सरकारले उल्लेख्य प्रगति गरेको उनको दाबी छ । ‘बुढीगण्डकी जलाशययुक्त जलविद्युत् आयोजना स्वदेशी लगानीमै बनाउने र काठमाडौं–तराई–मधेस द्रुतमार्गको निर्माण कार्य नेपाली सेनाले तदारुकतासाथ अघि बढाउँदै छ । काठमाडौं उपत्यकामा हिमालको पानी ल्याउने किशुनजी (कांग्रेस नेता कृष्णप्रसाद भट्टराई) को सपना मेलम्ची आयोजना अन्तिम चरणमा पुगेको छ,’ देउवाले भने, ‘सरकारले विशेष महत्त्वका साथ अनुगमन गरेको अरुण तेस्रो र माथिल्लो तामाकोसी जलविद्युत् आयोजना, भेरी बबई डाइभर्सन, हुलाकी सडक र पोखरा क्षेत्रीय विमानस्थललगायत राष्ट्रिय गौरवका आयोजनाका काममा म आएपछि ठूलो प्रगति भएको छ ।’
अमेरिकी सहयोगको मिलेनियम च्यालेन्ज आयोजनाअन्तर्गत इतिहासमै सबभन्दा ठूलो अनुदान सम्झौतामा आफ्नो सरकारले हस्ताक्षर गरेको उनले बताए । ‘तदनुरूप ५० अर्ब रुपैयाँ लागतमा ३ सय किलोमिटरजति उच्च भोल्टेजको प्रसारण लाइन बन्ने र सडक सुधार गर्ने कार्य हुनेछ,’ उनले भने, ‘गरिबी निवारणका लागि गरिबी निवारण कोषलाई प्रभावकारी बनाइएको छ । समृद्ध नेपालको हाम्रो यात्रामा यो महत्त्वपूर्ण आधार हुने विश्वास मैले लिएको छु ।’
राष्ट्रिय स्वार्थ र जनताको सर्वोत्तम हितलाई केन्द्रविन्दुमा राखेर परराष्ट्र नीति सञ्चालन भएको देउवाले बताए । ‘हाम्रा दुई विशाल छिमेकी भारत र चीनसँगको ऐतिहासिक र मैत्रीपूर्ण सम्बन्धलाई मेरो कार्यकालमा थप विश्वसनीय र सम्मानमा आधारित बनाइएको छ,’ उनले भने ।
उनले नेपालका ५० भन्दा बढी जिल्लामा औसत आयु ७० वर्षभन्दा कम रहेकाले वृद्धभत्ता पाउने उमेर पाँच वर्ष घटाइएको बताएका छन् । अनिवार्य स्वास्थ्य बिमा ऐन कार्यान्वयनसँगै क्यान्सर, मृगौला र स्पाइनल इन्जुरीलगायत जटिल प्रकृतिका दीर्घ रोगीलाई आजीवन मासिक ५ हजार जीवन निर्वाह भत्ता दिने निर्णयसमेत आफ्नो नेतृत्वको सरकारले गरेको उनले बताए ।

केपी ओली बने प्रधानमन्त्री

३ फागुन, काठमाडौं । नेकपा एमाले अध्यक्ष केपी शर्मा ओली प्रधानमन्त्री नियुक्त भएका छन् ।

 

राष्ट्रपति विद्यादेवी भण्डारीले संविधानको धारा ७६ को उपधारा २ बमोजिम ओलीलाई प्रधानमन्त्री नियुक्त गरेका हुन् । ओलीलाई प्रधानमन्त्री नियुक्त गर्न एमाले र माओवादी केन्द्रले बिहीबार नै राष्ट्रपति समक्ष समर्थनको पत्र बुझाएका थिए ।

वाम नेताहरु बालुवाटार पुग्दा प्रधानमन्त्री शेरबहादुर देेउवाले राजीनामा दिएकै थिएनन् । हतारहतार अन्तिम मन्त्रिपरिषद् बैठक राखेका देउवाले बालुवाटारबाटै देशवासीलाई सम्बोधन गर्दै राजीनामा दिए । लगतै बालुवाटार पुगेका उनले राजीनामा बुझाए ।
वाम नेताहरुलाई अर्को कोठामा राखेर राष्ट्रपतिले देउवको देउवाको राजीनामा बुझिन् ।

लगतै ओलीलाईर् प्रधानमन्त्री नियुक्त गरे । बहुमत दाबी गर्दै विहान ९ बजेतिरै शीतल निवास पुगेका वाम नेताहरु ओलीले नियुक्ति बुझेपछि मात्र मात्र बाहिरिएका थिए ।

शीतल निवासमा सपथ

नवनिर्वाचित प्रधानमन्त्री ओलीले बिहीबार पद तथा गोपनियताको सपथ लिए । शीतल निवासमा आयोजित समारोहमा ओलीले राष्ट्रपति भण्डारीसमक्ष सपथ लिएका हुन् ।

सपथ ग्रहण समारोहमै निर्वमान प्रधानमन्त्री शेरबहादुर देउवाले ओलीलाई सत्ता हस्तान्तरण गरे ।

सपथपछि लैनचौरस्थित सहिद स्मारकमा पुगेर माल्यापर्ण गरेका नवनिर्वाचित प्रधानमन्त्री ओलीले सिंहदरबार पुगेर पदभार सम्हाल्दैछन् ।

३० दिनभित्र विश्वासको मत दिनुपर्ने

संवैधानिक व्यवस्थाअनुसार प्रधानमन्त्री ओलीले अब ३० दिनभित्र प्रतिनिधिसभाबाट विश्वासको मत प्राप्त पर्छ । २७५ सदस्यीय प्रतिनिधिसभामा एमालेका १२१ र माओवादीका ५३ गरी १६४ सासद छन्, जबकी बहुमतका लागि १३८ सांसद भए पुग्छ ।

८ रनले चुक्यो नेपाल, डिभिजन टूको उपविजेतामा सिमित

३ फागुन, काठमाडौं । पारस खड्काको शतकका बाबजुद नेपालले यूएईसँग ७ रनले पराजित भएको छ र विश्व क्रिकेट लिग डिभिजन टूको उपविजेता बनेको छ ।

 

यूएईले भने उपाधिसँगै समूह चरणमा व्यहोरको हारको बदला पनि दिएको छ ।

२७८ रनको लक्ष्य पछ्याएको नेपालका कप्तान पारस खड्काले उत्कृष्ट पारी गर्दै शतक पुरा गरेपनि पर्याप्त भएन । नेपालले ५० ओभरमा ८ विकेट गुमाएर २७० रन मात्र बनाउन सक्यो ।

अन्तिम ओभरमा पारसले तीन छक्का हानेका थिए । तर, जितका लागि नेपाललाई मात्र ८ रन पुगेन । १०३ बलको सामना गरेका पारसले ३ चौका र ८ छक्काको मदतमा अविजित ११२ रन बनाए ।

नेपालको सुरुवात मध्यम रहृयो । पहिलो विकेटका लागि ज्ञानेन्द्र मल्ल र दिलिप नाथले ३८ रनको साझेदारी गरे । नाथ १३ रनमा आउट भए । दुई बलपछि नै ज्ञानेन्द्र पनि व्यक्तिगत २४ रनमा पभेलियन फर्किए ।

पारसले दिपेन्द्र सिंह ऐरीसँग मिलेर पारी सम्हाले । दुबैले तेस्रो विकेटका लागि ७३ रनको साझेदारी गरे । दिपेन्द्र ३५ रनमा आउट भए ।

शरद भेषावकरले ६३ रनको साझेदारी गरे । शरद ३० रनमा पभेलियन फर्किए । आरिफ शेख ७ रनमा आउट भए,जतिबेला टिमको स्कोर १८६ रन थियो ।

रोहितकुमार पौडेलले छैटौं विकेटका लागि पारससँग ४२ रनको साझेदारी गरे । उनी २३ रनमा आउट भए । त्यसपछि भने ठूलो साझेदारी हुन सकेन ।

पारसले एउटा एण्डमा बसेर आक्रामक पारी खेलेपनि अरु ब्याट्सम्यान टिक्न सकेनन् । बुधबार नायकी प्रदर्शन गरेका करण केसी मात्र ३ रनमा आउट भए सोमपाल कामीले ६ रन मात्र बनाउन सके ।

बसन्त रेग्मी ५ रनमा अविजित रहे ।

यसअघि  टस जितेर पहिले ब्याटिङ गरेको युएईले निर्धारित ५० ओभरमा ४ विकेट गुमाएर २७७ रन बनाएको थियो ।

युएईका लागि अस्फाक अहमदले ११४ रन जोडे । त्यस्तै रोहन मुस्ताफाले ५१, रामिज शाहाजादले नटआउट ४१, साइमान अनवरले ४० र गुलाम साबेरले १८ रन जोडे ।

बलिङतर्फ नेपालका बसन्त रेग्मी, सोमपाल कामी र सन्दिप लामिछानेले १/१ विकेट लिए ।

source: onlinekhabar

केपी ओली र प्रचण्डबीच वार्ता, सहअध्यक्षमा ‘सहमति नजिक’

९ माघ, काठमाडौं । एमाले र माओवादी केन्द्रको पार्टी एकतालाई लिएर आशंका व्यक्त भइरहेका बेला प्रमुख दुई नेता केपी शर्मा ओली र प्रचण्डबीच ‘वान टु वान’ वार्ता भएको छ ।

नेताहरुका अनुसार केही दिनमै ‘छिट्टै पार्टी एकता’ हुने सन्देश दिने प्रयास भइरहेको छ ।

 

एमाले अध्यक्ष ओली र माओवादी अध्यक्ष प्रचण्ड ललितपुरको मानभवनस्थित शारदाप्रसाद अधिकारीको निवासमा भेटेका हुन् । अधिकारी प्रचण्ड निकट निर्माण व्यवसायी मानिन्छन् ।

वार्तामा के भयो भन्ने दुवै पक्षले खुलाएका छैनन् ।

तर, दुवै दलका नेताहरुले शीर्ष दुई नेताबीच भएको संवाद सकारात्मक रहेको बताएका छन् । एमाले सचिव प्रदीप ज्ञवालीले भने, ‘टुंगिने चरणमा छ भन्ने संकेत पाएको छु ।’

स्रोतका अनुसार दुई नेताबीच नेतृत्वको मोडालिटीबारे छलफल भइरहेको छ तर, टुंगिएको छैन ।

भोलि पनि ओली र प्रचण्डबीच भेटवार्ता हुनेछ । दुई नेताबीच सहमति भए पर्सी पार्टी एकता संयोजन समितिको बैठक बसेर छिट्टै पार्टी एकता हुने सन्देश दिने तयारी छ ।

भोलि पनि ओली र प्रचण्डबीच भेटवार्ता हुनेछ । दुई नेताबीच सहमति भए पर्सी पार्टी एकता संयोजन समितिको बैठक बसेर छिट्टै पार्टी एकता हुने सन्देश दिने तयारी छ ।

माओवादीले ओली प्रधानमन्त्री र प्रचण्ड एकीकृत पार्टीको अध्यक्ष हुने सहमति भएको दाबी गर्दै आएको छ । तर, ओली तत्काल अध्यक्ष पद हस्तान्तरण गर्ने पक्षमा देखिएका छैनन् ।

पछिल्लो पटक एमाले उपाध्यक्ष वामदेव गौतमले माओवादीलाई अध्यक्ष दिने र महासचिव एमालेले राख्ने प्रस्ताव अघि सारेका छन् । ०४७ मा माले र मार्क्सवादी एकीकरण गर्दा जस्तो सेरेमोनियल अध्यक्ष र शक्तिशाली महासचिव बनाउने उनको प्रस्ताव छ ।

ओली र प्रचण्ड दुई सहअध्यक्ष बन्ने प्रस्ताव  (संक्रमणकालका लागि संयुक्त नेतृत्वको व्यवस्था) पनि छलफलमा छ । एकीकृत पार्टीमा तत्काल प्रचण्ड वा ओलीको एकल नेतृत्व सम्भव नभएको भन्दै स्रोतले भन्यो, यसकै छेउछाउ त्यतातिर पो जानुपर्छ कि भन्ने छ ।’

माओवादी नेता नारायणकाजी श्रेष्ठ प्रकाशले एकताबारे सकारात्मक छलफल भइरहेको अनलाइनखबरलाई बताए । उनले भने, ‘सरकार गठन अगाडि पार्टी एकताको प्रारुप तयार हुन्छ । सरकार गठन भएपछि केही समयमा नै पार्टी एकता घोषणा हुन्छ ।’

source : onlinekhabar.com

केन्यामाथि नेपालको रोमाञ्चक जित, रोहित र आरिफको निर्णायक साझेदारी

२९ माघ, काठमाडौं । रोहितकुमार पौडेल र आरिफ शेखको उत्कृष्ट साझेदारीसँगै नेपाले डिभिजन टूमा केन्यामाथि ३ विकेटको महत्वपूर्ण जित हात पारेको छ । यो जितसँगै नेपालले विश्वकप छनोट खेल्ने सम्भावना जिवितै राखेको छ ।

चीनद्वारा अमेरिकालाई चेतावनी–युद्धको मानसिकता त्याग

बेइजिङ — चीनले अमेरिकालाई ‘शीतयुद्धकालीन मानसिकता’ त्याग्न चेतावनी दिएको छ । अमेरिकाले आफ्नो परमाणु हतियार कार्यक्रम ‘साना बम’ मार्फत विकसित गर्ने जनाएपछि आइतबार चीनले चेतावनी दिएको हो । चिनियाँ रक्षा मन्त्रालयले ‘विश्वकै ठूलो परमाणु हतियार सम्पन्न मुलुकले’ युद्धको मानसिकता छाड्ने पहल गर्नुको साटो विरुद्धमा लागेको भन्दै आलोचना गरेको छ ।

 

अमेरिकाले आफूसँग भएका हतियारहरू प्रयोग गर्न निकै ठूला भएको भन्दै नयाँ स–साना परमाणु हतियार विकास गर्ने योजना सार्वजनिक गरेको हो । रूसले भने अमेरिकी योजनाको यसअघि नै विरोध गरिसकेको छ ।
अमेरिकाले चीन, रूस, उत्तर कोरिया र इरान आफ्नो सुरक्षा खतराका रूपमा रहेको औंल्याउँदै साना हतियारको आवश्यकता भएको जनाउँदै आएको छ । चीनले आइतबार अमेरिकी योजनाको दृढतापूर्वक विरोध जनाएको हो । चिनियाँ रक्षा मन्त्रालयले आफ्नो रक्षात्मक नीतिको वासिङ्टनले फाइदा उठाएको जनाएको छ । मन्त्रालयद्वारा जारी विज्ञप्तिमा उल्लेख छ, ‘हामीलाई आशा छ अमेरिकाले आफ्नो शीतयुद्धकालीन मानसिकता त्याग्नेछ र निशस्त्रीकरण प्रतिको आफ्नो उत्तरदायित्व महसुस गर्नेछ ।’ चीनले यसअघि पनिपटकपटक अमेरिकाको रक्षा रणनीतिको विरोधका लागि ‘शीतयुद्ध’ को सन्दर्भ उल्लेख गर्ने गर्छ ।
अमेरिकी रक्षा मन्त्रालय पेन्टागनले शुक्रबार सार्वजनिक गरेको योजनामा जमिन, पन्डुब्बी तथा विमानबाट प्रहार गर्न सकिने ब्यालेस्टिक क्षेप्यास्त्रको आधुनिकीकरणमा जोड दिइएको छ । उक्त योजना पूर्व अमेरिकी राष्ट्रपति बाराक ओबामाको कार्यकालमा सुरु गरिएको थियो । यसअघि रूसी विदेश मन्त्रलायले अमेरिकी योजनाप्रति ‘पूर्णरूपमा निराश’ भएको बताएको थियो । विदेशमन्त्री सर्गेइ ल्याभ्रोभले राष्ट्रको सुरक्षाका लागि ‘आवश्यक उपायहरू अवलम्बन’ गर्ने बताएका थिए ।

निर्माण सामग्रीमा मनपरी मूल्यः सिमेन्टको मूल्य घट्यो, स्टिलमा घटाउन आलटाल सरकारी उद्योगले नै जबरजस्ती गरेको छ : आपूर्ति विभाग

काठमाडौँ — कारबाहीमा पर्ने डरले सिमेन्ट उद्योगले थोरै मूल्य घटाए पनि स्टिल उद्योगीहरूले आलटाल गर्दै आएका छन् । विभिन्न बहानामा व्यवसायीहरूले अस्वाभाविक रूपमा मूल्य बढाएको फेला परेपछि आपूर्ति व्यवस्थापन तथा उपभोक्ता हित संरक्षण विभागले तत्काल मूल्य घटाउन निर्देशन दिएको थियो ।

 

उद्योगीहरूले पनि मूल्य घटाउने प्रतिबद्धता जनाएका थिए । प्रतिबद्धताअनुसार सिमेन्ट उद्योगले थोरै मूल्य घटाए पनि स्टिल उद्योगहरूले घटाएका छैनन् ।
विभागका अनुसन्धान अधिकृत रमेशकाजी श्रेष्ठका अनुसार जगदम्बा स्टिलले प्रतिकिलो ५० पैसा घटाए पनि अन्य स्टिल उद्योगले घटाएका छैनन् । ‘बयानका लागि आए पनि मूल्य घटाएका छैनन्,’ उनले भने । विभागका अनुसार अनुगमनको क्रममा स्टिल व्यवसायीले प्रतिकिलो १० रुपैयाँसम्म मूल्य बढाएको पाइएको थियो । मूल्य घटाउन अटेरी गरेपछि मूल्य बढ्नु र मूल्य नघटाउनुको कारणसहित स्पटीकरण दिन पत्रचार गर्ने निर्णय विभागले गरेको छ ।
‘मूल्य वृद्धिका कारण, कच्चा पदार्थ र डन्डीमा कति प्रतिशत वृद्धि भएको हो । बढेको प्रमाणसहित विभागमा पेस गर्न पत्र तयार गरेका छौं,’ उनले भने, ‘मंगलबार सबै स्टिल उद्योगीलाई पत्राचार गर्छौं ।’ विभागका अनुसार सिमेन्टमा भने अधिकांश व्यवसायीले मूल्य घटाएका छन् । चौतर्फी विरोध र सरकारले अनुगमन तीव्र बनाएपछि व्यवसायीले मूल्य घटाउन थालेका हुन् । उत्पादन लागत, क्लिंकर आयातमा समस्यालगायतको बहानामा व्यवसायीले १५ दिनमै ५ पटक मूल्य बढाएका थिए । एक महिनाको अवधिमा ५ देखि १८ प्रतिशतसम्म मूल्य बढाएको विभागले तयार पारेको प्रतिवेदनमा उल्लेख छ । प्रतिबोरा १ सय २० रुपैयाँसम्म बढाएको विभागको रेकर्डमा छ । तर, उद्योगीले १० देखि ५० रुपैयाँसम्म मात्रै घटाएका छन् ।
विभागका अनुसार सरकारी स्वामित्वमा सञ्चालित हेटौंडा सिमेन्टले प्रतिबोरा १ सय ३ रुपैयाँ बढाएको छ । प्रतिवेदनअनुसार ७ सय ९५ रुपैयाँ पर्ने हेटौंडा सिमेन्ट हाल ८ सय ९८ रुपैयाँ पर्छ । तर, हेटौंडा सिमेन्टले मूल्य घटाएको छैन । मूल्य घटाउन आलटाल गरेपछि हटौंडा सिमेन्टलाई पनि पत्रचार गरेको थियो । तर, विभागको निर्देशनको अटेरी गर्दै आएको महानिर्देशक दाहालले बताए । हेटौंडाले अटेरी गरेपछि मूल्य बढाउनुपर्ने स्पष्ट कारणको जवाफ दिन उद्योग मन्त्रालयमा पत्रचार गरेको जनाएको छ । ‘सरकारी सिमेन्टबाटै जबर्जस्ती भयो । बयानमा आएको छैन,’ दाहालले भने, ‘मूल्य बढाउनुपर्ने कारणसहित उद्योग मन्त्रालयमा पनि पत्र पठाएका छौं ।’
सबैभन्दा बढी बृज सिमेन्टले इन्डस्ट्रिजले घटाएको छ । बृजले ओपीसी, पीएससी र पीपीसीमा प्रतिबोरा ५० रुपैयाँ घटाएको छ । ९ सय रुपैयाँ बिक्री गर्दै आएको ओपीसी ८ सय ५० रुपैयाँ निर्धारण गरेको छ । ७ सय ९० मा बिक्री गर्दै आएको पीपीसी ७ सय ४० रुपैयाँ र ७ सय ८० मा बिक्री गरेको पीएससी ७ सय ३० रुपैयाँ निर्धारण गरेको पत्र विभागमा पेस गरेको छ । अर्घाखाँची सिमेन्टले ४५ रुपैयाँ घटाएको छ । उसले प्रतिबोरा ८ सय ९५ रुपैयाँबाट ८ सय ५० निर्धारण गरेको जनाएको छ ।
भूगर्भ सिमेन्टले ओपीसी र पीपीसी सिमेन्टमा ३० रुपैयाँ घटाएको छ । ८ सय ५० रुपैयाँ पर्ने ओपीसीको मूल्य ८ सय २० र ७ सय ५० पर्ने पीपीसीको मूल्य ७ सय २० निर्धारण गरेको छ । अम्बे सिमेन्ट उद्योगले प्रतिबोरा २० रुपैयाँ घटाएको छ । अम्बेले प्रतिबोरा ७ सय ६० रुपैयाँ पर्ने सिमेन्ट घटाएर ७ सय ४० रुपैयाँ निर्धारण गरेको छ । नारायणी सिमेन्टले प्रतिबोरा १० रुपैयाँ घटाएको छ । नारायणीले ८ स्य ९० रुपैयाँबाट घटाएर ८ सय ८० रुपैयाँ निर्धारण गरेको पत्र विभागमा पेस गरेको छ । विभागका महानिर्देशक कुमार दाहालले मूल्य घटाउनु सकारात्मक भएको बताए । ‘प्रतिबोरा १० देखि ५० रुपैयाँसम्म घटाउनु भनेको सकारात्मक कुरा हो,’ उनले भने ।
विभागका अनुसार शिवम् सिमेन्टले प्रतिबोरा २२ रुपैयाँ ६० पैसा घटाएको छ । ९ सय १० रुपैयाँ पर्ने सिमेन्टको मूल्य घटाएर ८ सय ८७ रुपैयाँ ४० पैसा निर्धारण गरेको जनाएको छ । सर्वोत्तम सिमेन्टले पीपीसी र ओपीसीको १० रुपैयाँ घटाएको छ । प्रतिबोरा ८ सय ४५ रुपैयाँ पर्ने ओपीसीको मूल्य ८ सय ३५ रुपैयाँ तोकेको छ । पीपीसी सिमेन्टको मूल्य ७ सय ४५ रुपैयाँबाट घटाएर ७ सय ३५ तोकेको जनाएको छ । निर्माण सिमेन्टले प्रतिबोरा १५ रुपैयाँ घटाएको विभागले जनाएको छ । निर्माणले ७ सय २० रुपैयाँ पर्ने पीपीसी सिमेन्ट घटाएर ७ सय ५ रुपैयाँ निर्धारण गरेको छ ।
दोभानले पनि ओपीसीमा मूल्य घटाएको छ । उसले ८ सय ४० रुपैयाँबाट ८ सय २० रुपैयाँ निर्धारण गरेको विभागमा पत्र पठाएको छ । शुभश्री जगदम्बा सिमेन्ट मिल्सले पनि पीएससी सिमेन्टमा २० रुपैयाँ घटाएको छ । उसले ७ सय ८० रुपैयाँबाट ७ सय ६० रुपैयाँ निर्धारण गरेको विभागले जनाएको छ । ओपीसीमा ९ सयबाट ८ सय ८० रुपैयाँ पुर्‍याएको छ ।
यस्तै मारुती सिमेन्टले पनि २० रुपैयाँ घटाएको छ । मारुतीले ८ सय ७५ रुपैयाँबाट ८ सय ५५ रुपैयाँ निर्धारण गरेको छ । अग्नि सिमेन्टले १० रुपैयाँ घटाएको जनाएको छ । अग्निले ८ सय ४० रुपैयाँबाट ८ सय ३० रुपैयाँ तोकेको छ । घोराही सिमेन्टले ओपीसी र पिपीसीमा १० रुपैयाँ घटाएको छ । घोराहीले ८ सय ५ पर्ने ओपीसी सिमेन्ट घटाएर ७ सय ९५, ७ सय ५ पर्ने पीपीसी सिमेन्टको मूल्य घटाएर ६ सय ९५ निर्धारण गरेको विभागले जनाएको छ ।
source: ekantipur