Home / Author Archives: admin

Author Archives: admin

राज्यले नचिनेको ज्युँदा शहीद, जो ११ वर्षदेखि अचेत छन्

११ वैशाख, काठमाडौं । जनआन्दोलनका घाइते मुकेश कायस्थकी आमा मिरा छोरो उठेर ‘गुड मर्निङ मामु’ भन्ने आसमा हरेक बिहान एकतमासले हेर्छिन् । उनले मुकेशलाई यसरी हेर्न थालेको ११ वर्ष बितिसक्यो ।

मुकेशजस्ता दुई दर्जन युवायुवतीले देशमा लोकतान्त्रिक गणतन्त्र स्थापनाका लागि ज्यान दिए । केही अशक्त बने, कोही जीवन–मरणसँग संघर्ष गर्दागर्दै धर्तीबाट अस्ताए । कोही जीवन–मरणकै संघर्षमा छन् ।

 

बनेपा नगरपालिका–१६ का मुकेश जीवन–मरणसँग जुधिरहेका होनाहार पात्र हुन जनआन्दोलन–२ का । मुकेशका घरमा उनका बाबुआमा छन् तर उनीहरुसँग खुसी छैन । एकोहोरो हेरेर बस्ने छोरालाई आफूले पनि एकोहोरो हेरेर बस्नुबाहेक परिवारसँग विकल्प छैन ।

मुकेशको पीडा गणतन्त्रपछिको कुनै पनि सरकारले बुझेन । जति उनको उनको परिवारले खेपिरहेको छ । प्रधानमन्त्री, मन्त्रीहरु झन्डा फहराउँदै उनको घरमा अर्धचेत अवस्थामा ओछ्याउनमा सुतिरहने मुकेशलाई पटकपटक भेट्न आए, आश्वासन दिए । तर, आश्वासन कसैले पूरा गरेनन् । आजको राजधानी दैनिकमा खबर छ ।

झिंगा आतंकविरुद्ध आन्दोलन ! आउनै छाडे पाहुना, विस्थापित हुँदै गाउँले !

housefly

११ वैशाख, काठमाडौं ।   गाउँभरि भनभनी झिँडा भन्किइरहेका हुन्छन् । खानेकुरादेखि लिएर सबै थोकमा झिँगाको गोलो हुन्छ । खाना बनाएर खान सक्ने अवस्था छैन । खाना बनाए पनि झुलभित्र बसेर खानुपर्ने बाध्यता छ ।

मोरङको सोराभाग ९ पुग्ने जो कोही पनि अचम्ममा पर्ने गरेका छन् । झिँगाकै कारण गाउँमा पाहुना पनि आउन छाडेका छन् । कोही पाहुना आए पनि खाना नखाइ फर्कन्छन् ।

 

एक वर्षदेखिको झिँगा आतंकबाट कारण स्थानीय आजित भएका छन् । उनीहरुले यसको विरुद्ध आन्दोलनसमेत गरेका छन् ।

सोराभाग ९ बेतौनास्थित विराट पोल्ट्री फर्मको दुर्गन्धका कारण गाउँमा झिँगा आतंक फैलिएको हो ।

फर्मले दुर्गन्ध र झिँगा नियन्त्रणमा चासो नदिँदा स्थानीय बासिन्दा विस्थापित हुनुपर्ने अवस्था आएको विराट पोल्टी फर्म वातावरण प्रदूषण तथा झिँगा उन्मूलन संघर्ष समितिका सचिव इन्दिरा उप्रेतीले बताइन् । आजको अन्नपूर्ण पोस्ट दैनिकमा खबर छ ।

प्रचण्डलाई भेटेपछि ओलीले भने- माकुराको जालमा झिँगामात्रै पर्छ ! ‘चुनावको एकसाता पहिले बजेट ल्याउन पाइँदैन’

१० बैशाख, काठमाडौं । नेकपा एमालेका अध्यक्ष केपी शर्मा ओलीले आफूहरु माकुराको जालोमा नपर्ने बताएका छन् । उनले संविधान संशोधनको प्रस्तावको कागज हेरेपछि एमालेले प्रतिक्रिया दिने बताएका छन् ।

 

प्रधानमन्त्री प्रचण्डसँग आइतबार आफ्नै निवासमा कुराकानी गरिसकेपछि ओलीले मिडियालाई प्रतिक्रिया दिँदै चुनावको एकसाता पहिले बजेट ल्याउन नपाइने बताए । उनले एमाले हीन ग्रन्थीले नचल्ने बताए ।

ओलीको भनाइ जस्ताको त्यस्तै-

प्रधानमन्त्रीजी जानकारी गराउन आउनुभएको रहेछ । उहाँहरुले गरेको सहमतिको हामीसँग परामर्श भएको छैन । हामी हेर्छौं, अध्ययन गर्छौं । समर्थन गर्न लायक कतै भेटियो भने समर्थन गर्छौं । विरोध गर्न लायक, प्रक्रियामा जान दिन मिल्नेसम्म देखियो भने त्यसमा जान दिन्छा्रैं ।

देशलाई गम्भीररुपमा अहितै गर्न खोजिएको र संविधान कार्यान्ँवयन गर्नुपर्ने ठाउँमा संविधानै भाँचकुच गर्न खोजिएको पाइयो भने त्यसमा हामीले रोकावट गर्नुपर्ने हुन्छ । मौखिकरुपमा सुनेर के गर्ने, हेरौं कागजपत्र ।

कस्तो संशोधन गर्ने ? जे ल्याए पनि समर्थन गर्छौं भनेको थियो र कहिल्यै ? होइन । वहाँहरुले अघिल्लो संविधान संशोधनको प्रस्ताव गलत, अनुपयुक्त ल्याउनुभएको थियो । हामीले धेरै समय भन्यौं । अलि समय जिद्दी गर्नु भो । पछि गलतै रहेछ, यो हामी फिर्ता लिन्छौं भन्नुभो । फिर्ता लिएर राम्रै गर्नुभो । अब अहिले कस्तो ल्याएको छ, हेर्नुपर्छ ।

त्यो हेर्नुपर्छ । स्थानीय तहको कहाँ बढाउने भनेको छ, किन बढाउने ? कसले माग गर्‍यो, कसले जिद्दी गर्‍यो ।

हामी चुनावको पक्षमा छौं । तर, जेठ १५ गते बजेट जारी हुन्छ, अनि हप्ता १५ दिनपछि चुनाव गर्ने । त्यो वीचमा चाहिँ चुनाव प्रचारका लागि बजेटमा थुप्रै कुराहरु राख्ने प्रचारका कुरा, अनि त्यही कुरा लिएर चुनावमा जाने जस्ता कुराहरु चाहिँ स्वीकार्य हुँदैनन् ।

हीन ग्रन्थीबाट एमाले चल्दैन । कमजोर मनोग्रन्थीबाट चल्दैन । यासे भन्लान् कि, उसो भन्लान् कि ? हामी देशको हितका निम्ति, देशको हितको पक्षमा दृढताका साथ उभिन्छौं । एमाले त्यस्तो अप्ठ्यारोमा पर्‍यो भन्ने… हुन्छ नि यसो जालसाजी दुईटा कुरा, त्यस्ता कुराहरुको धरापमा एमाले पर्दैन । माकुराको जालोमा झिँगामात्रै पर्छ ।

तर, एउटा के भने हामी सशंकित छौं । किन सशंकित छौं भने उहाँहरुले हामीसँग विषयमा दफावार किन छलफल गर्न आँट गर्नुभएन ?

मधेसी मोर्चाका शीर्ष दुई नेताले भने-पत्रकारले आतंक मच्चाए, संशोधन नभई चुनावमा जान्नौं

१० बैशाख, बिराटनगर । मधेसी मोर्चाका शीर्ष दुई नेताले संविधान संशोधन नभए आफूहरु चुनावमा सहभागी नहुने बताएका छन् ।

मधेसी मोर्चासँग भएको सहमति अनुसार सरकारले संविधान संशोधन विधेयक परिमार्जन गरेको छ भने स्थानीय तहको निर्वाचन दुई चरणमा गर्ने निर्णय गरेको छ ।

 

तर, मोर्चाका नेताहरुले धम्की दिन छाडेका छैनन् । आइतबार बिराटनगरमा आयोजित विरोधसभामा राष्ट्रिय जनता पार्टीका अध्यक्ष महन्थ ठाकुर र संघीय समाजवादी फोरमका अध्यक्ष उपेन्द्र यादवले संविधान संशोधन नभई चुनावमा नजाने बताए ।

संघीय समाजवादी फोरम अध्यक्ष यादवले भने, ‘संविधान संशोधन नहुन्जेलसम्म चुनाव यो मुलुकमा हुँदैन र चुनावमा हामी सहभागी हुँदैनौं ।’ मधेसी मोर्चाका अन्य दलप्रति संकेत गर्दै उनले ‘अलिअलि लोभिपापी कोही-कोही होलान्’ उनीहरु मात्र चुनावमा जाने बताए ।

मधेसी मोर्चामा आवद्ध राष्ट्रिय जनता पार्टीका अध्यक्ष ठाकुरले आफूहरुलाई अलग-थलग गर्न प्रयास भएको भन्दै भने, ‘संविधान संशोधन विना कुनै चुनाव हुँदैन ।’

सरकारसँग सहमति नभएको दाबी

साथै उनले आफूहरुको माग सम्बोधन नभएसम्म सरकारको सबै आदेशको अवज्ञा गर्ने चेतावनी दिए ।

दुबै नेताले सरकार र मधेसी मोर्चाबीच सहमति भएको भन्दै पत्रकारले भ्रम फैलाएको आरोप लगाए । ‘पत्रकार मित्रहरुले आतंक मच्चाएका छन्, मोर्चा गठबन्धनसँग सहमति भयो, अब चुनावमा जान्छ भनेर’ संघीय गठबन्धन र संघीय समाजवादी फोरम अध्यक्ष यादवले भने, ‘हामीले कुनै सम्झौता गरेका छैनौं । जुन प्रचार भएको छ, त्यो गलत हो ।’

उनले अघि भने, ‘साँचो के हो भने हिजो वार्तामा हाम्रा साथीहरु प्रधानमन्त्रीलाई संविधान संशोधन गर्नुस् र हाम्रा मुद्दाहरु सम्बोधन गर्नुस् भनेर सुझाव दिएका थिए ।’

सभामा राजपा अध्यक्ष ठाकुरले पनि सहमति भयो भन्दै ढोल बजाइएको भन्दै भने, ‘जुन सहमति भएको छ, त्यसलाई लागू गर्नुस् । त्यसपछि मात्र नयाँ सहमति हुन्छ ।’

संघीय प्रहरी ऐनको मस्यौदा तयारः केन्द्रमा आइजिपी, प्रदेशमा एआइजी

nepal-police (1)

१० वैशाख, काठमाडौं । प्रहरीलाई संघीय प्रणालीमा रूपान्तरणका लागि गृह मन्त्रालयले संघीय प्रहरी ऐनको मस्यौदा तयार पारेको छ । मस्यौदामा संघीय प्रहरी (केन्द्रीय प्रहरी) को प्रमुखमा प्रहरी महानिरीक्षक (आइजिपी) र प्रदेश प्रहरीको प्रमुखमा अतिरिक्त प्रहरी महानिरीक्षक (एआइजी) राख्ने प्रस्ताव गरिएको नयाँ पत्रिकाले लेखेको छ ।

गृह मन्त्रालयको एक समितिले शुक्रबार मस्यौदा टुंगो लगाएको हो । आइतबार गृहसचिवलाई ऐनको मस्यौदा बुझाउने तयारी छ । गृहकी सहसचिव निर्मला अधिकारी भट्टराई संयोजकत्वको समितिले मस्यौदालाई अन्तिम रूप दिएको हो ।

 

यसअघिका विभिन्न कार्यदलले प्रहरीको केन्द्रमा महानिर्देशक तथा प्रदेशमा महानिरीक्षक राख्न सुझाब दिएका थिए । त्यसविपरीत उक्त समितिले केन्द्रमा महानिरीक्षक र प्रदेशमा अतिरिक्त महानिरीक्षक राख्न प्रस्ताव अघि बढाएको हो । जसप्रति प्रहरी अधिकारीहरू नै असन्तुष्ट छन् ।

प्रहरीलाई संघीय प्रणालीमा रूपान्तरणका लागि गृहमा दुई समिति बनेका छन् । सचिव लोकदर्शन रेग्मीको संयोजकत्वमा निर्देशक समिति बनेको छ, जसमा प्रहरी महानिरीक्षक, महान्यायाधिवक्ता, कानुन सचिवलगायतका अधिकारी सदस्य छन् । त्यस्तै, सहसचिव निर्मला अधिकारीको संयोजकत्वमा अर्को ऐनको मस्यौदा समिति बनेको थियो । सोही समितिले ऐनको मस्यौदा तयार बनाएको हो । मस्यौदा अन्तिम चरणमा पुगेको सहसचिव अधिकारीले बताइन् ।

उपेन्द्रले अध्यक्ष मागेपछि भाँडियो नयाँ शक्ति–फोरम एकता

१० वैशाख, काठमाडौं । एकीकृत पार्टीको अध्यक्ष को हुने भन्ने विषयमा सहमति जुट्न नसकेपछि संघीय समाजवादी फोरम नेपाल र नयाँ शक्ति पार्टीबीचको एकता तत्कालका लागि भाँडिएको छ ।

स्रोतका अनुसार, वैशाखको पहिलो साताभित्रै दुई पार्टीबीच एकीकरण गर्ने तयारी भएको थियो । एकतापछि पार्टीको नेतृत्व कसले गर्ने भन्ने विषयबाहेक अन्य विषयमा करिब–करिब सहमति जुटिसकेको थियो । तर, अध्यक्षको विषयमा सहमति जुट्न सकेन ।

 

स्रोतका अनुसार, एकता वार्तामा फोरम नेपालका दोस्रो तहका नेताहरुले एकीकृत पार्टीको अध्यक्ष उपेन्द्र यादव हुनुपर्ने र बाबुराम भट्टराई दोस्रो तहको नेताका रुपमा स्वीकार गर्न सकिने अडान राखेका थिए । तर, नयाँ शक्तिका नेताहरुले पूर्वप्रधानमन्त्री समेत रहेका भट्टराई पहिलो स्थानमा हुनुपर्ने र दोस्रो स्थानमा यादव हुनुपर्ने अडान राखेका थिए । यस्तो अडानपछि हुनै लागेको एकता तत्काललाई टरेको आजको नागरिक दैनिकले लेखेको छ ।

तीर्थयात्री सवार बस कागवेनीमा दुर्घटना, ५ जनाको मृत्यु

९ बैशाख, पोखरा । जोमसोमबाट मुक्तिनाथ जाँदै गरेको तीर्थयात्री सवार बस कागबेनीमा दुर्घटना हुँदा ५ जनाको मृत्यु भएको छ ।

 

शनिबार बिहान मुस्ताङ सदरमुकाम जोमसोमबाट मुक्तिनाथका लागि छुटेको ना. ५ ख ६०६७ नम्बरको बस कागबेनी भन्दा दुई किलोमिटर अगाडि दुर्घटना भएको हो । दुर्घटनामा ११ जना भन्दा बढी घाइते भएका छन् ।

मृत्यु भएकाहरुको पहिचान खुल्न नसकेको जिल्ला प्रहरी कार्यालय मुस्ताङले जनाएको छ । घटनाको खबर पाउने बित्तिकै जिल्ला प्रहरी कार्यालयबाट प्रहरीको टोली उद्धारका लागि घटनास्थल पुगेको प्रहरी नायब उपरीक्षक हरिहर योगीले जानकारी दिए ।

२६ जना सवार बसमा अन्य सामान्य घाइते भएको छन् । ‘घाइते सबैलाई उपचारका लागि जिल्ला अस्पताल ल्याइदैछ, दुर्घटनास्थलमा डोजरको सहायताले बस र शव उठाउने काम भइरहेको छ’ उनले भने ।

सामाजिक सञ्जाल दुरुपयोगः परिणाम गम्भीर

Facebook

९ वैशाख, काठमाडौं । प्रविधिमा सहज पहुँच र इन्टरनेट विस्तारले पछिल्लो समय सामाजिक सञ्जाल लोकप्रिय बन्दै आएको छ । साथीसंगीसँग निकट हुन, आफ्ना भावना अरुसम्म पुर्याउन मात्र नभएर सूचनाको प्रभावकारी माध्यमका रुपमा पनि फेसबुक, ट्विटरजस्ता सामाजिक सञ्जालको भूमिका देखिएको छ । युवकयुवतीमात्र नभई बालबालिका र प्रौढ अवस्थाका सर्वसाधारण पनि सामाजिक सञ्जालमा अभ्यस्त भइरहेका छन् ।

लोकप्रियता बढेसँगै सामाजिक सञ्जालको दुरुपयोग र त्यसका गम्भीर परिणाम पनि सार्वजनिक भइरहेका छन् । यसैको पछिल्लो कडीका रुपमा देखिएको छ, सामाखुसीमा रहेको प्रहरी विद्यालयका छात्र कुन्दन थापाको मृत्यु प्रकरण । उनको मृत्युको कारण सामाजिक सञ्जाल फेसबुकको दुरुपयोग देखिएको छ । घटनाको छानबिन गर्न गठित समितिले सहपाठीसँग बदला लिन १४ वर्षीय कुन्दनले फेसबुकमा नक्कली खाता खोलेर अश्लील सामग्री राखेको घटना खुलेपछि आत्तिएर आत्महत्या गरेको निष्कर्ष निकालेको आजको नागरिक दैनिकमा खबर छ ।

नचिनिएका ‘धुर्मुस’, जसले एक्लो प्रयासमा बनाए ५५ घर

८ वैशाख, काठमाडौं । गरे के सम्भव छैन भन्ने कथन चरितार्थ गर्दै धादिङ लापाका एक युवाले एक्लो प्रयासमा ५५ घरको नमुना बस्ती ठड्याएका छन् । ती युवा हुन्, दिनेश तामाङ ।

नमुना बस्ती निर्माणमा देशभर धुर्मुस–सुन्तलीको चर्चा चलिरहेका बेला दिनेशले पनि धादिङको ढोलामा नमुना बस्ती निर्माण गरे । सामाजिक संघ–संस्थासँग सहयोग जुटाएर उनले १६ महिनामा ५५ घर तयार पारेका हुन् ।

 

आलेगाउँमा २६ घर र भुवालेपानीमा २९ घरका दुई बस्ती उनले तयार पारेका छन् । ती घरमा ३ सय १० भूकम्पपीडित बस्न थालेका छन् ।

ती घर जिल्लाको दुर्गममा पर्ने रुबीभ्याली गाउँपालिकाको कपुरगाउँका पीडितलाई हस्तान्तरण गरिएको हो । गाउँको चारैतिर पहिरो झरेर बस्न नसक्ने भएपछि उनीहरु विस्थापित भएर आलेगाउँ र भुवालेपानीमा त्रिपालमुनि बस्नै आएका थिए ।

क्यानडास्थित चाइल्ड हेभन इन्टरनेशनल क्यानडा–नेपालले ३८ रोपनी घडेरी किन्न २९ लाख रुपैयाँ सहयोग गरेपछि शिविर बसेकै जग्गा किनेर बस्ती निर्माण सुरु गरिएको तामाङले बताए ।

नागरिक दैनिकका अनुसार, प्रतिघर निर्माणका लागि १४ लाख खर्च भएको छ । प्रत्येक विस्थापितले घर बनाउन झन्डै ४ लाखको श्रमदान गरेका छन् ।

बालुवाटारमा वार्ता जारी, प्रधानमन्त्रीले नयाँ प्रस्ताव राख्ने

Sarkar-Madheshi-Morcha-Meeting-Baluwatar-810x321

काठमाडौं, ८ वैशाख । सत्तारुढ दलहरू र संयुक्त लोकतान्त्रिक मधेसी मोर्चाका नेताबीच बैठक बसिरहेको छ ।

प्रधानमन्त्री निवास बालुवाटारमा जारी बैठकमा संविधान संशोधन प्रस्ताव र स्थानीय तहको निर्वाचनका विषयमा कुराकानी भइरहेको हो ।

प्रधानमन्त्री दाहालले सहमतिका लागि निर्वाचन गर्न दुई मिति प्रस्ताव गर्न सक्ने स्रोतको भनाइ छ ।

बैठकमा प्रधानमन्त्री दाहालका साथै कांग्रेस सभापति शेरबहादुर देउवा, गृहमन्त्री बिमलेन्द्र निधि, कांग्रेस नेताहरू रामचन्द्र पौडेल, महामन्त्री डा.शशांक कोइराला, प्रकाशमान सिंह, माओवादी केन्द्रका नेता वर्षामान पुन, मधेसी मोर्चाका नेताहरू महन्त ठाकुर, राजेन्द्र महतो, शरतसिंह भण्डारी, महेन्द्र राय यादव, राजकिशोर यादवल, अशोक राई लगायतका नेताहरूको सहभागिता रहेको छ ।