Home / रास्ट्रिय खबर

रास्ट्रिय खबर

यसकारण च्यातियो भरतपुरमा मतपत्रः मतगणना कि फेरि मतदान ?

१६ जेठ, काठमाडौं । भरतपुर महानगरपालिकाको मतगणना कार्य अन्तिम चरणमा थियो । सोमबार गणतन्त्र दिवससँगै भरतपुर महानगरपालिकाको मेयर घोषणा हुने निश्चितजस्तै थियो । यही आसमा आइतबार सुतेका भरतपुरवासीलाई सोमबार बिहानैको खबरले नराम्ररी झस्कायो । मध्यरातमा मतपत्र च्यातिएपछि मतगणना कार्य स्थगित भइसकेको थियो ।

मतगणना स्थगित गर्नुपर्ने कारणबारे मुख्य निर्वाचन अधिकृत कविप्रसाद न्यौपानेले मतगणना स्थलको अवस्थाबारे गरेको वर्णनले भरतपुर नगरवासी मात्रै नभएर देशविदेशका धेरै नेपाली आश्चर्यमा परे । कूल २९ वडा रहेको भरतपुर महानगरपालिकामा २७ वडाको मतगणना सकिएको थियो । अन्तिममा पालो परेका वडा नं. १९ र २० मध्ये १९ वडाको मतगणना आइतबार साँझ सुरु भएको थियो ।

 

प्रतिष्पर्धामा रहेका सबै मुख्य दलले मतपत्र च्यातिनुको कारण भने एउटै दिएका छन् । आफ्नो पार्टीका उम्मेदवारले जित्ने अवस्था बनेपछि प्रतिष्पर्धीले मतपत्र च्यात्यो भन्ने आरोप सबैको छ ।

मतगणना स्थगित गरेका मुख्य निर्वाचन अधिकृत निर्वाचन आयोगले दिने निर्दशन कुरेर बसेका छन् । चितवनका दलहरुले मतगणना सुरु गर्न र वडा नं. १९ मा पुनः निर्वाचन गराउन माग गर्न थालिसकेका छन् । एमालेले पुनः निर्वाचनलाई नमान्ने र तत्काल मतगणना सुरु गर्न माग गरेको छ । चितवन एमालेले यही मागका साथ सोमबार भरतपुरमा विरोधसभा पनि गर्यो । आजको नागरिक दैनिकमा खबर छ ।

चुनावी तालमेल उपलब्धीहीन भएको एमाले निष्कर्ष, दोस्रोमा एक्लै भिड्ने

 

१६ जेठ, काठमाडौं । एमालेले स्थानीय तहको दोस्रो चरणको निर्वाचनमा केन्द्रीय स्तरबाट कुनै पार्टीसँग पनि तालमेल नगर्ने भएको छ ।

पहिलो चरणको तालमेलले प्रभावकारी परिणाम दिन नसकेको निष्कर्ष निकाल्दै एमालेले यस्तो निर्णय गरेको आजको नागरिक दैनिकमा खबर छ ।

 

नेपाली कांग्रेससँग मुख्य प्रतिष्पर्धा हुने भन्दै एमालेले आफ्नो संगठन र कार्यक्रमको आधारमा जित्न सकिने निष्कर्ष निकालेको हो ।

‘पहिलो चरणको गठबन्धन प्रभावकारी बन्न सकेन, त्यसको विभिन्न कारण होलान । समीक्षा हुन्छ,’ एमाले नेता प्रदीप ज्ञवालीले भने, ‘दोस्रो चरणमा पनि संगठन र मुद्दाको बलमा लड्ने हो । आमरुपमा एक्लै लड्छौं ।’

उनले स्थानीय तहको आवश्यकता आधारमा चुनावी गठबन्धन नकार्न नसकिने बताए ।

कोटेश्वर–सूर्यविनायक सडक सुरुङ मार्गमा परिणत गरिने

१५ जेठ, काठमार्डौँ ।

सरकारले मुलुकको एक मात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थललाई अन्तर्राष्ट्रिय मापदण्डानुरुप स्तरोन्नति गर्ने भएको छ ।

व्यवस्थापिका–संसद्मा आव २०७४÷०७५ को राजस्व र व्ययको वार्षिक अनुमान (बजेट) प्रस्तुत गर्दै अर्थमन्त्री कृष्णबहादुर महराले विमानस्थल विस्तारका लागि कोटेश्वर–सूर्यविनायक सडक मार्गलाई सुरुङमा परिणत गर्ने घोषणा गरेका हुन । विमानस्थलको धावनमार्ग विस्तार र ट्याक्सी–वे थप गरी एयर ट्राफिक समस्या न्यून गर्ने योजना बजेटमा उल्लेख छ ।

तीन अन्तर्राष्ट्रिय विमानस्थलका लागि रु १४ अर्ब
सरकारले राष्ट्रिय गौरवका आयोजना कार्यान्वयनलाई तीव्रता दिँदै तीन स्थानमा अन्तर्राष्ट्रिय विमानस्थलका लागि झन्डै रु १४ अर्ब बजेट विनियोजन गरेको छ । बाराको निजगढ अन्तर्राष्ट्रिय विमानस्थल तथा निर्माणाधीन गौतमबुद्ध र पोखरा क्षेत्रीय अन्तर्राष्ट्रिय विमानस्थलका लागि रु १३ अर्ब ७२ करोड बजेट छुट्याइएको छ ।

उनका अनुसार निगजढ अन्तर्राष्ट्रिय विमानस्थलका लागि आगामी आवमा बोलपत्र आह्वान गरिनेछ । गौतमबुद्ध विमानस्थल विसं २०७५ चैतभित्र निर्माण सक्ने र पोखरा अन्तर्राष्ट्रिय विमानस्थल आगामी आवदेखि निर्माण सुरु गरी चार वर्षभित्र सम्पन्न गरिनेछ ।

धार्मिक पर्यटन प्रवद्र्धनका लागि पशुपति क्षेत्र र लुम्बिनी क्षेत्रको गुरुयोजना कार्यान्वयनमा तीव्रता दिई मुख्य क्षेत्रको दोस्रो चरणको बृहत् गुरुयोजना र बृहत् लुम्बिनी क्षेत्र विकास गुरुयोजना तय गरी कार्यान्वयनको विधि तयारी गरिने छ ।

पर्यटन पूर्वाधारतर्फ आगामी आमा आर्थिक पर्यटन क्षेत्रका कार्यक्रमलाई थप परिष्कृत बनाई निरन्तरता दिएको सरकारले पर्यटकीय प्रचूरता भएका प्रमुखस्थललाई पर्यटकीय गन्तव्यका रुपमा विकास गर्न तयार भएको गुरुयोजना कार्यान्वयन गर्ने तथा पर्यटकीय पदमार्ग निर्माण तथा विकासको कार्यक्रमलाई निरन्तरता दिनेछ । त्यस्तै बृहत् जनकपुर क्षेत्र विकाससम्बन्धी कार्यक्रमलाई निरन्तरता दिइने छ । रासस

 

छानवीन समिति चितवन पुगेर काम थाल्यो

१५ जेठ, काठमाडौं । भरतपुरको मतगणना विवाद छानवीनका लागि निर्वाचन आयोगले गठन गरेको छानवीन समिति चितवन पुगेको छ ।

सहमहान्यायाधीवक्ता गीताप्रसाद तिम्सिना, गृह मन्त्रालयका सहसचिव महेश आचार्य र नेपाल प्रहरीका नायव महानिरीक्षक केदरामानसिंह भण्डारीको टोलीले चितवन पुगेर काम थालेको हो ।

टोलीले मुख्य निर्वाचन अधिकृतसँग छलफल गरिरहेको छ । टोलीले प्रारम्भिक घटनाक्रमको प्रारम्भिक बस्तुस्थिती बुझेपछि मतगणनस्थलको आजै अनुगमन गर्नेछ । पर्सिसम्म प्रतिवेदन बुझाउनुपर्ने भएपछि टोलीले आजै छानवीन सुरु गरेको हो ।

टोलीले मतगणना स्थलको अवलोकन गरिसकेपछि प्रत्यक्षदर्शी र राजनीतिक दलका प्रतिनिधिसँग पनि छलफ गर्ने तयारी गरेको छ ।

 

दोस्रो चरणको चुनाव सर्‍यो, असार ९ गते गर्ने सरकारको निर्णय

१५ जेठ, काठमाडौं । आसन्न दोस्रो चरणको स्थानीय तह निर्वाचन असार ९ गतेका लागि सरेको छ । यसले उम्मेदवारी दर्ता लगायतका सबै प्रक्रिया हेरफेर हुनेछ

 

सोमबार बसेको मन्त्रिपरिषद्को बैठकले जेठ ३१ का लागि तय भएको दोस्रो चरणको निर्वाचन असार ९ गते सार्ने निर्णय गरेको हो ।

आइतबार साँझ बालुवाटारमा बसेको प्रमुख दलहरुका शीर्ष नेताहरुको बैठकमा राष्ट्रिय जनता पार्टीलाई सहभागी गराउन चुनावको मिति केही दिन सार्ने समझदारी भएको थियो ।

लगतै प्रधानमन्त्री प्रचण्डले निर्वाचन आयोगका पदाधिकारीसँग परामर्श गरेर नयाँ मिति प्रस्ताव गरेका हुन् । पहिलो चरणको निर्वाचनमा भाग नलिएका राजनीतिक दलहरुको सहभागिता सुनिश्चित गर्न पनि दोस्रो चरणको स्थानीय तहको निर्वाचन असार ९ गते सार्ने निर्णय लिनु परेको सञ्चारमन्त्री सुरेन्द्रकुमार कार्कीले जानकारी दिए ।

दोस्रो चरणको स्थानीय तहको निर्वाचन प्रदेश नम्बर १, २, ५ र ७ प्रदेशका ४६१ स्थानीय तहमा हुनेछ । प्रदेश नम्बर ३, ४ र ६ का ३८१ स्थानीय तहमा बैशाख ३१ गते निर्वाचन सम्पन्न भइसकेको छ ।

उर्जा क्षेत्रमा अहिलेसम्मकै ठूलो बजेट, कुन-कुन आयोजना प्राथमिकतामा ?

१५ जेठ, काठमाडौं । सरकारले आगामी आर्थिक वर्ष २०७४/०७५ को बजेट प्रस्ततु गर्दै उर्जा क्षेत्रमा ६२ अर्ब ४७ करोडको रकम छुट्याएको छ । यो बजेट उर्जा क्षेत्रका लागि छुट्याइएको अहिलेसम्मकै ठूलो हो ।

चालु आर्थिक वर्षका बजेटमा उर्जा क्षेत्रमा झन्डै ५० अर्ब बराबरको रकम उर्जा क्षेत्रका लागि छुट्याइएको थियो । आगामी आर्थिक वर्षमा भने यो रकम झन्डै १२ अर्बले बढेको छ ।

 

सरकारले आगामी आर्थिक वर्षको बजेटमा बुढीगण्डकी जलबिद्युत आयोजनाको लागि मात्रै १० अर्ब १७ करोड रकम छुट्टाएको छ । चालु आर्थिक वर्षमा सरकारले बुढीगण्डकी आयोजनालाई ५ अर्ब ३३ करोड रकम छुट्याएको छ । आगामी आर्थिक वर्षका लागि यसमा झण्डै दोब्बरले रकम बृद्धि भएको छ ।

त्यस्तै आगामी आर्थिक वर्षकेा बजेटमा माथिल्लो तामाकोसीका लागि ५० करोड रकम छुट्टाइएको छ ।

सात वर्षमा १७ हजार मेगावाट बिद्युत उत्पादन गर्ने सरकारले लक्ष्य लिएको छ । तर यो लक्ष्य अनुरुप बजेट भने सार्वजनिक नभएको विज्ञहरु बताउँछन् ।

स्वतन्त्र उर्जा उत्पादकहरुको संस्था (इपान) का अध्यक्ष शैलेन्द्र गुरागाँई ७ वर्षमा १७ हजार मेगावाट विद्युत उत्पादन गर्नका लागि आवश्यक भौतिक पुर्वाधार निर्माणका लागि यो बजेट अपुग भएको बताउँछन् ।

उनले भने ‘उर्जा मन्त्रालयले ९९ अर्बको बजेट माग गरेको थियो, तर बजेटमा ६२ अर्ब मात्रै दिइएको छ ७ वर्षमा १७ हजार मेगावाट बिद्युत उत्पादको लागि भौतिक पुर्वाधार बनाउनको लागि समेत यो बजेट अपुग छ । ‘

उर्जा क्षेत्रका लागि छुट्टाइएको यो रकम अत्यन्तै न्युन भएको गुरागाँईको भनाइ छ । विद्युत उत्पादन हुने प्रक्षेपण गरेबमोजिम लगानी पनि गर्नपर्ने गुरागाँई बताउँछन् ।

उर्जा मन्त्रालयले न्युनतम पनि ९९ अर्ब बजेट आवश्यक भएकाले सो माग गरेको उनको भनाइ छ ।

सरकारले नलसिंगगाढ, भेरी-१, जगदुुल्ला, उत्तरगंगा नौमुरे, सुनकोशी २ र ३, दूधकोसी तमोर लगायतका जलाशययुक्त आयोजना तथा पिकिङ परियोजनालाई एकसाथ अघि बढाउने बताएको छ ।

जलबिद्युतमा स्वदेशी तथा निजी बिदेशी लगानी आकर्षण गर्नको लागि पिकिङ तथा जलाशययुक्त आयोजनाहरुको लागि नया बिद्यतु खरिद दर लागु गरिने भएको छ । तर लगानीकर्ताहरुले भने यसमा आपत्ति जनाएका छन् ।

उद्योग बाणिज्य महासंघका ज्ञानेन्द्रलाल प्रधानले पिकिङ तथा जलाशययुक्त आयोजना नेपालीले बनाउन नसक्ने भएकाले यसले स्वदेशी लगानीकर्तालाई फाइदा नपुर्‍याउने बताउँछन् ।

उनले भने ‘ रन अफ दि रिभरको विद्युत खरिद दर नया लागु गर्ने भनिएको छैन , जलाशययुक्त आयोजना नेपालीले बनाउन सक्दैनन् त्यसैले यो बजेटले स्वदेशी लगानीकर्तालाई सम्बोधन गर्न सकेको छैंन ।

साथै सरकारले सरकारी कर्मचारी, शिक्षक तथा सेना प्रहरीको लगानीमा कम्तीमा ५ सय मेगावाट क्षमताको जलविद्युत आयोजना निर्माण गर्ने भनेको छ ।

निर्माणाधीन अवस्थामा रहेको चमेलिया जलविद्युत आयोजना र कुलेखानी तेस्रो भने यसै बर्ष सम्पन्न गरिने बजेटमा उल्लेख गरिएको छ ।

source: onlinekhabar

सरकारले ल्यायो १२ खर्ब ७८ अर्ब ९९ करोडको बजेट चालु खर्च ६२.८ प्रतिशत, पुँजीतर्फ २६.२ प्रतिशत

१५ जेठ, काठमाडौं । सरकारले आगामी आर्थिक वर्षका लागि  १२ खर्ब ७८ अर्ब ९९ करोड बराबरको बजेट ल्याएको छ । यो आकार चालु आर्थिक वर्षको भन्दा करिब २२ प्रतिशतले बढी हो ।

गत वर्ष १० खर्ब ४८ अर्बको बजेट प्रस्तुत भएको थियो ।

 

उपप्रधान तथा अर्थमन्त्री कृष्णबहादुर महराले सोमबार संसदमा १२ खर्ब ७८ अर्ब ९९ करोड ४४ लाख ५५ हजार रूपैयाँ बराबरको बजेट पेश गरे । बजेटमा चालु खर्चका लागि ८ खर्ब ३ अर्ब ५३ करोड, पुँजीगत खर्चतर्फ ३ खर्ब ३५ अर्ब २७ करोड र वित्तीय खर्चतर्फ १ खर्ब ४० अर्ब २८ करोड छुट्याएको छ ।

चालु खर्चतर्फ कुल बजेटको ६२.८ प्रतिशत, पुँजीतर्फ २६.२ प्रतिशत र वित्तीय तर्फ ११ प्रतिशत बजेट विनियोजन भएको छ।

यसका लागि सरकारले राजस्वबाट ७ खर्ब ३० अर्ब, साँवा फिर्ताबाट १५ अर्ब, बैदेशीक अनुदानबाट ७२ अर्ब १६ करोड जुटाउने उल्लेख गरेको छ ।

यो बजेट ४ खर्ब ६१ अर्ब न्यून हुने भएको छ ।

यसमध्ये बाहिरी ऋणबाट २ खर्ब १४ करोड जुटाइने भएको छ र बाँकी रकम चालु आवमा बचतमा रहेको नगद मौज्दातबाट जुटाइने उल्लेख छ ।

स्थानीय तहको निर्वाचनको बीचमा प्रस्तुत भएको बजेटमा नयाँ नीति तथा कार्यक्रम भने आएन । नयाँ कार्यक्रम ल्याउन नपाएको सरकारले राष्ट्रिय गौरवका आयोजनामा पर्याप्त रकम विनियोजन गरेको छ ।

तर बजेटको आकार उच्च वृद्धि भएको भन्दै सरकारमा समावेश दलले समेत असन्तुष्टि जनाएका छन् । यद्यपी सत्तारुढ दल र प्रतिपक्षले समेत स्थानीय तहमा गरिएको बजेट विनियोजनको प्रशंसा गरेका छन् ।

 

बजेटले बोकेका केही नारा

सुरक्षित बस्न पाउने जनताको अधिकार

उर्जा बिकासका आधार उज्यालो नेपाल अभियान

नेपालको पानी जनताको लगानी

सहरी पुर्वाधार : विकासको आधार

मानवीय क्षमताको आधार : शिक्षाको पुर्वाधार

म स्वस्थ मेरो देश स्वस्थ

बजेटको पूर्णपाठ

प्रचण्डको आदेशमा मतपत्र च्यातियो, तेजाब खन्याउन चाँहि पाएननः देवी ज्ञवाली (अन्तर्वार्ता)

मान्छेहरु पहिल्यै आंशका गरिरहेका थिए । माओवादी र काँग्रेसले हार्दैछन्, षडयन्त्र गर्दैछन् मतपत्र च्यात्दैछन, तेजाब खन्याउँदैछन् भन्ने खालका कुरा हामीले सुनेका थियौँ । तर, यस्तो घृणित काम त के गर्लान भन्ने लागेको थियो । तर आज व्यवहारबाट यो कुरा प्रमाणित भयो ।

भरतपुरमा मध्यराति भएको चाँहि के हो ?

मतपरिणाम नेकपा एमालेको पक्षमा आइरहेको अबस्थामा माओवादी केन्द्रका एजेन्ट प्रकाश कँडेल, मधु न्यौपाने, दिलीप लगायतका व्यक्तिहरुले मतपत्र च्यात्ने निन्दनीय कार्य भयो । सुनियोजित ढंगले मतपत्र च्यात्न लगाइयो । निर्वाचनमा हार हुन लागेपछि मतपत्र च्यात्न लगाएर लोकतान्त्रिक अभ्यास र प्रणालीलाई तोड्ने एउटा दुःखद घृणास्पद र लज्जास्पद क्रियाकलाप सत्तारुढ पार्टीका कार्यकर्ताहरुबाट भएको छ । बर्बर, तानाशाही र जंगली क्रियाकलाप यहाँ देखियो ।

कसरी यस्तो भयो ?

१९ नम्बर वडाको ७५ प्रतिशत गणना भइसकेको थियो । २० नम्बर वडाको बाँकी छ । जसमा सूर्य चिन्हले अत्याधिक मत प्राप्त गरेको अबस्था देखेपछि सत्तारुढ दलका उम्मेदवारले हारलाई स्वीकार गर्न नसकेर मतपत्र च्यात्ने जंगली कार्य भएको छ । यो प्रधानमन्त्री समेत रहेका सत्तारुढ दल माओवादीका अध्यक्ष पुष्पकमल दाहालको निर्देशनमा भएको हो ।

एकाएक यस्तो घटना भएको हो कि पहिल्यै केही संकेत मिलेको थियो ?

मान्छेहरु पहिल्यै आंशका गरिरहेका थिए । माओवादी र काँग्रेसले हार्दैछन्, षडयन्त्र गर्दैछन् मतपत्र च्यात्दैछन् तेजाब खन्याउँदैछन् भन्ने खालका कुरा हामीले सुनेका थियौँ । तर, यस्तो घृणित काम त के गर्लान भन्ने लागेको थियो । तर आज व्यवहारबाट यो कुरा प्रमाणित भयो । अब हामीलाई डर लागिरहेको छ ।

प्रहरीलाई खबर गर्नुभएन ?

हामीले पटकपटक प्रहरी प्रशासनलाई खबर गर्यौं । सूचना दियौं । तर, सूचना दिँदादिँदै पनि तिनै मान्छेहरु एउटा दलको एजेण्ट बन्ने, निर्वाचन परिणाम आफ्नो पक्षमा नआएपछि मतपत्र च्यात्ने जस्ता निन्दनीय र घृणित कार्यहरु भए । प्रहरीले पनि खास चासो लिएको देखिएन् । यस्तो कुरा भन्नुपर्दा म आफै दुखित छु ।

अब कसरी अगाडि बढ्नुहुन्छ ?

अब हामी निर्वाचनको बिधि प्रक्रिया र कानुनसम्मत ढंगले अगाडि बढ्न चाहन्छौं । निर्वाचनको विधि अनुसार जे विधि छ, त्यो विधि र प्रक्रिया अन्तरगत हामी अगाडि बढ्नेछौं । मतगणनाको जिम्मा लिने निकाय निर्वाचन आयोग हो । उसले कहिले अगाडि बढाउँछ त्यो उहाँहरुसँगै प्रश्न गर्दा उपयुक्त र सान्दर्भिक होला ।

(भरतपुर महानगरपालिकाको मतगणना स्थगित भएको सन्दर्भमा एमालेका मेयरका उम्मेदवार देवी ज्ञवालीसँग गरिएको कुराकानी)

source : dainiknepal

भरतपुरको मतगणनास्थलमा तनाव, माओवादी प्रतिनिधिले मतपत्र च्याते

१५ जेठ, चितवन । माओवादी प्रतिनिधिले मध्यरातमा मतपत्र च्यातिदिएपछि भरतपुर महानगरपालिकाको मतगणनास्थलमा तनाव सिर्जना भएको छ । अहिले मतगणना रोकिएको छ ।

मत गणनास्थलमा मेयर पदका उम्मेदवारहरु एमालेका देबी ज्ञवाली र माओवादीकी रेणु दहालबीच तिव्र प्रतिस्पर्धा भइरहेका बेला वाईसीएल जिल्ला अध्यक्ष मधु न्यौपानेले मतपत्र च्यातेका थिए । मतगणना अन्तिम चरणमा पुगेका बेला मतपत्र च्यातिएपछि तनाव बढेको थियो ।

 

न्यौपानेलाई प्रहरीले नियन्त्रणमा लिइसकेपछि मतगणनास्थल भित्रै रहेका दाहालको प्रतिनिधि द्रोण सिवाकोटीले पनि मतपत्र च्यातेका थिए । न्यौपाने र सिवाकोटी दुबैलाई प्रहरीले नियन्त्रणमा लिएको छ ।

स्थिति नियन्त्रणमा लिन प्रहरीले लाठीचार्ज गरेको छ ।

source: onlinekhabar

माओवादीले मतपत्र च्यातेपछि भरतपुरको मतगणना अनिश्चितकाललाई स्थगित, देवी ज्ञवालीले के भने ?

भरतपुर, १५ जेठ । माओवादी कार्यकर्ताले मतपत्र च्यातेपछि भरतपुर महानगरपालिकाको मतगणना अनिश्चितकालका लागि स्थगित भएको छ ।

मुख्य निर्वाचन अधिकृत कविप्रसाद न्यौपानेले मतगणना अनिश्चितकालका लागि स्थगित गरिएको जानकारी दिएका हुन् । ‘म शौचालय गएको बेला मतगणनास्थल रणमैदान भयो’, उनले संचारकर्मीहरुसँग भने – ‘मतगणना अनिश्चितकालका लागि स्थगित गरिएको छ ।’

बर्बर जंगली हमला : देवी

यता, एमालेका मेयरका उम्मेदवार देवी ज्ञवालीले माओवादीले मतपत्र च्यातेकोमा कडा शब्दमा निन्दा गरेका छन् । ‘चुनाव हार्ने डरले बर्बर जंगली हमला भयो, यो लोकतन्त्रको उपहास हो ।’, मतगणनास्थलमा संचारकर्मीहरुसँग कुरा गर्दै ज्ञवालीले भने – ‘सत्तारुढ दलको यो घृणित कार्यको जति निन्दा गरे पनि पुग्दैन ।’ उनी च्यानल गेटभित्रबाट पत्रकारहरुलाई प्रतिक्रिया दिँदै थिए ।

च्यानल गेटभित्रबाट संचारकर्मीलाई प्रतिक्रिया दिँदै ज्ञवाली । तस्वीरः तीर्थ नेपाल

भरतपुरको मेयरमा एमालेका ज्ञवाली र माओवादीकी रेणु दाहालबीच रोमाञ्चक प्रतिस्पर्धा चलिरहेका बेला माओवादीका तर्फबाट मतगणनास्थलमा एजेण्ट बसेका दुईजनाले मतपत्र च्यातेका हुन् । मतपत्र च्यातिएपछि एकाएक मतगणना बिथोलिएको हो ।

मत गणनास्थलमा मेयर पदका उम्मेदवार रेणु दाहालको एजेण्ट बसेका बसेका माओवादीका मधु न्यौपानेले मतपत्र च्यातेका हुन् । न्यौपाने माओवादीको चितवन जिल्लाका वाईसीएल इन्चार्ज हुन् ।

न्यौपानेलाई प्रहरीले नियन्त्रणमा लिइसकेपछि मतगणनास्थल भित्रै माओवादीका प्रतिनिधि द्रोण सिवाकोटीले पनि मतपत्र च्यातेका थिए । न्यौपाने र सिवाकोटी दुबैलाई प्रहरीले नियन्त्रणमा लिएको छ ।

माओवादीका कारण भरतपुरको मतगणना अन्यौलग्रस्त बनेको छ ।

source :dainknepal