Home / अन्तर्राष्ट्रिय खबर

अन्तर्राष्ट्रिय खबर

मंसिर १३ बाट वतनिया एयरको नेपाल-कुवेत सीधा उडान सेवा

६ मंसिर, काठमाडौं । नेपाल र कुवेतबीच पहिलोपटक सीधा हवाई उडान सुरु हुने भएको छ । कुवेतको वतनिया एयरवेजले आगामी बुधबारबाट कुवेत सिटीबाट काठमाडौं र काठमाडौंबाट कुवेतसिटीसम्म दोहोरो सीधा हवाई सेवा थाल्न लागेको हो ।

कुवेत नेपाली कामदारको प्रमुख गन्तब्यमध्ये एक हो । अहिलेसम्म नेपाली कामदारलाई साउदी अरब भएर कुवेत पुग्नुपर्ने बाध्यता छ ।

 

वतननियाले मंसिर १३ गतेबाट न्यारोबडी एयरबसमार्फत सेवा थाल्न लागेको हो । नेपाल नागरिक उड्डय प्राधिकरणले रातको ११ बजे त्रिभुवन अन्तर्राष्ट्रिय विमानस्थलमा आएर पौने १२ बजे कुवत फर्किने गरी सेवा सञ्चालनको अनुमति दिएको हो ।

नेपाल र कुवेतबीच सन् २००६मा हवाई सम्झौता भएको थियो । कुवेतसँग सीधा हवाई समबन्ध स्थापना भएपछि युरोप र अफ्रिका जानेहरुलाई पनि सहज हुनेछ ।

वतनियालाई प्रारम्भिक रुपमा ३ महिनामा लागि उडान अनुमति दिइएको प्राधिकरणमा महानिर्देशक सञ्जीव गौतमले जानकारी दिए ।

वतनियाले सेवा प्रारम्भ गरेपछि नेपाल फर्किने र नेपालबाट कुवेत उड्ने कामदारलाई निकै सहज हुनेछ ।

कुवेत अहिले धेरै नेपाली कामदार जाने मुलुकमध्ये ५ औं स्थानमा पर्छ । त्यसैकारण दैनिक एउटा उडान गर्ने गरी वतनियाले अनुमति लिएको हो ।

अहिले खाडी मुलक जान कतार, दुबई, इत्तिहाद, ओमन, नेपाल, हिमालय लगायतका एयरलाइन्सले सीधा उडान गरिरहेका छन् ।

चीनमा बुद्धको 2००० अस्तुधातु भेटिएको दाबी

२९ कात्तिक, लन्डन । चीनको जिङचुआन काउन्टीमा भगवान बुद्धको २५ सय वर्ष पुरानो अस्तुधातु फेला परेको दाबी गरिएको छ ।

 

चिनियाँ सञ्चारमाध्यमका अनुसार दाहसंस्कार गरिएका दुई हजार टुक्रा हाडखोर एउटा माटोको बाकसमा फेला परेका हुन् ।

उक्त बाकसमा रहेको शिलालेखमा ती अवशेष बुद्धको रहेको उल्लेख छ । उक्त काउन्टीमा दुई सय ६० वटा बुद्धका शालिकहरु बीचमा उक्त बाकस फेला परेको थियो ।

लोङसिङ मोनास्टि्रको मन्जुश्री मन्दिरका दुई भिक्षुहरु युनजिआङ र झिमिङले छिमेकी देशहरुबाट २० वर्ष लगाएर ती हाडखोर संकलन गरेका थिए ।

८० वर्षको उमेरमा निधन भएका बुद्धको अस्तु उनका शिष्यहरुबीच बाँडिएको र टाढासम्म फैलाइएको बौद्धमार्गीहरु बताउँछन् ।

पाँच वर्षअघि मन्दिरनजिकै सडकको काम गरिरहेका गाउँलेले उक्त बाकस पत्ता लगाएका थिए । बाकसमा रहेका दाँत र हाडहरु सहित दुई हजार वटा अवशेष फेला परेका छन् ।

बाकसका साथै पुरातत्वविद्हरुले दुई सय ६० वटा दुई मिटर अग्ला शालिकहरु भेटेका छन् । हाडहरु संकलन गरिएकै समयमा ती शालिक गाडिएका हुन् कि होइनन् भन्ने प्रष्ट भएको छैन ।

साभार : अनलाइन खबर

बार्सिलोना हमलाका प्रत्यक्षदर्शी नेपाली भन्छन् – एकछिन रक्ताम्य संसार देखियो नेपाली कोही नपरेको एनआरएनको भनाइ

२ भदौबार्सिलोना । युरोपमा आतंककारी हमलाका घटनाहरु बढिरहेका बेला स्पेनको पर्यटकीय गन्तब्य बार्सिलोना पनि अछुतो रहेन। पछिल्लो क्रममा मान्छेहरुको भिड माँझ लोरी, भ्यान वा गाडी जोताएर हमला गर्ने क्रम बढिरहँदा,त्यसको पछिल्लो शिकार सुन्दर शहर बार्सिलोना बनेको छ।

बिहीबार अपरान्ह कातोलोनियाको मुटु राम्बलासमा हिँडिरहेका सयौं मानिसहरुमाथि एउटा सेतो भ्यान लगेर जोताइँदा हालसम्म १३ जनाको ज्यान गएको सरकारी अधिकारीहरुले बताएका छन्। घटनामा परी अन्य ५० बढी घाईते भएको अन्तराष्ट्रिय संचार माध्यमहरुले जनाएका छन्।

 

घटनामा प्रयोग भएको भ्यान भाडामा प्रयोग गरिएको स्पेनी मिडियाहरुले जनाएका छन्। हमलामा प्रयोग गरिएको भ्यान भाडामा लिने पुरुषको तस्वीर पनि प्रहरीले सार्वजनिक गरेका छन्। ती ब्यक्ति मोरक्कोमा जन्मिएका द्रिस उकाबीर भएको बताइन्छ।  हमलाको चौतर्फी निन्दा गरिएको छ।

घटनाका प्रत्यक्षदर्शी एक नेपाली यसो भन्छन्:

झन्डै एक दशकदेखि स्पेन बस्दै आएका बाग्लुंग गल्कोट स्थायी घर भएका रामु चालीसे घटनास्थल नजिकै रहेको एक रेष्टुरेन्टमा  काम गर्दै आएका छन्। बिहीबार अपरान्ह अर्डर गरेको खाना ग्राहक समक्ष पुर्याएर रेष्टुरेन्ट फर्कंदै गर्दा यस्तो भएको भन्दै घटना बारे चालीसे यसो भन्छन्।

‘ म राम्बलासमा कोलम्बसतिर बाटो कातोलोनियातर्फ जाँदै थिएँ। अर्डर भएको खाना छोडेर फर्कंदै, काइया सान्ट पाउ नजिकै, एउटा सेतो भ्यान सडकतिर गुड्न छोडेर, मान्छे हिँड्ने फराकिलो बाटोतिर बढेको देखें। किन यसो गरेको होला भनेर एकछिन वाल्ल परें । तर, कतैतिर मोड्ने होला भन्ने ठानेर चासो नराखी अगाडि बढे। तर, त्यसको केही सेकेण्डमा नै ठूलो हल्लाखल्ला सुनियो। मान्छेहरु चिच्याउन थालेरुवाबासी चल्यो। मैले फर्केर हेर्दा मान्छेहरु सबै लडेका थिए, कोही भागाभाग गर्दै थिए। डोजर लगाएजस्तै गरी सयौं मान्छेहरुलाई कुल्चेर गाडी निस्किसकेछ।

आफैंले चलाएको स्कुटर रोकेर घटनास्थल नजिकै आईहालें। उठ्न सक्ने मान्छेहरू भागाभाग गर्दै थिए। उठ्ने नसक्नेहरु रक्ताम्य बन्दै लडेका थिए। त्यसमध्ये भर्खरका युवतीहरु टाउकोबाट रगत बगिरहेका अवस्थामा पल्टिएका थिए। लाग्छ, उनीहरू स्कुल वा कलेज भ्याकेसनमा बार्सिलोना घुम्नका लागि आएको हुनु पर्छ। कतिपय रगतले पोतिएका आफन्त एवं परिवारलाई अंकमाल गर्दै सहयोग मागिरहेका थिए।

राम्बलासमा दुईतिर गाडी हिँड्ने साना सडकहरु, तर बिचमा मान्छे हिड्ने खुल्ला फराकिलो बाटो छ। त्यही भएकाले पनि आतंककारीले ठूलो भीडमा भ्यान जोताएर ठूलो नोक्सान पुर्याउने योजना बनाएको प्रष्ट देखिन्छ। दैनिक हजारौं मान्छे ओहोर दोहोर गर्ने राम्बलासमा हिँड्ने बाटोमा नै थुप्रै फूल दोकान र साना- साना स्टलहरु पनि छन्। त्यहाँ प्राय: स्थानीयहरुले काम गर्ने हुँदा केही स्पेनिसहरु पनि शिकार बनेको जस्तो लाग्छ। तर, धेरैको संख्यामा स्पेन बाहिरका विदेशी पर्यटकहरु नै परे कि बन्ने मेरो अनुमान छ।

घटनास्थल नजिकै गस्तीमा केही पुलिसहरु पनि थिए। केही मिनेटमा त जता हेरे पनि पुलिस नै पुलिस देखिन थाले। एम्न्बुलेन्सका आबाजहरु सुनिए। सुरक्षाकर्मीले घटनापछि वरपरका पसल, क्याफे, रेष्टुरेन्टहरु सबै बन्द गराए। सबैलाई सुरक्षित गन्तव्यमा पुर्याउने र घाइतेहरुलाई अस्पताल लैजान थाले।

मेरो काम गर्ने रेष्टुरेन्ट घटनास्थलबाट नजिकै रहेकाले त्यतैतिर लागे। आफ्नो चिनजानका रहेका ५-७ जना नेपालीहरु पनि त्यतै काम गर्ने हुनाले सम्पर्क गर्न थाले। कतिपयको साँझपख काम रहेछ, त्यसैले पनि घटनाबाट जोगिए। सुने अनुसार अन्य नेपालीहरुले त्यतै वरपर काम गर्छन् । तर, हालसम्म त्यस्तो हताहतको खबर भने सुनिएको छैन। अमूल्य संसारबाट धेरै

सर्वसाधारणले विदाइ लिइरहेको आफ्नै आँखाले देख्नुपर्यो, धेरै ठूलो दुख र पीडा भइरहेको छ।

सबै नेपालीहरु सुरक्षित छन् : एनआरएनए स्पेन

बार्सिलोनामा आतंककारी हमला हुँदा गर्दागैरआवासीय नेपाली संघ राष्ट्रिय समन्वय परिषद स्पेनको बैठक चलिरहेको थियो। देशमा बाढीपीडितहरुका लागि संकलित रकम कसरी पठाउने बारे छलफल भइरहेका बेला यस्तो घटना भएको छ ।

घटनापछि तत्कालै एनआरएन स्पेनको कार्यलयबाट नै त्यस वरपर रहेका नेपालीहरुसँग सम्पर्कको प्रयास भएको संघले जनाएको छ। लगत्तै संघका अध्यक्ष चिन्तामणि सापकोटाले घटनाप्रति दुख व्यक्त गर्दै सबै नेपालीहरु सुरक्षित रहेको सूचना जारी गरेका छन्।

बार्सिलोनामा मात्रै  झन्डै ४ हजार नेपालीहरुको रहेको अनुमान छ। प्रमुख पर्यटकीय क्षेत्र भएकाले पनि यहाँस्थित नेपालीहरु सानासाना पसलदेखि रेष्टुराहरुका काममा समेत व्यस्त हुने गरेका छन्। उनीहरूमध्ये कोही हताहत भए नभएको बारे बुझ्ने प्रयासलाई भने संघ संस्थाहरुले जारी राखेका छन्।

राम्बलास किन पर्यो निशानीमा ?

राम्बलास बार्सिलोनाको एक प्रमुख सडक हो। दुवैतिर वृक्ष रोपेर वीचमा मान्छे हिँड्ने पैदल स्थल बनाएकाले पनि पर्यटकहरुका लागि यो ठाउँ नौलो र लोकप्रिय मानिन्छ। कातालोनिया सेन्टरदेखि कोलोम्बस स्मारकसम्म १\२ किलोमिटरको दुरीसम्मको यो पैदल सडकमा हजारौं मानिसहरु ओहोर दोहोर गर्ने गर्छन्।

ठूलो भिडभाड भएकाले पनि लाम्बलासलाई आतंककारीले निशाना बनाएको सोझै अनुमान गर्न सकिन्छ। बिशेष गरी जुलाई र अगष्टको महिनामा बार्सिलोनामा पर्यटकहरु ठूलो संख्यामा आउने हुँदा पनि राम्बलासमा अहिले ठूलो भिड बढेको छ।

के छ राम्बलासको इतिहास ?

स्पेनिस एक प्रसिद्ध कवि फेडेरीको गार्सियाले एक पटक भनेका थिए, “लाम्बलास दुनियाँको एउटा मात्र यस्तो सडक हो, जसलाई म कहिल्यै टुंगाउन चाहान्न।” तर, आतंककारी हमलाबाट त्यही ऎतिहासिक महत्व बोकेको राम्बलासलाई सिध्याउने दुष्प्रयास गरिएको छ।

सन् १३७७ ताका नै यसको निर्माण सुरुवात मानिए पनि सन् १४४० मा आएर मात्र यो बिस्तारै सडकको रुपमा परिणत भएको थियो। त्यसको केही शताब्दीमा नै राम्बलास बार्सिलोनाको केन्द्रको रूपमा स्थापित बन्यो। त्यसताकादेखि नै यहाँ बिभिन्न चाडहरु मनाउन तथा बजारका लागि प्रयोग गरिएको इतिहास छ।

सचेत रहौं, घटना पुन: दोहोरिन सक्छ

फ्रान्स, जर्मनी, र बेलायतको लण्डनमा भएका आतंककारी हमलाहरु मध्ये केही ठाउँहरुमा भने लगत्तै सोही प्रकारका घटनाहरु दोहोरिएका थिए। बार्सिलोनामा पर्यटक आगामनको समय भएकाले पनि भिडभाड हुने स्थानहरुमा निकै सजक हुन जरुरी छ।

विशेष गरी बिमानस्थल, भूमिगत रेलवे स्टेशन, फुटबल रंगशालामा तथा समुन्द्री किनारामा मानिसहरुको ठूलो भीड लाग्ने हुँदा यस्ता ठाउँहरुमा पुग्दा बेलैमा सजक हुन जरूरी छ।

घटनास्थलको तस्वीर सौजन्य:रामु चालिसे 

सप्तकोशी मुनि बिहारमा के-के हुँदैछ ? बाढीले बगाउँदा ८ को मृत्यु टिस्टाको पानी नखोल्न सिक्किमलाई पश्चिम बंगालको आग्रह

२९ साउन, काठमाडौं । नेपाली नागरिकहरुले सप्तकोशी ब्यारेजका सबै ढोकाहरु खोलिनुपर्ने माग सामाजिक सञ्जालमार्फत् गरिरहँदा तल्लोतटीय भेगका बिहारी जनताको हालतचाहिँ के भइरहेको होला ? यसबारे हामीले केही भारतीय मिडिया ‘फलो’ गर्ने प्रयास गरेका छौं ।

प्राकृतिक प्रकोपले कुनै देश, जाति वा धर्म भन्दैन । विपत्ति सबै मानव समाजका लागि उत्तिकै पीडादायी हुन्छ । हिमालय भेगबाट बग्ने नदीहरु भारततर्फ जाने भएकाले नेपालमा आएको बाढीसँगै यसको चपेटामा भारतीय जनतासमेत परेका छन् ।

 

पूर्वी चम्पारण जिल्लामा लालबकैया नदीको बाँध भत्किएर बाढी गाउँ पसेको छ । त्यहाँ मदरासामा पढिरहेका विद्यार्थीलाई बगाउँदा एक छात्राको निधन भएको छ । सुपौलमा बाढीले घर भत्काउँदा ढोकाले किचिएर मानिसको मृत्यु भएको छ ।

पश्चिमी चम्पारणमा पनि घर घरमा पाँच फिटसम्म पानी जमेको छ । फारबीसगञ्जमा २४ घण्टादेखि बिजुली ठप्प छ ।

बाढीका कारण रेल्वे स्टेशनहरु बन्द भएका छन् । पूर्वोत्तर सीमान्त रेल्वे सेवा केन्द्रीय रेल्वे सेवासँग सम्पर्क विच्छेद भएको छ । कटिहार-जोगवनी रेल्वे सेवा ठप्प भएको छ ।
उता मुजफ्फरपुरमा बाँधको पानी वस्तीमा पसेको छ । गण्डकमा पानीको बहाव बढिरहेको भारतीय सञ्चार माध्यमले जनाएका छन् ।

बिहारका मुख्यमन्त्री नीतिश कुमारले आपतकालीन बैठक बोलाएका छन् । केन्द्र सरकारसँग बिहारले १० टुकडी उद्धारकर्ता सुरक्षाकर्मी माग गरेको छ । भारतीय सेनाले हेलिकोप्टर पठाएर बाढीमा परेकाहरुको उद्धार गरिरहेको छ ।

टिस्टाको पानी नखोल्न सिक्किमलाई पश्चिम बंगालको आग्रह

यसैवीच नेपालले सप्तकोशीका सबै ढोकाहरु खोल्न भारतलाई आग्रह गरिरहेकै बेला उता पश्चिम बंगाल सरकारले भने सिक्किम राज्य सरकारसँग टिस्टालगायतका नदीको अतिरिक्त पानी नखोलिदिन आग्रह गरेको छ ।

सिक्किमलाई पानी नखोल्न आग्रह गरिएको बताउँदै भारतीय पत्रिका हिमालय दर्पणले लेखेको छ- ‘उत्तर बंगलाको टिस्टा, तोर्सा, जलढाका र कालिन्दी नदीको नदीको पानीले खतराको सीमा नाघेको छ । राज्यको सिँचाइ विभागले सिक्किमलाई नदीहरुको अतिरिक्त पानी नछोड्ने अनुरोध गरेको छ ।’

शुक्रबारदेखि परेको अविरल वषर्ाका कारण पश्चिम बंगालको जलपाईगुडीमा रेलको लिकसमेत डुबेको छ । दार्जीलिङमा पहिरोमा परी दुई जनाको ज्यान गएको छ ।
पश्चिम बंगालको कोचबिहार र जलपाईगुडीमा पानीले सडकसमेत पूर्णरुपमा छोपिएको छ ।

पश्चिम बंगालमा शुक्रबार यता परेको पानीलाई सन् १९९३ यताकै ठूलो वषर्ा मानिएको छ । पहाडबाट आउने नदीहरुले थप क्षति पुर्‍याउन सक्ने भन्दै मुख्यमन्त्री ममता ब्यानर्जीले दिल्लीमा टेलिफोन गरेर हारगुहार गरिरहेको सञ्चारमाध्यमले जनाएका छन् ।

भारतको पश्चिम बंगाल, सिक्किम र बिहारका साथसाथै असाम, मेघालय, उत्तरप्रदेश, गजुरात, गोवा, उत्तराखण्ड, हिमाचल प्रदेश र जम्मु कश्मिरमा समेत भारी वर्षा भइरहेको त्यहाँका सञ्चार माध्यमले उल्लेख गरेका छन् ।

बाढीबाट जिउज्यानको क्षति धेरै नभए पनि प्रभावितको संख्या र खेती योग्य जमिन भने ठूलोमात्रामा नष्ट भएको छ । असाममा आएको बाढीले दशौं हजार भारतीय नागरिकहरु प्रभावित बनेको त्यहाँका सञ्चार माध्यमले लेखेका छन् ।

यसकारण डोक्लाम तनावमा नेपाल तटस्थ

२४ साउन, काठमाडौं । चीन–भारत सीमा क्षेत्रको तनावमा नेपालले पूर्णरूपमा तटस्थ रहने रणनीति लिएको छ । चीन–भारतबीच सन् १९६२ मा सीमायुद्ध हुँदा पनि नेपाल तटस्थ बसेको थियो । अहिले पनि दुई छिमेकी बीचको तनावमा सोही रणनीति अख्तियार गरेको छ ।

चीन, भुटान र भारतबीच डोक्लाम क्षेत्रमा देखिएको तनावमा नेपालले कुनै पक्षको समर्थन गरेको छैन । भारत र चीनबीचको सीमा विवाद शान्तिपूर्ण रूपमा समाधान होस् भन्ने पक्षमा नेपाल रहेको उपप्रधानमन्त्री तथा परराष्ट्रमन्त्री कृष्णबहादुर महराले बताए ।

 

‘डोक्लाममा देखापरेको चीन–भारत सीमा विवादमा नेपालको स्पष्ट नीति छ । यो विषय शान्तिपूर्ण कूटनीतिक तरिकाले वार्ताको माध्यमबाट समाधान होस् भन्ने चाहन्छौं । नेपालको दृष्टिकोण यही हो’, महराले भने ।महराले भारत र चीनबीच युद्ध होस् र युद्धको माध्यमबाट समास्याको हल खोजियोस् भन्ने पक्षमा नेपाल नरहेको स्पष्ट पारे ।

उनका अनुसार भारतीय वा चिनियाँ उच्चाधिकारी नेपाल आउँदा वा नेपालका उच्च पदाधिकारी भारत या चीन जाँदा डोक्लाम तनावबारे कुराकानी नगर्ने नीति सरकारले लिएको छ । ‘प्रधानमन्त्रीको ७ भदौदेखि ११ गतेसम्मको भारत भ्रमणमा डोक्लाम मुद्दामा छलफल हुँदैन । त्यस्तै, चिनियाँ उपप्रधानमन्त्री यहाँ आउँदा पनि त्यसबारे हामी कुरा गर्दैनौं । यो विवादमा हामी कसैको पक्ष लिँदैनौं’, महराले भने । आजको अन्नपूर्ण पोस्ट दैनिकमा खबर छ ।

भारतमा रहेका आफ्ना नागरिकलाई सचेत रहन चीनको अपिल

एजेन्सी । भारत र चीनबीचको सीमा विवाद उग्र बन्दै गएको छ । सीमा विवादलाई लिएर चीनले आफ्ना नागरिकका लागि परामर्श जारी गरेको छ ।

समाचार एजेन्सी पीटीआइका अनुसार चीनको दिल्लीस्थित दुतावासले भारतमा रहेका आफ्ना नागरिकलाई सचेत रहन आग्रह गरेको हो ।
चीनियाँ दुतावासका एक अधिकारीले पीटीआइलाई भने, यो यात्रा चेतावनी होइन, चीनका नागरिकलाई सचेत रहन सुझाव दिइएको हो ।

चीनले भारतमा रहेका आफ्ना नागरिकलाई सुरक्षाका हर उपाय अपनाउन र सचेत रहन भनेको हो । दुई देशबीच सिक्किमको डोकलाम क्षेत्रमा तनाव उत्पन्न भएको छ ।

प्रहरी अधिकारीको कुटेर हत्या

१० असार, श्रीनगर (भारत) । भारत अधिनस्थ काश्मिरमा रहेको एक मस्जिदको बाहिर गस्तीमा रहेका एकजना प्रहरी अधिकारीलाई आक्रोशित भीडले कुटेर हत्या गरेको समाचार छ ।

कैयौँको सङ्ख्यामा आएका व्यक्तिको कुटाईबाट ती प्रहरी अधिकारीको ज्यान गएको भारतीय प्रहरी स्रोतले शुक्रबार जानकारी दिएको छ ।

विवादित यस क्षेत्रमा यस घटनापछि तनाव झन बढेको छ । यसअघि केही समययतादेखि जारी रहेको हिंसाबीच शुक्रबार भएको यस घटनाले थप तनाव बढाएको छ ।

मोहमद आयुब पान्डित नामका ती प्रहरी अधिकारी मारिएपछि यस पहाडी क्षेत्रमा सुरक्षाबल र सर्वसाधारणबीच नै झडप सुरु भएको छ ।

प्रहरीद्वारा जारी विज्ञप्तिमा राज्य प्रहरी सञ्जालका उप निरीक्षक पन्डितको उत्तेजित भिडको आक्रमणको कारण हत्या भएको छ । आफ्नो कर्तव्य पालनाकै क्रममा उनको मृत्यु भएको प्रकाशित विज्ञप्तिमा जनाइएको छ ।

सन् १९४७ मा बेलायतको उपनिवेशबाट मुक्त भएपछि विभाजन भएका भारत पाकिस्तान दुबैले काश्मिर क्षेत्रलाई आफ्नो भूभागका रुपमा दावी गर्दै आएका छन् । रासस/एएफपी

दार्जीलिङः सर्बदलीय बैंठकमा भाजपा र कांग्रेस पनि, हड्ताल जारी राख्ने निर्णय

६ असार, काठमाडौं । दार्जीलिङमा आन्दोलनरत गोर्खा जनमुक्ति मोर्चाले आहृवान गरेको सर्बदलीय बैठकमा कांग्रेस र भारतीय जनता पार्टी पनि सहभागी भएको छ । साथै प्रहरी दमन नरोकिएसम्म आन्दोलन जारी राख्ने निर्णय पनि गरेको छ ।

 

मोर्चाले जिमखाना क्लबमा बोलाएको बैठकमा गोर्खा नेशनल लिबरेशन फ्रान्टका साथै भाजपा र कांग्रेस पनि सहभागी भएको छ । बैठकमा जन आन्दोलन पार्टीका नेता हर्कबहादुर क्षेत्रीले अड्ताल फिर्ता लिन र गोर्खाल्याण्ड टेरीटोरियल एडि्मनिस्ट्रेसन (जीटीए)बाट राजीनामा दिने प्रस्ताव राखेका थिए ।

तर, सर्बदलीय बैठकले केन्द्रीय सुरक्षा फौज फिर्ता नभएसम्म बन्द जारी राख्ने र जीटीए चुनाव बहिस्कार गर्ने निर्णय गरेको छ । साथै प्रधानमन्त्री नरेन्द्र मोदी र गृहमन्त्री राजनाथ सिंहलाई भेटेर आफ्नो एजेण्डा राख्ने सहमति जुटेको छ ।

साथै पश्चिम बंगाल सरकारले २२ जुनमा बोलाएको बैठकमा नजाने सहमति पनि बैठकमा भएको छ ।

गोर्खाल्याण्ड राज्यको माग गर्दै गोर्खा जनमुक्ति मोर्चाले सुरु गरेको आन्दोलन मंगलबार नवौं दिन पनि जारी रहृयो । आन्दोलनका क्रममा तीन जनाको मृत्यु पनि भइरहेको छ ।

सर्बदलीय बैठकले सबै पार्टीको सहभागिता रहने संयन्त्र बनाउने र अर्को बैठक २४ तारिखमा गर्ने निर्णय पनि गरेको छ ।

गोर्खाल्याण्ड आन्दोलनबाट डरायो सरकार, दार्जिलिङका सबै सञ्चारमाध्यम बन्द

इलाम, ६ असार । अलग गोर्खाल्याण राजयको माग गर्दै पश्चिम बंगालको दार्जिलिङ र आसपासमा निरन्तर भइरहेको अनिश्चितकालीन बन्द र प्रदर्शनपछि बंगाल सरकारले इन्टरनेट प्रदायक कम्पनीलाई पत्र लेखेरै सेवा बन्द गर्न निर्देशन दिएको छ ।

इन्टरनेट बन्द भएपछि सामाजिक सञ्जाल प्रयोगकर्ता र कतिपय सेवा प्रदायक समेत मारमा परेको गोर्खा जनमुक्ति मोर्चाका सहसचिव विनय तामाङले जानकारी दिनुभयो । उहाँले बंगाल सरकारको सो कदमलाई ‘राज्य आतंक’ को संज्ञा दिनुभएको छ । अन्नपूर्ण पोष्ट दैनिकले समाचार छापेको छ ।

बंगाल सरकारले इन्टरनेटको कारण हिंसा भड्कने भन्दै सेवा बन्द गर्न निर्देशन दिएको हो। बंगाल सरकारको पहाड तथा गृह मामिला विभागले पत्रप ठाएर सेवा बन्द गर्न लगाएको हो ।

आन्दोलनकारीले फोटो र भिडियो मार्फत सूचना प्रवाह गरेको बंगाल सरकारको विश्लेषण पछि सेवा बनद गरेको हो । शनिबार प्रदर्शनकारी र बंगाल प्रहरीबीच भएको भिडन्तमा तीन जनाको मृत्यु भएको खबरलाई अवेरसम्म प्रशासनले लुकाएपछि मोर्चाका कार्यकताले भिडियो र तस्बिर सार्वजनिक गरेका थिए। त्यसपछि मात्र प्रशासनले तीन जनाको मृत्यु भएको स्वीकार गरेको थियो ।

बंगाल सरकारले दार्जिलिङर आसपासमा आइतबारसम्म तीनजना भन्दा बढी भेला नहुन आदेश दिए पनि दैनिक प्रदर्शन भइरहेको छ । सोमबार पनि दार्जिलिङका विभिन्न स्थान, कालेबुङ खरसाङमिरिक लगायतका सहरमा मौन जुलुस निस्केको मोर्चाकी नेतृ निरा शर्माले जानकारी दिनुभयो ।

बंगाल प्रहरीले बिहीबार बिहान गोर्खा जनमुक्ति मोर्चाका अध्यक्ष एवम् गोर्खा टेरीटोरीयल एडमिनिस्टेटीव(जिटिए) प्रमुख विमल गुरुङको दार्जिलिङस्थित घर र कार्यालयमा छापा मारेर तोडफोड गरेपछि भड्किएको आन्दोलनमा प्रहरीले हस्तक्षेप गर्दा शनिबार तीन जनाको मृत्यु भएको थियो ।

मोर्चाको आव्हानमा चलो पातलेवाँस अभियानको दोस्रो दिन मोर्चाको नारी मोर्चाले निकालेको डण्डी मोर्चामा प्रहरीले हस्तक्षेप गरेपछि भड्किएको मोर्चाका कार्यकर्ताले ढुङ्गा प्रहार गरेपछि प्रहरीले दार्जिलिङको विजनवारी नजिक प्रहरीले गोली चलाउँदा तीन जनाको मृत्यु भएको थियो । मृतकको नाममा सहरका विभिन्न स्थानमा विद्यार्थी मोर्चाले केण्डील जुलुस निकालेको मोर्चाकी कार्यकर्ता अनिता बस्नेतले जानकारी दिनुभयो ।

आन्दोलन चर्किएपछि बंगाल सरकारले स्थानीय टेलिभिजन च्यानल बन्द गराएको छ । बंगाल सरकारले हिमाली, डि टीभीलगायतका स्थानीय च्यानल बन्द गराएको छ। बंगाल प्रहरीले पत्रकार विक्रम राईलाई यस अघि पक्राउ गरिसकेको छ ।

आकाशमै जन्मियो बच्चा !

एजेन्सी । साउदी अरबको दम्मासबाट भारतको कोच्ची आउँदै गरेको जेट एयरवेजको विमानमा एक महिलाले बच्चा जन्माएकी छिन् । विमान आकाशमै छँदा महिलालाई सुत्केरी व्यथा लागेको थियो ।

जेट एयरवेजका अनुसार विमान ३५ हजार फिट उचाइमा उडिरहँदा बच्चाको जन्म भएको थियो । त्यसपछि विमानलाई मुम्बइ एयरपोर्टमा आकस्मिक अवतरण गरिएको बीबीसीले जनाएको छ । मुम्बइमा अवतरणपछि आमा र बच्चा दुबलाई होली स्पिरिट अस्पतालमा भर्ना गरिएको छ ।

जेट एयरवेजले ति बच्चालाई आजीवन जेट एयरवेजमा यात्रा गर्न शुल्क नलिने घोषणा गरेको छ ।जेट एयरवेजले एउटा फ्रि पास जारी गरेको छ जसको प्रयोगबाट उनले आजीवन जेट एयरवेजमा निशुल्क उड्न पाउनेछन् ।

टर्की एयरलाइन्सको एक विमानमा पनि गएको अप्रिल महिनामा एक महिलाले बच्चा जन्माएकी थिइन् ।  जेट एयरवेजमा भने यो पहिलो घटना हो ।