Home / अन्तर्राष्ट्रिय खबर

अन्तर्राष्ट्रिय खबर

टर्कीमा बस दुर्घटना, ११ को मृत्यु ४६ घाइते

इस्तानबुल — टर्कीमा भएको एउटा बस दुर्घटनामा ११ को मृत्यु भएको छ । उक्त घटनामा अन्य ४६ जना घाइते भएका छन् । घाइतेमध्ये केहीको अवस्था चिन्ताजनक जनक भएकोले मृतकको सङ्ख्या बढ्न सक्ने पनि अनुमान गरिएको छ ।

 

यात्रामा गइरहेको बस एक रुखसँग ठोक्किएर दुर्घटनामा परेको स्थानीय अधिकारीले जानकारी दिएका छन् ।
राजधानी अङ्कराबाट पश्चिमतर्फ पर्ने सहर बुर्सातर्फ गइरहेको रात्रि बस दुर्घटना भएको जनाइएको छ ।

कमाण्डरसहित छ तालिबानको मृत्यु

जलालाबाद — पूर्वी अफगान प्रान्त नान्गाहारमा तालिबान आतङ्ककारी समूह लुकेर बसेको स्थानलाई लक्ष्यगरी गरिएको हवाई कारबाहीमा एकजना कमाण्डरसहित छ जना तालिबान आतङ्ककारी मारिएका छन् । नान्गाहारको प्रान्तीय सरकारले बुधबार प्रेस विज्ञप्ति निकालेर जानकारी दिएको हो ।

 

अफगान गुप्तचर निकायले दिएको सूचनाको आधारमा खोगीआनी जिल्लामा मङ्गलबार साँझ तालिबान आतङ्ककारी लुकेर बसेको स्थानमा लक्ष्य गरेर हवाई कारबाही गरिएको विज्ञप्तिमा जनाइएको छ । कारबाहीको क्रममा एकजना कुख्यात तालिबान कमाण्डर मोहिदुल्लाह आलिज यासेरसहित छ आतङ्ककारीको घटनास्थालमा नै मृत्यु भएको पनि विज्ञप्तिमा जानकारी दिइएको छ ।
कारबाहीको विषयमा हालसम्म तालिबान आतङ्ककारी समूहको तर्फबाट भने कुनै टिप्पणी आएको छैन ।

ट्यांकर डुब्दा ३२ को ज्यान गयो

बेइजिङ — चीनको पूर्वी सामुद्रिक क्षेत्रमा एक सातादेखि जलिरहेको इरानी तेल ट्यांकर आइतबार डुबेपछि चालक दलका ३२ सदस्यको मृत्यु भएको इरानी अधिकारीले जनाएका छन् । चालक दलमा ३० इरानीसहित २ बंगलादेशी नागरिक थिए ।

 

चिनियाँ सेन्ट्रल टेलिभिजनका अनुसार उक्त ट्यांकर आइतबार भएको ठूलो विस्फोटलगत्तै डुबेको हो । टेलिभिजनका अनुसार ट्यांकर डुब्नुअघि भएको विस्फोटका कारण करिब १ किलोमिटर माथिसम्म आगो फैलिएको थियो । सान्ची नामक उक्त पानीजहाज चीनको सांघाईबाट २ सय ६० किलोमिटर टाढा एक कार्गो जहाजसँग ठोकिएको थियो । ट्यांकरले १ लाख ३६ हजार टन कच्चा तेल बोकेको थियो । १३ सामुद्रिक डुंगाको सहायताले इरानी कमान्डोले १० दिनदेखि आगलागी नियन्त्रणका लागि जारी राखेको प्रयास खराब मौसमका कारण असफल भएको हो । इरानी समूहका प्रवक्ता मोहम्मद रस्तादले भने, ‘अब कसैलाई जीवितै फेला पार्ने आशा सकिएको छ ।’
यसअघि शनिबार उद्धारकर्ताहरूले दुई जनाको शव भेटेका थिए । तर विषालु धूवाँ तथा उच्च तापक्रमका कारण उनीहरूले हतारमा पानीजहाजको ‘ब्याल्क बक्स’ लिएर फर्किएको जनाए ।
सान्ची पनामाले इरानसँग भाडामा लिएर चलाएको थियो । उक्त ट्यांकर इरानबाट दक्षिण कोरियातर्फ जाने क्रममा जनवरी ६ मा हङकङको सीएफ क्रिस्टलसँग ठोक्किएको थियो । क्रिस्टलका चालक दलका २१ सदस्यको भने सकुशल उद्धार गरिएको थियो ।
दुई जहाज ठोकिएलगत्तै सान्ची दक्षिण–पूर्वी क्षेत्रमा पर्ने जापानी टापु अमामी ओसिमातर्फ २ किलोमिटरभन्दा बढी बगेको थियो । उक्त ट्यांकरले जेटमा प्रयोग हुने तेल, पेट्रोल, डिजेल उत्पादन गर्न मिल्ने कच्चा तेल बोकेको थियो । दुर्घटनाको कारणहालसम्म थाहा हुन सकेको छैन । अधिकारीले घटनाबारेछानबिन भइरहेको जनाएका छन् ।

अमेरिकालाई इरानको चेतावनी १४ अधिकारीविरुद्ध प्रतिबन्धपछिको आक्रोश

तेहरान — इरानले अमेरिकाले आफ्नो न्यायपालिका प्रमुखमाथि प्रतिबन्ध लगाएर ‘लक्ष्मणरेखा पार गरेको’ आरोप लगाएको छ । अमेरिकाले शनिबार अयातुल्लाहा सदिक अमोलि–लारिजानीमाथि नयाँ प्रतिबन्ध लगाएको हो ।

इरानी विदेशमन्त्री मोहम्मद जवाद जरिफ

इरानी विदेश मन्त्रालयले उक्त कदमको कडा प्रतिकार गर्ने जनाएको छ । तर उक्त कदम के हुने भन्नेबारे भने मन्त्रलायले प्रस्ट पारेको छैन ।
अमेरिकी राष्ट्रपति डोनाल्ड ट्रम्पले इरानसँग सन् २०१५ मा भएको परमाणु सम्झौता अन्तिम एक पटकका प्रतिबन्ध लागू नगर्ने बताएका थिए । तर उनले १४ इरानीमाथि अधिकारको गलत प्रयोग गरेको भन्दै प्रतिबन्धको घोषणा गरेका हुन् ।
‘ट्रम्पको शत्रुतापूर्ण कदमले लक्ष्मणरेखा पार गरेको छ । यो अन्तर्राष्ट्रिय कानुनको पनि गम्भीर उल्लंघन हो ।’ विदेश मन्त्रलायले विज्ञप्तिमार्फत भनेको छ, ‘यसको इस्लामिक गणतन्त्रले पक्कै पनि गम्भीर प्रतिक्रियात्मक जवाफ दिनेछ ।’
मन्त्रलायका अनुसार ट्रम्पले ‘इरानी जनातामाथि निरन्तर रूपमा असफल शत्रुतापूर्ण व्यवहार गर्दै आएका’ छन् । यसअघि, इरानी विदेशमन्त्री मोहम्मद जवाद जरिफले वासिङ्टनले सम्झौताको पालना गरे मात्र इरानमाथि पनि सम्झौता पालना गर्न बाध्यात्मक स्थिति पैदा हुने चेतावनी दिएका थिए । ट्रम्पले युरोप र अमेरिकालाई ‘अन्तिम मौका’ दिने बताएका हुन् । २०१५ मा इरान र ६ शक्तिराष्ट्रबीच परमाणु सम्झौता भएको थियो । ट्रम्प प्रशासनले युरोपेली देशसँग उक्त सम्झौताविपरीत स्थायी प्रतिबन्धका लागि अनुरोध गर्दै आएको छ । उक्त सम्झौता सन् २०२५ मा सकिँदै छ ।
यसअघि शुक्रबार युरोपेली संघ (ईयू) ले अमेरिकालाई इरानी परमाणु सम्झौता नतोड्न आग्रह गरेको थियो । ईयूले उक्त सम्झौता क्षेत्रीय सुरक्षाका लागि निकै महत्त्वपूर्ण भएको उल्लेख गरेको थियो । बेलायत, फ्रान्स, जर्मनीलगायत युरोपेली संघका सदस्य राष्ट्रले इरानसँगको परमाणु सम्झौताप्रति समर्थन दोहोर्‍याउँदै आएका छन् । युरोपेली संघकी विदेश नीति प्रमुख फेडेरिका मोगेरिनीले शुक्रबार उक्त सम्झौता सकारात्मक
नतिजा ल्याइरहेको दाबी गरेकी थिइन् । उक्त सम्झौताअनुुसार आफ्नो परमाणु कार्यक्रमलाई सीमित तुल्याउने प्रतिबद्धता जनाएपछि इरानमाथिका प्रतिबन्ध हटाइएका थिए ।
ट्रम्पले भने उक्त सम्झौताको विरोध गर्दै आएका छन् । उनले ‘इतिहासकै खराब’ सम्झौता गरेको भन्दै पूर्वअमेरिकी राष्ट्रपति बाराक ओबामाको कडा आलोचना गर्ने गरेका छन् । बेलायती विदेशमन्त्री बोरिस जोन्सनले इरानलाई परमाणु अस्त्र हासिल गर्नबाट रोक्न उक्त सम्झौताभन्दा राम्रो अन्य नभएको तर्क गरेका छन् । उलने इरानलाई अन्तरमहादेशीय ब्यालेस्टिक क्षेप्यास्त्र कार्यक्रमसँग सम्बन्धित मुद्दामा जवाफदेही बनाउनुपर्नेमा जोड दिए ।

भारतमा बस दुर्घटना र आगलागीमा १३ को मृत्यु, १० जना घाइते

नयाँदिल्ली — भारतमा बस दुर्घटना र आगलागीमा परी १३ को मृत्यु भएको छ भने १० जना घाइते भएका छन् ।

 

दक्षिणी राज्य कर्नाटकमा पुल तर्दै गर्दा शनिबार तलाउमा बस खस्दा कम्तीमा आठ जनाको मृत्यु भएको छ । १० जना घाइते भएका प्रहरी अधिकारीहरुले जानकारी दिएका छन् । कर्नाटक राज्यको राजधानी बैङलुरुदेखि २५० किलोमिटर टाढा पर्ने हास्सान जिल्लामा दुर्घटना भएको हो । दुर्घटनामा परेको सरकारी बसमा चालक र सहयोगीसहित ५० जना यात्रु रहेका थिए ।
तिब्र गतिमा रहेको बसको चालकले नियन्त्रण गुमाउँदा दुर्घटना भएको प्रारम्भिक विवरणबाट देखिएको एक जना वरिष्ठ प्रहरी अधिकारीहरुले बताएका छन् ।
मृतकमध्ये दुई जना महिला छन् । घाइतेहरुलाई स्थानीय अस्पतालहरुमा भर्ना गरिएको छ । बैङलुरुबाट धर्मास्तला जादै गर्दा बस दुर्घटना भएको हो ।
यसैगरी, जयपुर सरहको विधानगर क्षेत्रमा एक आवासीय भवनमा शनिबार भएको एक आगलागीमा एक परिवारको पाँच सदस्यको मृत्यु भएको छ । ग्यास सिलिण्डर पड्किएर आगलागी भएको बताइएको छ । आगलागीको समाचार प्राप्त भएपछि आग्राको भ्रमणमा रहेका परिवार तीन सदस्य पनि जयपुर फर्किएका बताएको छ ।

सात वर्षीय बालिकाको बलात्कारपछि हत्याको विरोधमा देशव्यापी प्रदर्शन

स्लामावाद — पाकिस्तानका एकजना सात वर्षीया बालिकाको बलात्कारपछि गरिएको हत्याको विरोधमा पाकिस्तानमा देशव्यापी प्रदर्शन जारी रहेको समाचार छ ।

स्थानीय सञ्चारमाध्यमहरुकाअनुसार पञ्जाव प्रान्तकी वासिन्दा सात वर्षीया जाइनाबलाई गत जनवरी ५ मा ट्युसन पढ्न गइरहेको बेला अपरान्ह एक सङ्कास्पद व्यक्तिले अपहरण गरेको थियो ।
बालिकालाई अपहरण गरेको दृश्य सिसिटीभीको फुटेजबाट पत्ता लागेको थियो । त्यसपछि उनको शव उनलाई अपहरण गरिएको स्थानबाट एक माइल पर चार दिनपछि भेटिएको थियो ।
उनको शव फोहोरको कन्टेनरमा भेटिएको थियो । त्यसपछि उक्त घट्नाको विरोधमा पञ्जावमा आन्दोलन भएको थियो ।
हत्याराई भेटेर झुण्डाएर मार्नुपर्ने मागगर्दै पाकिस्तानका विभिन्न सहरमा दैनिकजसो विरोध हुदै आएको छ । प्रदर्शनकारीहरुले बालबालिकामाथि हुने गरेका यस्ता हिंसाको घट्नाका दोषीलाई कडाभन्दा कडा कारबाही माग गरिरहेका छन् ।
उनलाई बारम्बार बलात्कार गरेर हत्या गरिएको देखिएको प्रतिवेदन प्रहरीले दिएको थियो । त्यस घट्नाले पाकिस्तान स्तब्ध भएको बताइएको छ ।
हत्यारा पत्ता नलाग्दासम्म ती बालिकाको अन्त्येष्टि नगरिने उनका बुबाले अडान लिएका छन् । आज चौथो दिन पनि पाकिस्तानका विभिन्न सहरमा विरोध प्रदर्शन जारी छन् र उनीहरुले हत्यारा पत्ता लगाएर उसलाई कडाभन्दा कडा कारबाही गर्न माग गरिरहेका छन् ।

उत्तर कोरिया शीतकालीन ओलम्पिक खेलमा सहभागी हुने

सोल — उत्तर कोरियाले दक्षिण कोरियामा आयोजित शीतकालीन ओलम्पिक खेलमा आफ्नो सहभगिता रहने बताएको छ ।

दुई कोरियाबीच मंगलबार दक्षिण कोरियामा भएको वार्तापछि उत्तर कोरियाले सो जानकारी गराएको हो। उत्तर कोरियाले आफ्ना खेलाडी र प्रतिनिधिहरू फेबु्रअरीमा हुन लागेको सो शीतकालीन ओलिम्पिमा सहभागी हुन पठाउने भएको जनाएको हो।
सो खेलकूदमा उत्तर कोरियाले पठाउने भनिएको उक्त टोलीमा खेलाडी, प्रतिनिधि र समर्थकका साथै अन्य नागरिक पनि हुने उत्तर कोरियाको वार्ता टोलीका एकजना सदस्यले सोलमा जानकारी दिएका छन्।
उत्तर कोरिया र दक्षिण कोरियाका उच्च अधिकारीहरूबीच सन् २०१५ पछि अर्थात दुई वर्षयता पहिलोपटक वार्ता भएपछि यो घोषणा भएको हो।
मङ्गलबार भएको उनीहरूको छलफलमा विशेषगरी यसै खेलकूदका विषयमा बढी कुराकानी भएको थियो। छलफलका विषयवस्तुहरुको सीमितता रहेको बताइएको छ।
उनीहरूको छलफल दक्षिण कोरियामा हुने भनिएको उक्त शीतकालीन ओलिम्पिकमा उत्तर कोरियाका खेलाडीहरूलाई कसरी सहभागी गराउने भन्नेबारे बढी मात्रामा केन्द्रित भएको थियो।
यी दुई देशबीचको वार्ता दक्षिण कोरियाको अधिनमा रहेको दुई कोरियाली सीमा क्षेत्रमा अवस्थित पानुमजोम नगरमा भएको हो।
यस बैठकको निष्कर्षका बारेमा केही बताइएको छैन। तर उत्तर कोरियाले भने सो खेलकूदमा सहभागी हुने जानकारी सुरुमै गराएकोले वार्ताको वातावरण राम्रो बनेको बताइएको थियो।

पेरुमा सडक दुर्घटनामा ४८ को मृत्यु

लिमा — पेरुमा एक ट्रक र यात्रुवाहक बस एक आपसमा ठोक्किदा भएको दुर्घटनामा परी कम्तीमा ४८ व्यक्तिको मृत्यु भएको छ ।
पेरुको राजधानी लिमाबाट १३० किलोमिटर उत्तरमा रहेको हुआचोबाट यात्रा सुरु गरेको सो बसमा चालक र सहयोगीसहित ५५ जना यात्रु सवार थिए ।
दुर्घटनापछि सो बस एक सय मिटर गहिराइमा झरेको बताइएको छ । गृह मन्त्रालयले आफ्नो वेबसाइटमार्फत यस घटनामा ४८ जनाको ज्यान गएको पुष्टि गरेको प्राप्त समाचारमा जनाइएको छ ।
पेरुका राष्ट्रपति पेड्रो पाब्लो कुन्स्किले यस घटनामा ज्यान गुमाएकाहरुप्रति श्रद्धाञ्जलि अर्पण गर्दै उनीहरुका परिवारजनप्रति समवेदना व्यक्त गरेका छन् ।
यस घटनाले आफूलाई अन्त्यतै दुःखी बनाएको पनि उनले बताएका छन् । यस घटनाबाट सात जनालाई भने जिवीतै उद्धार गरिएको थियो । पेरुको नौसेनाले अन्य उद्धारकर्ताको सहयोगबाट उद्धारकार्य जारी राखेको बताएको छ ।
यस घटनामा घाइते भएका व्यक्तिहरुलाई पनि नजिकैको अस्पतालमा उपचारको लागि लगिएको बताएको छ । पेरुमा सन् २०१६ मा भएको सडक दुर्घटनामा दुई हजार ५०० व्यक्तिको मृत्यु भएको सरकारी तथ्याङ्कले देखाएको छ ।
उद्वारकार्यलाई सशक्त बनाउन राष्ट्रपति पाब्लोले निर्देशन दिएका छन् । यसका लागि पेरुको नौसेना लागिपरेको छ ।
त्यस्तै यहाँको प्रहरीले पनि हेलिकोप्टरको माध्यमबाट उद्वारकार्य जारी राखेको जनाएको छ ।
निकै तीब्र गतिमा आएको बस ट्रकसँग ठोक्किएपछि सडक किनारबाट समुद्री तटमा खसेको थियो । दुर्घटनास्थल निकै अप्ठरो भएकोले उद्वारकार्य पनि गाह्रो भएको बताइएको छ ।

अफगानिस्तानमा ६० आईएस मारिए

जलालाबाद — अफगानिस्तानको पूर्वी प्रान्त नान्गाहारमा सरकारी सुरक्षाफौजले मंगलबार गरेको कारबाहीमा कम्तीमा ६० इस्लामिक स्टेट (आईएस) विद्रोही मारिएका छन् ।

अधिकारीका अनुसार विद्रोहीहरु लुकेर बसेको स्थान पहिचान गरी बिहानै गरिएको हवाई कारबाहीको उनीहरुको मृत्यु भएको हो ।
प्रान्तीय सरकारका प्रवक्ता आताउल्लाह खोगिआनीले कारबाहीका क्रममा १८ जना घाइते भएको जनाएका छन् । उनका अनुसार कारबाहीका क्रममा एक सर्वसाधारण मारिएको र अन्य १३ घाइते भएका छन् ।
आईएस संगठनले भने घटनाबारे हालसम्म कुनै प्रतिक्रिया जनाएको छैन ।

सिड्नीमा सामुन्द्रिक विमान दुर्घटना, ६ को मृत्यु

अष्ट्रेलिया — आइतबार सिड्नीको दक्षिणी क्षेत्रमा भएको सामुन्द्रिक विमान दुर्घटनामा पाईलट सहित ६ जनाको मृत्यु भएको छ । मृत्यु हुनेमा विश्वको प्रख्यात र ठुलो हस्पिटालिटी कम्पनी ‘कम्पास’का प्रमुख रिचार्ड कुसन सहित ११ वर्षीया बालिका समेत रहेका छन् ।

 

मृत्यु हुनेमा बेलायतबाट छुट्टी मनाउन अष्ट्रेलिया कुसन सहित उनकी साथी, दुई छोरा, एक छोरी र बिमानका चालक छन् । सिड्नीको दक्षिणी क्षेत्र कटेज पोइन्टबाट आइतबार साँझ उडेको केही समयमा नै उनीहरु सवार जहाज सोही स्थानको होकस्बरी नदीमा दुर्घटना भएको हो । उनीहरु सवार सामुन्द्रिक जहाज अहिले पनि विश्वमा सबैभन्दा धेरै उडाईने जहाजमध्येमा पर्ने समाचारहरुमा उल्लेख गरिएको छ ।
मृत्यु भएका कम्पास कम्पनीका प्रमुख बेलायतमा उत्कृष्ट प्रमुख कार्यकारीका रुपमा प्रख्यात रहेको बताइएको छ । उनलाई हार्भड बिजनेस रिभ्युले उनलाई विश्वका १००औं प्रभावकारी कार्यकारी अधिकृतमा ११औं स्थानमा राखेको थियो ।