Home / दुर्घटना

दुर्घटना

तीर्थयात्री सवार बस कागवेनीमा दुर्घटना, ५ जनाको मृत्यु

९ बैशाख, पोखरा । जोमसोमबाट मुक्तिनाथ जाँदै गरेको तीर्थयात्री सवार बस कागबेनीमा दुर्घटना हुँदा ५ जनाको मृत्यु भएको छ ।

 

शनिबार बिहान मुस्ताङ सदरमुकाम जोमसोमबाट मुक्तिनाथका लागि छुटेको ना. ५ ख ६०६७ नम्बरको बस कागबेनी भन्दा दुई किलोमिटर अगाडि दुर्घटना भएको हो । दुर्घटनामा ११ जना भन्दा बढी घाइते भएका छन् ।

मृत्यु भएकाहरुको पहिचान खुल्न नसकेको जिल्ला प्रहरी कार्यालय मुस्ताङले जनाएको छ । घटनाको खबर पाउने बित्तिकै जिल्ला प्रहरी कार्यालयबाट प्रहरीको टोली उद्धारका लागि घटनास्थल पुगेको प्रहरी नायब उपरीक्षक हरिहर योगीले जानकारी दिए ।

२६ जना सवार बसमा अन्य सामान्य घाइते भएको छन् । ‘घाइते सबैलाई उपचारका लागि जिल्ला अस्पताल ल्याइदैछ, दुर्घटनास्थलमा डोजरको सहायताले बस र शव उठाउने काम भइरहेको छ’ उनले भने ।

गुर्जुधारामा ठूलो दुर्घटना, ब्रेक फेल भएको ट्रकले चार सवारी साधनलाई हान्यो

४ चैत, काठमाडौं । थानकोट-कलंकी सडकखण्डको गुर्जुधारामा ठूलो दुर्घटना भएको छ । प्रहरीका अनुसार कलंकीतर्फ आउँदै गरेको ट्रकले ट्याक्सी, मोटरसाइकलसहितका सवारीलाई ठक्कर दिएको छ । ब्रेक फेल भएपछि ट्रकले अरु सवारीलाई ठक्कर दिएको थियो ।

 

थानकोट वृत्तका डीएसपी कृष्ण पंगेनीका अनुसार काठ बोकेर आएको ना ३ ख ९७७३ नम्बरको ट्रकले सडकमा रहेका स्कुटर, मोटरसाइकल, वान टन ट्रक र ट्याक्सीलाई एकसाथ हानेको छ । दुर्घटनामा परी आठ जना घाइते भएको बताइएको छ ।

ब्रेक फेल भएर अनियन्त्रित भएको ट्रकले सुरुमा विजुलीको पोलमा हानेको र त्यसपछि सँगै रहेको स्कुटर, बा १ ज ७९६७ नम्बरको ट्याक्सीलाई ठक्कर दिएको हो । ट्रककै ठक्करबाट ट्याक्सी पछाडि रहेको मोटरसाइकलमा पनि क्षति पुगेको डीएसपी पंगेनीले बताए ।

ट्रकको ठक्करबाट वान टन ट्रकका चालक,  ट्याक्सी चालक र ट्याक्सीमा रहेका यात्रुसहित आठ जना घाइते भएका छन् । ट्याक्सी चालकको अवस्था गम्भीर रहेको डीएसपी पंगेनीले बताए ।

उनीहरुको वयोधा र ओम समाज अस्पतालमा उपचार भइरहेको छ । ट्रकका चालक फरार छन् भने केहीबेरअवरुद्ध भएको सवारी आवागमन सुचारु भइसकेको छ ।


तस्बिर: अनुराग अनन्त र शिवकुमार महर्जन

अपडेटः जाजरकोटमा बस दुर्घटना, २०को मृत्यु, दर्जनौं घाइते

२६ फागुन, जाजरकोट । जाजरकोटमा बिहीबार बस दुर्घटना हुँदा २० जनाको मृत्यु भएको छ भने दर्जनौं घाइते भएका छन् । बसमा करिब ५० जना यात्रु सवार थिए ।

 

जाजरकोटका प्रमुख जिल्ला  अधिकारी कृष्णचन्द्र पौडेलका अनुसार दुर्घटनामा मृत्यु हुनेको संख्या २० भन्दा बढी छ । दर्जनौं घाइते भएका मध्ये केहीको अवस्था चिन्ताजनक छ । उनीहरुलाई उपचारका लागि सेनाको हेलीकोप्टरबाट नेपालगञ्ज र काठमाण्डौं पठाइएको छ ।

बस सडकबाट करिब २ सय मिटर तल खसेको छ । जाजरकोटको खलंगाबाट पश्चिमी क्षेत्रमा पर्ने खारा भन्ने गाउँतर्फ जाँदै गरेको ना ३ ख २२७९ नम्बरको बस ओरालो बाटोमा अनियन्त्रित भई खोलामा खसेको हो ।

दुर्घटनास्थलमा जाजरकोटका प्रमुख जिल्ला अधिकारीसहित नेपाल प्रहरी, नेपाली सेना, सशस्त्र प्रहरीको टोली उद्धारमा खटिएका थिए ।

जाजरकोट पत्रकार महासंघका सचिव दिपेन्द्र शर्माका अनुसार दुर्घटनास्थल सदरमुकाम भन्दा ३/४ किलोमिटर टाढा भेरीमालिका नगरपालिका वडा नम्बर ४ मा पर्छ । बोहोरा गाउँको तल्लो मोहोडाको भीरबाट बस पासागाड खोलामा खसेको छ ।

बसमा यात्रुहरु बढी भएकाले ‘ओभर लोड’ हुन गई ओरालो घुम्तीमा अनियन्त्रित भएको शर्माले बताए ।

घटनामा धेरै जना हताहती भएको र उनीहरुको सनाखत नभएको शर्माले अनलाइनखबरलाई जानकारी दिए ।

पाल्पामा जन्ती बोकेको जिप दुर्घटनाः चारको मृत्यु, १६ जना घाइते

palpa-accident (1)

२५ माघ, पाल्पा । पाल्पाको दोभानमा जिप दुर्घटना हुँदा चार जनाको मृत्यु भएको छ भने १६ जना घाइते भएका छन् ।

ज्यामुरेबाट विवाह सकेर जन्तीको बाजा बजाउँने समूहलाई घर पुर्‍याउने क्रममा लु १ ज २६८९ नम्बरको जिप दोभानको श्रीडाँडामा दुर्घटना भएको हो ।

 

मंगलबार राति भएको दुर्घटनामा जसविर बकावल मगर, मिनबहादुर थापा मगर, हरि बहादुर राना र यमबहादुर रानाको मुत्यु भएको प्रहरीले जनाएको छ । मृत्यु हुने सबैजना दोभान २ देउरालीका हुन् ।

घाइतेको लुम्बिनी अञ्चल अस्पतालमा उपचार भईरहेको छ । १६ जना घाइतेमध्ये चार जनाको स्थिति गम्भीर रहेको प्रहरीले जनाएको छ ।
जिप सडकदेखि करिब तीन सय मिटर तल खसेको छ ।

अत्यधिक ओरालो भएका कारण ब्रेक फेल भएर दुर्घटना भएका हुनसक्ने प्रहरीको अनुमान छ ।

स्रोत : अनलाइन खबर

धादिङको खाल्टेमा बस दुर्घटना, १५ यात्रु गम्भीर घाइते

Dhading-Map

३ माघ, धादिङबेसी । धादिङको सदरमुकाम धादिङबेशीबाट खाल्टे गाविस जाँदै गरेको यात्रुबाहक बस पतेनी भन्ने स्थानमा दुर्घटना हुँदा १५ यात्रु गम्भीर घाइते भएका छन् ।

सोमबार साँझ करिब साढे ६ बजे खाल्टे गाविसको पतेनी भन्ने ठाउँमा बस दुर्घटना भएको हो । बस सडकबाट करिब २ सय मिटर तल खसेको स्थानीय शिक्षक विष्णु ढुंगानाले जानकारी दिए ।

 

घटनास्थलमा स्थानीयले उद्धार गरिरहेका छन् ।

घाइतेहरुको उद्धारमा जिल्ला सदरमुकाम धादिङबेशीबाट ६ वटा एम्बुलेन्स पुगेका छन् ।

नारायणगढ-मुग्लिन सडकखण्डमा यात्रुबस दुर्घटनाः एकको मृत्यु, २६ जना घाइते

chitawan-accident

१२ पुस, चितवन । चितवनको नारायणगढ-मुग्लिन सडकखण्डमा सोमबार राति भएको सावारी दुर्घटनामा  सिरहा लक्ष्मीपुरका धर्मराज मण्डलको मुत्यु भएको छ भने २६ जना घाइते भएको छन् ।

 

सडकखण्डको सबैभन्दा बढी दुर्घटना हुने क्षेत्र चण्डिभञ्जाङ ६ कालिखोलामा अनमोल डिलक्सको ना ४ ख ५४४२ नम्बरको को यात्रुबस सडकबाट १ सय मिटर तल झरेको जिल्ला प्रहरी कार्यालय चितवनका प्रमुख दिपक थापाले जानकारी दिए ।

काठमाडौंबाट मलंगवा जान लागेको बसले ट्रकलाई ओभर टेक गर्दा घटना भएको प्रहरीको प्रारपम्भिक अनुसन्धानले देखाएको ।

प्रहरीका अनुसार घाइतेमध्ये ३ जनाको अवस्था गम्भीर छ । घटना भएलगत्तै स्वयम् आफू घटनास्थलामा पुगि सबै घाइतेको उद्दार गरी थप उपचारा लागि भरतपुरको चितवन मेडिकल कलेज लगिएको थापाले वताएका छन् ।

गम्भीर घाइते भएका भारतको बिहार सितागढीका मनोजकुमार कुशहवा सर्लाहीका रामविश्वास पण्डित र नागेन्द्रराज यादवको स्थिति गम्भीर रहेको प्रहरीले जनाएको छ ।

स्रोत : अनलाइन खबर

दाङमा बस दुर्घटना तीन जनाको मृत्यु, २४ घाइते (अपडेट)

bus-accident-dang-585b94c236b2c6-48989171

दाङः दाङमा बस दुर्घटना हुदाँ तीन जनाको मृत्यु भएको छ । दुर्घटनामा परी सतबरीया गाविसका कृष्ण शाही, सौडीयार गाविसका ६० बर्षीय चित्रबहादुर श्रेष्ठ र प्यूठान खालागाउँका ३८ बर्षीय देउरी विकको मृत्यु भएको प्रहरीले जानकारी दिएको छ ।

घोराहीबाट बुटबल जाँदै गरेको लु २ ख ७७६ नम्बरको बस लमही–घोराही सडकखण्डको लक्ष्मीपुर १ मुसोट खोलाको उकालोमा दुर्घटना भएको हो । दुर्घटनाग्रस्त बस सडकबाट एक सय मिटर तल खसेको छ ।

दुर्घटनामा परी घाइते भएका दुई जनाको राप्ती उपक्षेत्रीय अस्पतालमा उपचारका क्रममा मृत्यु भएको प्रहरीले बताएको छ । अन्य एकजनाको भने स्थानीय प्राथमिक स्वास्थ्य केन्द्रमा मृत्यु भएको हो ।

दुर्घटनामा परी अन्य २४ जना घाइते भएका छन् ।

टिपरको ठक्करबाट मृत्यु

death-584ea9ec03dae0-67679997

कावासोतीः नवलपरासीको वेणीमणिपुर गासिव–६ सर्दीमा आज टिपरले मोटरसाइकललाई ठक्कर दिँदा स्थानीयवासी ३५ वर्षीय सुरेश काउछा मगरको मृत्यु भएको छ ।

इप्रका नयाँ बेलहानीका अनुसार दुम्किबास–सर्दी सडकखण्डकमा ना ११ प ९३८८ नं को मोटरसाइकललाई दर्ता नं नभएको नयाँ टिपरले ठक्कर दिँदा गम्भीर घाइते भएका मगरको मध्यविन्दु अस्पताल डन्डामा उपचारका क्रममा मृत्यु भएको प्रहरीले जनाएको छ । रासस

सहचालकले चलाएको बस होटलभित्र पस्दा दम्पत्तिको मृत्यु

accident-583d4b6a522429-56252922

दुई बर्षीया छोरी र १२ दिनको नवजात छोरा जीवित

जनकपुरधामः पूर्व पश्चिम लोकमार्ग अन्तर्गत धनुषाको लालगढमा बस दुर्घटना हुँदा दुई जनाको मृत्यु भएको छ । मिथिला नगरपालिका ९ लालगढको पूर्वेली होटलमा सोमबार राति काठमाडौँबाट राजविराज जाँदै गरेको बसका सहचालकले चलाएको ना ५ ख ३५९ नम्बरको बस दुर्घटनामा परेको हो ।

बसले ठक्कर दिदा सप्तरी राजविराज हर्दिया ७ का २६ वर्षीय रामकुमार मण्डल र उनकी श्रीमती २३ वर्षीया आनन्द देवीको मृत्यु भएको प्रहरीले जनाएको छ ।

यात्रुलाई खाना खान रोकेको अवस्थामा बसका सहचालकले बसलाई पार्किङ गर्न खोज्दा ब्रेक फेल भएर बस होटलको भवन भित्रै पसेको प्रत्यक्षदर्शीले बताएका छन् ।

गाडीबाट झरेर होटलमा खाना खाँदै गरेका दम्पत्तिलाई बसले किचेको हाे । दम्पत्तिको घटनास्थलमै मृत्यु भएको इलाका प्रहरी कार्यालय ढल्केवरले जनाएको छ ।

मृतक दम्पत्तिका दुई बर्षीया छोरी र १२ दिनको नवजात छोरा भने जीवित छन् । छोराछोरीलाई भुइँमा सुताएर खाना खादै गर्दा दम्पत्तिलाई गाडीले खिचेको थियो । मृत दम्पत्तिका नाबालक छोराछोरीलाई परिवारको जिम्मा लगाइएको प्रहरीले जनाएको छ ।

बस दुर्घटनामा अन्य सात जना घाइते भएका छन् । घाइते मध्ये सुनसरी वराहक्षेत्र ६ बस्ने १७ बर्षीय समीर थापा, मोरङ बरलवारी ४ का २८ बर्षीया सपना कोइराला, पर्सा घर भइ काठमाडौं बस्ने पिया श्रेष्ठलाई थप उपचारका लागि काठमाडौँ पठाइएको छ ।

अन्य घाइते सिरहा मिरचैया २ बस्ने अशोक कुमार महतो, सप्तरी दउरी मर्मा ५ बस्ने २६ बर्षीय ललित दास, सप्तरीको शम्भुनाथ ४ बस्ने २० बर्षीय सशी चौधरीको लालगढ मोडेल अस्पतालमा उपचार भइरहेको छ । घटनापछि चालक र सहचालक फरार छन् । प्रहरीले उनीहरुको खोजी भइरहेको बताएको छ।

नवलपरासीमा जिप दुर्घटना, ७ को मृत्यु, १८ घाइते

२ मंसिर, नवलपरासी । नवलपरासीको पहाडी गाविस बुलिङ्टार–८ बतासमा गएराति जिप दुर्घटना हुँदा सातजनाको मृत्यु भएको छ भने १८ जना घाइते भएका छन् ।

Jeep-Accidentप्रहरी चौकी बुलिङ्टारका अनुसारका दलदलेबाट डाँडाझेरीको छरछरे जाँदै गरेको ग१ज ३६३२ नंको जिप दुर्घटना हुँदा डाँडाझेरी छरछरेका २८ वर्षीय समन्ती बाचे, ५२ वर्षीय खिमबहादुर बाचे, ४२ वर्षीय लोकबहादुर बाचे, २२ वर्षीय दीपक फाल, ४० वर्षीय जयबहादुर बाचे, ४९ वर्षीय किशन बाचेको मृत्यु भएको छ । एक मृतकको सनाखत हुन सकेको छैन् ।

बुलिङ्टार चौकीमा गाउँको झगडाको विषयमा भएको घटनामा छलफल गरी फर्किएकाहरु दुर्घटनामा परेका हुन् । मान्छेको भीडमा जिपले ठक्कर दिँदा धेरैजना घाइते भएको र मृत्यु भएको हुन सक्ने अनुमान प्रहरीले गरेको छ । जिप सडकबाट करिब २०० मिटर तल खसेको छ ।

पहाडी भू–भाग भएकाले दुर्घटनालगत्तै घाइतेको उद्धार गर्न कठिनाइ भएको छ । आज बिहान मात्र घाइतेलाई चितवनको भरतपुर मेडिकल कलेज र नारायणी सामुदायिक अस्पतालमा ल्याइएको छ । मृतकको शव परीक्षणका लागि प्राथमिक स्वास्थ्य केन्द्र दुम्कौलीमा राखिएको छ । एउटै गाउँका मान्छेहरु दुर्घटनामा परी ज्यान गुमाएपछि छरछरे गाउँ शोकमा डुबेको छ ।

मृत्यु हुने र घाइते हुने गरी गाउँका अधिकांश घरका मान्छे दुर्घटनामा परेका छन् । जिप चालकसमेत गम्भीर घाइते भएका छन् । दुर्घटनास्थल पूर्वपश्चिम राजमार्गबाट ५० किलोमिटर उत्तरमा पर्छ ।