Home / दुर्घटना

दुर्घटना

संखुवासभा जिप दुर्घटनामा मृत्यु हुनेको संख्या छ पुग्यो ५ को सनाखत

संखुवासभा — जिप दुर्घटना हुँदा मकालु गाउँपालिकाका अध्यक्ष खड्गबहादुर कटुवालसहित ६ जनाको मृत्यु भएको छ । भोटखोला गाउँपालिकाको हटियामा पर्ने बरुण दोभानतर्फ गएको जिप दुर्घटनामा परेको हो ।

 

दुर्घटनामा समाजशास्त्री अर्जुन बस्नेत, इन्जिनियर सुदीप ढकाल, जिल्ला समन्वय समितिका सूचना अधिकृत सुभाषचन्द्र कुर्इंकेल, पाथीभरा हेदांनाका सुरेश राई र चालकको घटनास्थलमा मृत्यु भएको प्रहरी निरीक्षक बेदप्रसाद गौतमले बताए ।
दुर्घटनामा परेका सबैजनाको शव क्षतविक्षत छ । प्रमुख जिल्ला अधिकारी शिवराज जोशीका अनुसार सदरमुकाम खाँदबारीबाट गएको बा ५ च १३०९ नम्बरको जिप मकालु गाउँपालिका ३ मा पर्नेे सामाटार भन्ने स्थानमा आईतबार दिउँसो १२ बजे दुर्घटनामा परेको थियो ।
घटनास्थल भिरालो भएकाले घटना भएको ४ घण्टापछि ईलाका प्रहरी कार्यालय हेदांना र स्याक्सिला गोलाबाट आएका प्रहरीको सहयोगमा शव निकालिएको हो ।
जिप स्थानीय विकास मन्त्रालयअन्तर्गत केन्द्रिय आयोजना कार्यान्वयन ईकाईको रहेको प्रजिअ जोशीले बताए ।
भूकम्प पुनर्निर्माणसम्बन्धी तालिम दिन उनीहरु काठमाडौबाट आएका थिए । मृतकको शवलाई सदरमुकाम खाँदबारी ल्याइदैछ । जिप सडकबाट करिब ३ सय मिटर तल झरेको छ । घटनास्थल सदरमुकाम खाादबारीबाट कम्तिमा ७० किलोमिटर उत्तरमा पर्छ । जिप कसरी दुर्घटना भयो भन्ने बिषयमा जानकारी आएको छैन । यो सडक खण्डमा करिव २ महिना अघिमात्र ट्र्याक खोलिएको थियो ।

फिस्लिङ बस दुर्घटनामा हराएका तीनजनाको शव फेला, मृतकको संख्या १० पुग्यो

मंसिर २६, २०७४-पृथ्वी राजमार्गअन्तर्गत इच्छाकामना गाउँपालिका-३, फिस्लिङबाट त्रिशूली नदीमा बस खस्दा बेपत्ता तीन जनाको शव मंगलबार फेला परेको छ ।

उनीहरुको शव बस दुर्घटनाको दुई हप्तापछि मंगलबार त्रिशूलीका विभिन्न ठाउँमा भेटिएको जिल्ला प्रहरी कार्यालय चितवनले जनाएको छ । मंसिर १३ गते बिहान भएको घटनामा सातजना बेपत्ता भएका थिए । प्रहरी नायब उपरीक्षक प्रभुप्रसाद ढकालका अनुसार बेपत्ता भएका सन्धिखर्क–९ का दुर्गाबहादुर कार्की, अर्घाखाँची, खन नगरपालिकाकी मनिषा थापा र गैंडाकोट नगरपालिका–३ का विकास रेग्मीको शव भेटिएको हो । कार्की र थापाको शव घटनास्थलबाट केही तल र रेग्मीको शव मुग्लिनबाट नारायणगढतर्फको कालीखोला किनारमा फेला परेको हो । कार्की र थापासँगै अर्का सनाखत नभएका एक पुरुषको शव पनि फेला भेटिएको छ ।

प्रनाउ ढकाल अनुसार परिवारको निवेदनका आधारमा अझै ३ जना वेपत्ता छन् । बेपत्ता हुनेहरुमा गैंडाकोट-३ की कोपिला पोखरेल, अर्घाखाँचीकी हुमकला राहु मगर र अर्घाखाची रौनामैनाका शंकर कुँवर छन् । उनीहरुको खोजी जारी रहेको इलाका प्रहरी कार्यालय मुग्लिनका प्रहरी निरीक्षक धर्म केसीले बताए ।

घटनामा मृतकको संख्या १० पुगेको छ । घटनामा २२ जना घाइते भएका थिए ।

लु २ ख २९१ नं को उक्त बस काठमाडौंतर्फ जाँदै गरेको ना ६ ख ४९७२ नं को ट्रकमा ठोक्किएर अनियन्त्रित भई सडकबाट त्रिशूलीमा खसेको थियो ।

 

अामा त्रिशुलीमा हराइन्, ७ महिने छोरा बगरमा भेटिए बाबु साउदी अरबमा, जेठो छोरो अर्घाखाँचीमा एक्लै !

१४ मंसिर, चितवन । गाउँगाउँमा अस्पताल बनाउँछौं भन्दै नेताहरु भोट माग्न व्यस्त छन् । तर, जिल्लामै राम्रो अस्पताल भैदिएको भए अर्घाखाँचीकी २७ वर्षीया युवती मनिषा थापा ७ महिने शिशु बोकेर काठमाडौं धाउने थिइनन् । र, उनले त्रिशुली नदीमा डुबेर बेपत्ता हुनुपर्ने थिएन ।

 

अनलाइनखबरकर्मी विहीबार भरतपुरस्थित पुरानो मेडिकल कलेजको बच्चा वार्डमा पुग्दा त्यहाँ एक अवोध शिशु रोइरहेका थिए । उनी रहेछन् ३० जना यात्रु चढेको बस त्रिशुलीमा डुब्दा पनि दैवले बचाएका ७ महिने अपाङ्ग शिशु आर्यन थापा ।

बुधबार त्रिशुलीमा बस दुर्घटनाका परी घाइते भएका आर्यनलाई अस्पतालको आइसीयुबाट स्वास्थ्यमा सुधार भएपछि बच्चा वार्ड सारिएको छ । उनकी आमा मनिषा थापाको भने न त सास भेटिएको छ, न लास नै । उनी अझैसम्म त्रिशुलीको गर्तमै हराइरहेकी छिन् ।

बस भीरबाट नदीमा खसेपछि मनिषाले शिशुलाई गाडीबाट बगरमा फालेको हुन सक्ने उद्धारकर्ता सुरक्षाकर्मीहरुको अनुमान छ ।

ट्रकले दोहोर्‍याएर हान्यो !

त्रिशुलीमा बेपत्ता बनेकी अर्घाखाँचीकी मनिषा र घाइते अवस्थामा भेटिएका आर्यनका बारेमा कुरा गर्नुभन्दा पहिले बस कसरी त्रिशुली नदीमा खस्यो भन्ने सुनौं ।

अस्पतालमै भेटिएका बसका सहचालक सुनिलका क्षेत्रीका अनुसार बुधबार बिहान कलंकीबाट २६ यात्रुसहित छुटेको बसमा कलंकीबाट चार जना यात्रु थपिएका थिए ।

गाडीका दुईजना स्टाफ र ३० जना यात्रु बोकेको सो बस चुम्लिङटारको घुम्तीमा दुर्घटनामा पर्‍यो र त्रिशुलीमा खस्यो ।

बस बिहान ५ बजेर ३० मिनेट जाँदा कलंकीबाट छुटेको थियो । नौबिसेमा केहीबेर खाजा खान रोकियो । चालकले राम्ररी नै बस कुदाइरहेका थिए । बिहान ९ बजेतिर फिस्लिङ बजार कटेपछि ट्रकले हानेर दुर्घटना भयो ।

‘हामीभन्दा विपरीत दिशाबाट आएको ट्रकले अर्को ट्रकलाई ओभरटेक गर्ने क्रममा हाम्रो लेन मिच्यो’ सहचालक क्षेत्रीले अनलाइनखबरसँग भने, ‘बस ठिकै गतिमा थियो । तर, ट्रकले सिधै हाम्रो बसलाई हान्यो ।’

क्षेत्रीले भने, ‘ठोक्किएपछि ट्रक र बस दुबै रोकिएका थिए । तर, ट्रक फेरि पछाडि हट्यो र जोडले हाम्रो बसलाई हान्यो । पहिलो पटक हान्दा हामी सडकमै रोकिएका थियौं, दोस्रो धक्कामा बससहित हामी त्रिशुलीमा खस्यौं ।’

बस त्रिशुलीमा खस्दा ८ जनाको मृत्यु भएको छ । ३ जना हराइरहेका छन् । बाँकी यात्रुहरु घाइते बनेका छन् । उनीहरुको विभिन्न अस्पतालमा उपचार भइरहेको छ ।

मनिषा र आर्यनको कथा

बस दुर्घटनामा परेर घाइते बनेका ७ महिने शिशु आर्यनको अवस्थामा सामान्य सुधार आए पनि आमा मनिषाको भने अझै अत्तोपत्तो छैन ।

अस्पतालमा बच्चाको हेरचाह र उपचारका लागि आर्यनकी ठूलीआमा विष्णु थापा भरतपुर आएकी छिन् । मनिषाका दाजु गोपाल आर्चाय पनि भाञ्जालाई हेर्न अस्पताल आइपुगेका छन् ।

आर्यनका मामा गोपाल आर्चायले अनलाइनखबरसँग भने- ‘बाबु त ठीक छन् तर, आमाको अवस्था अझैसम्म थाहा हुन सकेन ।’

दूधे बालक आर्यन र उनकी आमा मनिषा अर्घाखाँची निवासी हुन् । आमाको काखमा लुटुपुटु गरेर हुर्किइरहेका यी दूधे बालक आमाको ममताबाट छुटेका छन् ।

आफन्तका अनुसार मनिषा छोराको उपचारका लागि काठमाण्डौं आएकी थिइन् । उनी यसअघि पनि छोराको उपचारका लागि काठमाण्डौं आउने-जाने गर्दै आएकी थिइन् ।

आर्यन जन्मजात अपाङ हुन् । उनको खुट्टामा समस्या छ । काठमाण्डौंमा उपचार गराइरहेकी मनिषा चिकित्सकको सल्लाहअनुसार फलोअपका लागि काठमाण्डौं आएर घर र्फकने क्रममा दुर्घटनामा परेकी हुन् ।

‘एक महिनासम्म काठमाण्डौंमा राखेर समेत उनले उपचार गराएकी हुन्,’ मनिषाकी जेठानी बिष्णु थापाले अनलाइनखबरसँग भनिन्, ‘यसपटक पनि बाबुकै चेकअपका लागि उनी काठमाडौं गएकी हुन् ।’

पति साउदीमा, जेठो छोरो घरमा एक्लै

मनिषाका श्रीमान अर्थात् घाइते शिशु आर्यनका बुबा सुन्दर थापा बैदेशिक रोजगारीको सिलसिलामा साउदी अरबमा छन् । उनी छुट्टीमा नेपाल आएर सात महिनाअघि मात्रै साउदी फर्केका हुन् । कान्छो छोराको काठमाडौंमा उपचार गर्नका लागि सुन्दरले साउदीबाट खर्च पठाउँदै आएका थिए ।

अर्घाखाँचीस्थित घरमा मनिषा र सुन्दरका ९ बर्षे छोरा छन् । भाइ र आमा कतिबेला काठमाडौंबाट फर्केलान् भनेर हेर्दाहेर्दै उनका आँखा टट्टाएको आफन्त बताउँछन् ।

त्रिशुलीमा तीनजना अझै वेपत्ता

दूधे बालककी आमा मनिषा थापासहित अन्य दुईजना त्रिशुलीमा अझैसम्म वेपत्ता छन् । उनीहरुको विहीबार दिनभरि खोजी गरिए पनि फेला पार्न नसकिएको जिल्ला प्रहरी कार्यालय चितवनका प्रमुख एसपी दीपक थापाले अनलाइनखबरलाई जानकारी दिए ।

वेपत्ता हुनेमा अर्का एक दुर्गाबहादुर कार्कीको पहिचान भएको छ । अर्को एक व्यक्तिको भने परिचय खुल्न सकेको छैन ।

‘गोताखोरहरुले समेत पानीभित्र पुगेर खोजी गरे, तर भेटिएन’, प्रहरी प्रमुख थापाले भने, ‘गाडीलाई माथि निकाल्ने प्रयास गर्दासमेत डोरी चुँडिएर निकाल्न सकिएन । शुक्रबार फेरि बिहानैदेखि प्रयास गर्नेछौं ।’

दुर्घटनामा परेर हराएका तीनमध्ये कोही बसले च्यापिएका हुन सक्ने प्रहरीको अनुमान छ । बस खसेको ठाउँ निकै अप्ठ्यारो भएकाले निकाल्न असहज भएको एपसी थापाको भनाइ छ ।

source : onlinekhabar

धादिङमा मोटरसाइकल दुर्घटना हुँदा २ को मृत्यु

११ मंसिर, धादिङ । धादिङको त्रिपुरासुन्दरी गाउँपालिका- १ सल्यानटारमा सोमबार बिहान मोटरसाइकल दुर्घटना हुँदा दुई जनाको मृत्यु भएको छ ।

 

बा ७९ प ७२७ नम्बरको मोटरसाइकल दुर्घटना हुँदा त्रिपुरासुन्दरी गाउँपालिका २ सल्यानटारका २६ वर्षीय भुवन पाण्डे र ३० वर्षीय जितेन्द्र अधिकारीको मृत्यु भएको जिल्ला प्रहरी कार्यालय धादिङले जनाएको छ ।

मोटरसाइकल सडकभन्दा करिब १० मिटर तल खसेको छ । दुर्घटनाको कारण भने खुलेको छैन ।

रुकुम जिप दुर्घटना : विवाह गरेको तीन दिनमै प्रहरी दम्पतीको मृत्यु भलिबलका राष्ट्रिय रेफ्री जनक शाह र एकै परिवारका ३ जनाको मृत्यु

यही मंसिर ६ गते वैवाहिक बन्धनमा बाँधिएका नेपाल प्रहरीका प्रहरी निरीक्षकद्धय नवीन श्रेष्ठ र अनिता प्रधान ।

मंसिर ९, २०७४-सिस्ने गाउँपालिका-६, का २९ वर्षीय नवीन श्रेष्ठ र इटहरी उपमहानगरपालिका-१७ बालग्रामकी अनिता प्रधानको पेसा एउटै, नेपाल प्रहरी । दुवैको दर्जा पनि उही प्रहरी निरीक्षक । नवीन ६ नम्बर प्रदेशको सुर्खेतमा कार्यरत थिए भने अनिता प्रदेश २ को रौतहटमा कार्यरत थिइन् ।

नवीनले सुर्खेतमा ट्राफिक प्रमुखको जिम्मेवारी भर्खरै सम्हालेका थिए भने अनिता जिल्ला प्रहरी कार्यालय रौतहटमा कार्यरत थिइन् । केही वर्ष अघिदेखि चिनजानमा रहेका उनीहरुको मंसिर ६ गतेयता पेसामात्रै एउटै भएन घर, परिवार र मन मुटुसमेत एउटै भयो । मातीघर बालग्राममै मंसिर ६ गते बुधबारका दिन बिहे गरेका दम्पती रुकुम पूर्वस्थित सिस्ने गाउँपालिका–६, रुकुमकोटमा रहेको घर भित्रिन र खुसी साट्न पुगेका थिए । उनीहरुको वैवाहिक जीवन सुरुआत भएको ३ दिन र घरमा हाँसीखुसी साथ टिकाटाला गरेर फर्केको ३ घन्टा नपुग्दै सँगै संसार त्यागेका छन् । एउटै पेसा, एउटै घर बनाएका प्रहरी निरीक्षक दम्पतीको चिता पनि एउटै बन्ने छ ।

शुक्रबार रुकुम पूर्वका सदरमुकाम रुकुमकोटबाट रुकुम पश्चिमको सदरमुकाम खलंगा आउँदै गर्दा भएको जिप दुर्घटनामा प्रहरी नवविवाहित दम्पतीसहित अन्य ५ जनाको मृत्यु घएको छ । ग १ ज ४२६० नम्बरको जिप मुसीकोट नगरपालिका–६ को कालिमाटीमा दुर्घटना हुँदा नवीनको घटनास्थलमा र अनिताको उपचारको लागि जिल्ला अस्पताल सल्ले लिँदै गर्दा बाटोमा मृत्यु भएको हो । विहेपछि माइतीघरबाट बिदा गरी घरतर्फबाट पनि बिदा भएर कार्यक्षेत्र फर्कन भनेर उनीहरु बेलुकी रुकुमकोटबाट गाडी चढेका थिए ।

माइतीघरबाट ७ गते बेलुका मात्रै घर पुगेका उनीहरु ८ गते दिउँसो घरपरिवार र आफन्तसँग टिकाटालो गरेर गाडीमा रुकुम पश्चिमको सदरमुकाम खलंगा फर्केका हुन् । उनीहरु विहेको टिका खस्न नपाउँदै दुर्घटनामा परेका हुन् ।

एकै परिवारका ३ जना 

दुर्घटनामा प्रहरी निरीक्षक श्रेष्ठका अन्य आफन्तको पनि मृत्यु भएको छ । मुसीकोट नगरपालिका–१, मठका शेरबहादुर श्रेष्ठ, उनकी छोरी सुरेखा शाह र छोरा सुधन श्रेष्ठको पनि घटनास्थलमै मृत्यु भएको छ । शेरबहादुरका माइती पक्षका जनक शाहको पनि मृत्यु भयो भने त्रिवेणी गाउँपालिका–१, की यमुना मल्लको पनि घटनास्थलमै मृत्यु भएको छ । जनक भलिबलका पूर्वराष्ट्रिय खेलाडी तला हालका राष्ट्रिय रेफ्री हुन् । सुरेखा र यमुना भोलि हुने प्रतिनिधि तथा प्रदेशसभा सदस्यको निर्वाचनको निम्ति मुसीकोट नगरपालिका–७, को जनजागृति माविको ‘क’ मतदान केन्द्रमा खटिएका थिए । दिनभर मतदान केन्द्र निर्माणमा जुटेका उनीहरु बेलुका घर फर्कनलाई सोही गाडीमा चढेका थिए । उनीहरु चढेको केही मिनेटमै गाडी दुर्घटना भएको हो ।

गाडी दुर्घटनाबारेमा केही खुल्न नसकेको जिल्ला प्रहरी प्रमुख प्रहरी नायव उपरीक्षक राजेन्द्रप्रसाद धमलाले बताए । उनका अनुसार दुर्घटनाको कारणबारे अनुसन्धान भइरहेको छ । दुर्घटना परेर घाइते चालक तुलसीपुर उपमहानगरपालिका–१६, प्रेम थापा, सहचालक बाँफिकोट गाउँपालिका रुकुम पश्चिमका प्रेम केसी र अर्का यात्रु बर्दियाका टेकबहादुर खत्रीको नेपालगञ्जको कोहलपुरस्थित शिक्षण अस्पतालमा उपचार भइरहेको छ ।

मठ गाउँ शोकमा 

आफन्तै पर्ने ६ जना र अर्को १ जनाको मृत्यु हुने गरी भएको दुर्घटनाले मुसीकोट नगरपालिका–१, मठ गाउँ शोकमा परेको छ । दुर्घटनालगत्तै शेरबहादुर श्रेष्ठ र उनको छोरी सुरेखाको घरमा रुवावासी चलिरहेको छ । आफन्त, छरछिमेक र इष्टमित्र भावविह्वल अवस्थामा छन् । हाल दुर्घटना परेका ७ जनाकै शव जिल्ला अस्पताल रुकुम पश्चिममा राखिएको छ । अनिताका बाबुअामा इटहरीबाट हेलिकप्टरबाट अाउँदै गरेकाले  उनी र उनका पति नवीन श्रेष्ठकोबाहेक अन्य मृतक ५ जनाको पाेस्टमार्टम गरिएको छ ।

source: ekantipur

 

सडकको खाल्डोमा जमेको पानीमा डुबेर चार बालिकाको मृत्यु

२१ साउन, रौतहट । रौतहटमा सडक निर्माणका लागि खनिएको खाल्डोमा जमेको पानीमा डुबेर चार बालिकाको मृत्यु भएको छ ।

गरुडादेखि पानीट्यांकी जोड्ने निर्माणाधीन सडकमा रहेको खाल्डोमा जमेको पानीमा नुहाउने क्रममा उनीहरूको डुबेर मृत्यु भएको हो । मृत्यु हुनेमा १२ वर्षीया संगीताकुमारी साह, ९ वर्षीया सुनिता, ९ वर्षीया सुनैना, ९  वर्षीया सुस्मिता छन् ।

 

उनीहरु एकै परिवारका दाजुभाइका छोरी हुन् । सुनैना जोगेन्ऽ शाहकी छोरी हुन् भने संगिता र सुनिता रामएकवाल र सुस्मिता प्रेमनारायणकी छोरी हुन् ।

घाँस काट्न हिडेका उनीहरू अत्याधिक गर्मीका कारण नुहाउन उक्त सडकखण्डकोे खाल्डामा पुगेका थिए । मृतक बालिकाको शव पोष्टमार्टमका लागि जिल्ला अस्पताल गौर पठाइएको गरुडाका प्रहरी निरीक्षक केशव रेग्मीले जानकारी दिए ।

source : onlinekhabar

डोटीमा जीप दुर्घटना, ९ को मृत्यु, ६ घाइते घाइते बोकेको जीप पहिरोले रोकिएपछि उद्धारमा समस्या

२१ साउन, काठमाडौं । डोटीको बोगटान गाउँपालिका–६ गगुडाधारमा गएराति जीप दुर्घटना हुँदा ९ जनाको घटनास्थलमै मृत्यु भएको छ । दिपायलबाट यात्रु लिएर बोगटान क्षेत्रका लागि हिँडेको शैलेश्वरी यातायातको से १ ज ४९१ नम्बरको जीप राति १० बजे दुर्घटना हुँदा ६ जना घाइते भएका छन् ।

दुर्घटनामा परी बोगटान गाउँपालिका—१, सिमचौरका ३५ वर्षीय विष्णुबहादुर मगर, ५५ वर्षीय भीम घर्तिमगर, ५० वर्षीय बुढो घर्ती मगर र ४५ वर्षीय गोरख थापा मगरको घटनास्थलमै ज्यान गएको प्रहरीले जनाएको छ । यस्तै ४८ वर्षीय शशीराम पुनमगर, ४५ वर्षीय ललीता देवी पुन, ४० वर्षीय टेकबहादुर पुनमगर, ३० वर्षीय चन्द्रबहादुर घर्तीमगर र शिखर नगरपालिका–१ कपल्केकी २८ वर्षीय चालक कृष्णबहादुर नेगीको ज्यान गएको जिल्ला प्रहरी कार्यालय, डोटीका प्रहरी निरीक्षक राजेन्द्रबहादुर सिंहले जानकारी दिए ।

 

घाइतेमध्ये दुईको अवस्था गम्भीर रहेको छ । घटनास्थल जिल्ला सदरमुकामबाट करिव पाँच घन्टाको दूरीमा भएकाले घाइतेहरुको उपचारमा समस्या भएको छ ।

शैलेश्वरी यातायात व्यवसायी समितिका अध्यक्ष गणेशबहादुर मलासीले दिएको जानकारी अनुसार, घाइते बोकेर आएको अर्को जीप के आई सिंह गाउँपालिका–१ को ध्याडीखोला भन्ने ठाउँमा पहिरो गएका कारण उतै रोकिएको छ ।

जीप सडकबाट करिब पाँच सय मिटर तल खसेको स्थानीयले जानकारी दिएका छन । दुर्घटनाको कारण भने खुलेको छैन । प्रहरीले यसबारे अनुसन्धान भइरहेको जनाएको छ ।

source :onlinekhabar

भारतमा भएको जीप दुर्घटनामा ३ नेपालीको मृत्यु, २ घाइते

खोतिला भन्ने स्थानमा जीप दुर्घटनामा परि एकै घरका ३ जना नेपालीको मृत्यु भएको छ ।

मृत्यु हुनेमा दार्चुला, पीपलचौर सौतलीका हिरादेवी बम उनका छोरा ओमकार र छोरी प्रियंका रहेको जिल्ला प्रहरी कार्यालय दार्चुलाले जनाएको छ । त्यस्तै दुर्घटनामापीपलचौरीकै डम्बरी बम र माधुरी बम घाइते छन् । दुर्घटनामा परी २ जना भारतीय नागरिक पनि मृत्यु भएको छ ।

 

युके ०५ पीए १२८१ नम्बरको जीप भारतको गर्भाधारबाट धार्चुलातिर आइरहेका बेला खोतिला भन्ने ठाउँ विहीबार दिउँसो पहिरोमा परेको प्रहरीले जनाएको छ ।

पहिरोले जीप पुरिदा जीपमा सवार ३ जना नेपाली तथा २ जना भारतीय नागरिकको मृत्यु भएको छ भने २ जना घाइते भएका छन् ।

नेपालतिर बाटो नहुदा दार्चुलाको दुहू क्षेत्रका स्थानीयहरु सदरमुकाम खलंगा आउन पनि भारतको बाटो प्रयोग गर्नुपर्ने बाध्यता छ ।

मुग्लिन-नारायणगढ सडकमा भयानक पहिरो: पहिरोले किचेर असईसहित दुई प्रहरीको मृत्यु, दुई बेपत्ता

चितवन, ९ असार । नारायणगढ मुग्लिन सडकखण्डको कालीखोला नजिकै गए राति खसेको पहिरोसँगै त्रिशूलीमा खसेको प्रहरी भ्यानका दुई प्रहरीको शव भेटिएको छ ।

जिल्ला प्रहरी कार्यालय चितवनले दिएको जानकारीअनुसार इलाका प्रहरी कार्यालय मुग्लिनका प्रहरी सहायक निरीक्षक २९ वर्षीय निश्चल तामाङ र गाडीका चालक प्रहरी जवान ३० वर्षीय दीपककुमार मास्केको शव भेटिएको हो ।

तामाङ धादिङ जिल्ला खनिया गाउँपालिका–४ का र मास्के बारा जिल्लाको हरैया–६ का हुनुहुन्थ्यो । उहाँहरुको शवलाई सडकभन्दा तल नदीमाथि भिरमा पहिरोले किचिएको अवस्थामा फेला परेको घटनास्थलमा रहनुभएका प्रहरी उपरीक्षक दीपक थापाले बताउनुभयो । गाडीका चालक मास्के र प्रहरी सहायक निरीक्षक तामाङ गाडीको अघिल्लो सिटमा रहनुभएको थियो ।

पहिरोमा परी इलाका प्रहरी कार्यालय मुग्लिनका जवान २१ वर्षीय सन्दीप कार्की र ३१ वर्षीय लीलाबहादुर चेपाङ पनि बेपत्ता हुनुभएको छ । कार्की तनहुँको रुपाकोट–३ का र चेपाङ गोरखा मकैसिङ–१ का हुनुहुन्छ । उहाँहरुसँगै प्रहरीको ना१झ १३९० नंको भ्यान र दुई थान एसएलआर हतियार बेपत्ता भएका छन् ।

प्रहरी उपरीक्षक थापाले सुरुमा सडकमै पहिरोमा भ्यान पुरिएको अनुमान गरिएको भए पनि शवलाई भिरमा भेटिएपछि गाडी त्रिशूलीमा खसेको अनुमान गरिएको बताउनुभयो । पहिरोले भिरमा अड्काएको ना५ख ७८२७ नंको ट्रकका सहयोगी चालक सिजल लामालाई उपचारका लागि आँबु खैरहनी लगिएको छ भने चालक रामकुमार लामा सकुशल रहेको प्रहरीले जनाएको छ । मुग्लिनबाट २।५ किमी नारायणगढतर्फ पहिरो खसेको हो ।

सवारीसाधन र बेपत्ता भएकाको रातिदेखि नै नेपाल प्रहरी, सशस्त्र प्रहरी, स्थानीयवासीले खोजी कार्यलाई तीव्रता दिएका छन् । सोही सडकको चारकिलोमा खसेको पहिरो पन्छाएर एकतर्फी सञ्चालनमा ल्याइएको छ । दुई पहिरो बीचमा रहेका सवारीसाधनलाई नारायणगढतर्फ पठाइएको प्रहरी प्रमुख थापाले बताउनुभयो ।

मुख्य घटनास्थलमा खसेको पहिरो भने पन्छाउने क्रम जारी रहेको छ । राति ९ः४० बजे कालीखोलाको मुखमा खसेको पहिरो पन्छाउन नपाउँदै चारकिलोमा पहिरो खसेको थियो । चारकिलोको पहिरो पन्छाउन नसकेपछि फर्किने क्रममा सो ठाउँमा पहिरो खसेर गाडी दुर्घटना भएको हो । रासस

स्रोत : दैनिकनेपाल

काठमाडौंबाट हिडेको ट्रक धादिङमा दुर्घटना, तीन जनाको मृत्यु

धादिङ, ९ असार । धादिङमा ट्रक दुर्घटना हुँदा तीन जनाको मृत्यु भएको छ ।

जिल्ला प्रहरी कार्यालय धादिङका अनुसार काठमाडौंबाट मुग्लिनतर्फ जाँदै गरेको ना६ख ३१२३ नम्बरको ट्रक बेनिघाटको रोराङ गाउँपालिकामा पर्ने हुग्दीखोला पुलबाट खस्दा दुर्घटनामा परेको हो ।

दुर्घटनामा ट्रक चालक गढिमाई–१ बाराका नरबहादुर खत्री, सहचालक पर्सा ढोरीका जीवन लामा र नुवाकोट घर भएकी सन्जु राईको मृत्यु भएको धादिङका डीएसपी दिपेन्द्र पञ्जियारले जानकारी दिए ।

उनका अनुसार तीव्र गतिमा रहेको ट्रक अनियन्त्रित भई पुलबाट खोलामा खसेको थियो ।