Home / खेलकुद

खेलकुद

केन्याविरुद्ध नेपाललाई जिताउने ४ हिरो

३० फागुन, काठमाडौं । केन्याविरुद्धको दोस्रो म्याचमा नेपालले उत्कृष्ट क्रिकेट खेल्यो । बलिङ, ब्याटिङ र फिल्डिङ तीनवटै क्षेत्रमा नेपालको प्रदर्शन अब्बल थियो ।

 

अघिल्लो म्याचमा निराश बनाएका ब्याट्सम्यानहरुले दोस्रो म्याचमा निकै सुधारिएको प्रदर्शन गरे । नेपालका ब्याट्सम्यान विपक्षी बलरहरुमाथि पूर्णरुपमा हावी भएका थिए । नेपालको बलिङ धारिलो थियो भने फिल्डिङ पनि निकै चुस्त रह्यो ।

यो जितका लागि सबै खेलाडीहरु बधाईका पात्र छन् । तर यहाँ हामीले खेलाडीहरुको व्यक्तिगत प्रदर्शनका आधारमा आजको म्याचका चार नायकहरु छनोट गरेका छौं ।

लजालु दिपेन्द्रको विस्फोटक ब्याटिङ

यू-१९ बाट राष्ट्रिय क्रिकेट टोलीमा आफ्नो स्थान बनाएका दिपेन्द्र सिंह ऐरी आफ्नो दोस्रो म्याच खेलिरहेका थिए । तर, मैदानमा उनको प्रदर्शन परिपक्व ब्याट्सम्यान भन्दा कम थिएन ।

लगातार दुई विकेट गएको अवस्थामा उनी मैदान प्रवेश गरेका थिए । उनलाई चौंथो नम्बरमा ब्याटिङ गर्न पठाइएको थियो जहाँ नेपालका नियमित कप्तान पारस खड्काले ब्याटिङ गर्ने गर्थे । र, आजको म्याचबाट दिपेन्द्रले आफूलाई प्रमाणित गरेका छन् ।
दिपेन्द्रले ब्याटिङ गरिरहँदा यस्तो लाग्दैनथ्यो कि उनी सिनियर टोलीबाट दोस्रो म्याच खेलिरहेका छन् । अर्को इन्डबाट खेलिरहेका कप्तान ज्ञानेन्द्र मल्लभन्दा प्राविधिकरुपमा उनी कमजोर देखिएनन् ।

उनको स्ट्राइक रेट पनि उच्च रह्यो । आफ्नो ६२ रनको इनिङमा उनले ८ चौका र एक छक्का प्रहार गरे । उनका प्रत्येक बाउन्ड्रीहरु हेर्नलायक थिए । विकेटको दुवैतर्फ उनले रन बटुले ।
केन्याविरुद्धको पहिलो म्याचमा दिपेन्द्रले फरक शैलीमा ब्याटिङ गरेका थिए । नेपालको इनिङ लड्खडाएका बेला उनी निकै सम्हालिएर खेल्ने प्रयास गरेका थिए ।

यसबाट उनी सिचुयसनअनुसार आफूलाई ढाल्न सक्छन् भन्ने प्रमाणित हुन्छ । दिपेन्द्रको ब्याटिङले नेपालको मध्यक्रममा एक उत्कृष्ट ब्याट्सम्यानको आगमन भएको आभास मिलेको छ ।

नेपाली टोलीका प्रशिक्षक जगत टमाटा र कप्तान ज्ञानेन्द्र मल्लले पनि उनको तारिफ गरेका छन् । टमाटाको शब्दमा भन्दा नेपालले मिडिल अर्डरमा एउटा नयाँ खम्बा भेटाएको छ ।

खेलपछि पत्रकारहरुसँग कुरा गर्दा दिपेन्द्र फेरि लजालु स्वभावमा देखिए । र, भने-अगाडि कप्तान थियो । उहाँले सल्लाह दिइरहनु भएको थियो । अर्धशतक बनाएकोमा खुसी लाग्यो ।’

ज्ञानेन्द्र मल्लको कप्तानी इनिङ
नियमित कप्तान पारस खड्काको अनुपस्थितिमा कार्यवाहक कप्तान ज्ञानेन्द्र मल्लको काँधमा ठूलो जिम्मेवारी थियो । केन्याविरुद्धको दोस्रो म्याचमा उनी आफ्नो भूमिकामा खरो उत्रिए ।

कप्तान र ओपनिङ ब्याट्सम्यान दुवै भूमिकामा ज्ञानेन्द्रले न्याय गरे । मेहबुबलाई सुरुवाति ओभरमा बलिङ गराउने र शरद भेषावकरलाई पार्टटाइम बलरका रुपमा प्रयोग गर्ने उनको निर्णय तारिफयोग्य छ । पार्टटाइम बलर शरदलाई उनले सात ओभर बलिङ गर्न दि, जुन मास्टरस्ट्रोक सावित भयो । अन्य बलरहरुलाई पनि उनले राम्ररी रोटेट गरे ।

ब्याटिङमा पनि ज्ञानेन्द्रको ६४ रनको इनिङ त्रुटीरहित थियो । उनले कुनै पनि सट हड्वडाएर खेलेनन् । अर्को इन्डबाट दिपेन्द्र ऐरीले आक्रामक सट हानिरहँदा उनी संयमित भएर खेलिरहेका थिए ।

तर, लुज बलहरुलाई सजाय दिन पछि परेनन् । ज्ञानेन्द्रले आफ्नो इनिङमा ८ चौका र एक छक्का प्रहार गरे ।
नेपालले पुरानै मेहेबुब आलम पायो
केन्याविरुद्धको दोस्रो म्याचमा भेट्रान अलराउण्डर महबुब आलमले सनसनीपूर्ण बलिङ गरे । प्रारम्भिक बलरका रुपमा आएका उनले पहिलो ओभरमा दुई रन दिएका थिए भने त्यसपछि लगातार ५ मेडन ओभर फाले । यस क्रममा दुई महत्वपूर्ण विकेट झारेर केन्यालाई दबावमा राखे । लगातार सात ओभर बलिङ गरेका मेहेबुबले केवल ११ रन खर्चेका थिए ।

आजको प्रदर्शनले मेहेबुबको पुराना दिनहरुलाई सम्झाएको छ । कुनै समय नेपालका एक नम्बर बलर थिए उनी ।

एकदिवसीय क्रिकेटको इतिहासमा विपक्षी टोलीको १० वटै विकेट लिने उनी विश्वकै एक मात्र बलर हुन् । सन् २००८ मा मोजाम्बिकविरुद्ध उनले यो अद्भुत सफलता प्राप्त गरेका थिए ।
तर पछिल्लो समय र्फम खस्केपछि उनी झण्डै २ वर्ष नेपाली राष्ट्रिय टोलीबाट बाहिर रहेका थिए ।

पछिल्लो समय उनले आफूलाई सुधार गर्दै टिममा स्थान बनाएका थिए । र, सोमबारको प्रदर्शनले आफूलाई टिममा राख्ने र खेलाउने कप्तान र कोचको निर्णयलाई सही सावित गरिदिए । प्रशिक्षक टमाटा भन्छन्, हामीले पुरानै महबुब पाएका छौं ।’

पहिलो म्याचमा उनले बलिङ गरेका थिएनन् । ब्याटिङमा भने उनको प्रदर्शन उलेख्य रहेन । तर, दोस्रो म्याचमा उनलाई सोमपाल कामीको जोडीको रुपमा बलिङ गर्न लगाइयो र उनले सोमपाललाई ओझेलमा पारे ।

बलिङमा चम्किए, अनि छक्का हान्दै जिताए
अनुभवी क्रिकेटर शरद भेषावकरबाट नेपालले ब्याटिङमा धेरै आशा गरेको थियो । तर, अनपेक्षितरुपमा उनी बलिङमा चम्किए ।

केन्याका करिम र ओबुयाले तेस्रो विकेटका लागि बनाएको साझेदारी नेपालका लागि खतरा बन्दै गएको अवस्थामा कप्तान ज्ञानेन्द्रले पार्टटाइम स्पिनर भेषावकरलाई बलिङमा उतारेका थिए, जुन आफैंमा एउटा जोखिम थियो । तर, कप्तानको निर्णयलाई सही सावित गर्दै भेषावकरले चार महत्वपूर्ण विकेट लिएर केन्याको इनिङ धराशायी पारे ।

शरदको बलिङ निकै किफायती पनि रह्यो । उनले ७ं.१ ओभर बलिङ गर्दा २८ रन मात्र खर्च गरेका थिए ।

उनी बलिङमा मात्र चम्किएनन्, आफनो फिनिसरको पहिचान पनि जोगाउन सफल भए । सोमबारको म्याचमा उनले आक्रामक सटहरु खेल्दै नेपाललाई जित दिलाएका थिए । भेषावकरले केवल ११ बलमा ४ चौका र एक छक्कासहित २४ रन बनाए । उनले अन्तिम दुई बलमा चौका र छक्का हान्दै नेपाललाई जित दिलाएका थिए ।

नेपालले मलेसियालाई १–० ले हरायो

२ पुस काठमाडौं । नेपाली महिला टोलीले तुलनात्मक रुपमा बलियो मानिएको मलेसियाको राष्ट्रिय टोलीलाई अन्तर्राष्ट्रिय मैत्रीपूर्ण फूटबलमा पराजित गरेको छ ।

एन्फा कम्प्लेक्स सातदोबाटोमा आज भएको मैत्रीपूर्ण खेलमा नेपाली महिला टोली १—० ले विजयी भएको हो । फिफा बरियतामा मलेशिया ८६ औं र नेपाल १ सय १२ औं स्थानमा छ । नेपालको जितमा सावित्रा भण्डारीले पहिलो हाफमै गरेको गोल जितका लागि निर्णायक बन्यो ।

nepali-women-football

चौथो साफ महिला च्याम्पियनसीपको तयारीमा रहेको नेपालले त्यसैको तयारीका रुपमा मलेसीयासँग मैत्रीपूर्ण खेल खेलेको हो । साफ फूटबलको तयारीमा सहयोग पुग्ने गरी अखिल नेपाल फूटबल संघ एन्फाको निम्तोमा मैत्रीपूर्ण खेल खेल्न अस्ती नेपाल आएको मलेसियाली टोली भोलि स्वदेश फर्कनेछ ।

रोहित पौडेलः जसले अन्तिम ओभरमा भारतविरुद्ध छक्का-चौका वर्षाए

rohit-paudel

१ पुस, काठमाडौं । नेपाली युवा टोलीले एसीसी यू-१९ एसिया कपमा दोस्रो हार व्यहोर्‍यो । भारतसँग ६ विकेटको हारसँगै नेपाल प्रतियोगिताको समूह चरणबाटै बाहिरिएको पनि छ ।

तर, यो हारका बाबजुद नेपाली त्रिकेट समर्थकहरुले यो दिनलाई आठौं नम्बरका व्याट्सम्यान रोहित पौडेलले भारतविरुद्ध बनाएको ६८ रनलाई मात्र होइन, अन्तिम ओभरमा हानेको तीन चौका र एक छक्कालाई पनि याद गरिरहनेछन् । ९८ बलको सामना गरेका उनी अविजित पनि रहे ।

रोहित पौडेल, जो श्रीलंकाविरुद्धको पहिलो खेलमा फस्ट इलाभेनमा परेका थिएनन् । तर, भारतविरुद्धको खेलमा उनले नेपालको पारीलाई सम्हालेर सम्मानजनक स्कोरमा पुर्‍याए ।

उनी मैदान प्रवेश गर्दा नेपालको स्कोर मात्र ८६ रन थियो र, आधा खेल बाँकी नै थियो । तर, रोहितले एउटा इन्डमा बसेर भारतीय बलरहरुको डटेर सामना त गरे नै, अन्तिम ओभरमा जे गरे, त्यो गज्जब थियो । कमलेस नगरकोटीको पहिलो बलमा कुनै पनि रन नलिएका उनले दोस्रो बलमा छक्का हाने । तेस्रो र चौथो बलमा चौका हानेका उनले पाँचौ बलमा छक्का हाने । र, छैटौं बलमा फेरि चौका हान्दै नेपालको पारी समाप्त गरे ।

को हुन् रोहित पौडेल ?

रोहित, नवलपरासीका हुन् । उनले काठमाडौंको बालुवाटार क्रिकेट क्लबबाट खेल्दै आएका छन् । प्रशिक्षक रिकेश लामाका अनुसार उनी अलराउण्डर हुन् र क्लबमा खेल्दा ओपनिङ व्याटिङ गर्छन् । ‘उनी क्लबमा तीन वर्षदेखि छन्,’ लामाले भने, ‘उनी टिममा व्याट्सम्यानको रुपमा परेका हुन् । तर, बलिङ पनि त्यति नै राम्रो गर्छन् ।’

उनी क्लबमा तेस्रो-चौथो नम्बरका बलर हुन् । अहिले यू-१९ टिममा भने भैरहवामा भएको ट्यालेन्ट हन्टबाट उनी छनौट भएका हुन् ।

नेपाल श्रीलंकासँग १ रनले पराजितः दीपेन्द्र ऐरी ‘म्यान अफ द म्याच’

man-of-the-match-dipendra-airee-5852b02de35b12-40741272

काठमाडौं: अन्तिम समयमा सम्हालिन नसक्दा नेपाली क्रिकेट टोली पुन एक पटक टेस्ट टोलीमाथी जित हातपार्नबाट चुकेको छ । श्रीलंकामा जारी एसीसी यू–१९ एसिया कपअन्तर्गत बिहीबार आफ्नो पहिलो खेलमा घरेलु टोलीविरुद्ध उत्रिएको नेपाल एक रनले पराजित भएको हो ।

दुई सय २८ रनको लक्ष्य पछ्याएको नेपाली टोलीले ४९.३ ओभरमा सबै विकेट गुमाएर दुई सय २६ रन जोड्न सक्यो । ४९ औं ओभरमा दुई ब्याट्सम्यान रन आउटको सिकार भएपछि नेपाली टोली अप्ठेरोमा परेको थियो ।

अन्तिम ओभरमा नेपाललाई जितका लागि आठ रन आवश्यक थियो भने एक विकेट मात्र साथमा थियो । यस्तो स्थितिमा मध्यक्रमका दीपेन्द्र ऐरी एक्लैले क्रिज सम्हाल्ने प्रयास गरेका थिए । ५० औं ओभरको पहिलो बलमा रन जोड्न नसके पनि दोस्रो बलमा छक्का प्रहार गर्दै उनले नेपाललाई जित नजिक पुर्याए । तर, तेस्रो बलमा उनी एलबीडब्लू सिकार बने । पाँचौं नम्बरमा ब्याटिङमा आएका दीपेन्द्रले ९० रन बनाए । उनलाई स्पिनर प्रविन जयाविक्रमाले एलबीडब्लू धरापमा पारे ।

यसअघि ४९ औं ओभरमा कप्तान सन्दीप लामिछाने र कमलसिंह ऐरी रन आउट भए । त्यसअघि नेपाललाई १८ बलमा १९ रन आवश्यक थियो । कमजोर सुरुवात गरेको नेपाली टोलीलाई दीपेन्द्र र अविनाश कर्णले जिततर्फ डो¥याउने प्रयास गरे । एक सय १२ रन जोड्दा पाँच विकेट गुमाएको नेपाली टोलीका लागि दिपेन्द्र र अविनासले छैटौं विकेटका लागि ८४ रनको साझेदारी गरे । अविनास आउट हुँदा नेपालले ४४.४ ओभरमा ६ विकेट गुमाएर एक सय ९६ रन जोडेको थियो । उक्त ओभरमा पवन सर्राफ पनि आउट भए ।

नेपालको पालीमा अविनाशले ४०, अदिल खानले ३९ र विकेटकिपर प्रकाश केसीले १४ रन जोडे । सन्दीप सुनार दुई, आसिफ शेख एक र भीम सार्की आठ रन जोडेर आउट भए । नेपालले चौथो विकेटका लागि ४५ र पाँचौं विकेटका लागि ३५ रनको साझेदारी गरेको थियो । दीपेन्द्रले ९९ बलमा एक छक्का र नौ चौका प्रहार गरे । अविनासले ६४ बलमा एक छक्का र तीन चौका हिर्काए । नेपालका चार ब्याट्सम्यान एलबीडब्लू सिकार बनेका थिए । यो खेलमा एक जना रेफ्री स्वयं श्रीलंकन थिए ।

यसअघि श्रीलंकाले निर्धारित ५० ओभरमा आठ विकेट गुमाएर दुई सय २७ रन जोडेको थियो । घरेलु टोलीका हासिथा बायोगोडाले ८३, आसेन बन्दराले ४८, कृसन आर्चिजले २८ र रेभेन केल्लीले १९ रन बनाए । पालीको पहिलो बलमै विकेट गुमाएको श्रीलंका त्यसपछि सम्हालिएको थियो । नेपाली बलर कमल ऐरीले तीन , पवन सर्राफले दुई र दिपेन्द्र ऐरीले एक विकेट लिए ।

प्रतियोगिताअन्तर्गत बिहीबार भएका अन्य खेलमा बंगलादेशले अफगानिस्तानलाई चार विकेटले, भारतले मलेसियालाई दुई सय ३५ रनले र पाकिस्तानले सिंगापुरलाई नौ विकेटले हरायो ।

भारतले पहिला ब्याटिङ गर्नेक्रममा निर्धारित ५० ओभरमा आठ विकेट गुमाएर दुई सय ८९ रन जोडेको थियो । प्रतियोगिताअन्तर्गत आफ्नो दोस्रो खेलमा नेपालले शुक्रबार भारतसँग प्रतिस्पर्धा गर्दैछ । नेपाल रहेको समूहमा भारत र श्रीलंकाबाहेक मलेसिया पनि छ ।

अर्को समूहमा पाकिस्तान, बंगलादेश, अफगानिस्तान र सिंगापुर छन् । प्रतियोगितामा एसियाका चारवटा टेस्ट राष्ट्र र चारवटा एसोसिएट राष्ट्र समावेश छन् । समूहको शीर्ष दुई टोली सेमिफाइनल पुग्नेछन् ।

‘टोली बनाउनै गाह्रो ! दुई-तीन जना भए पनि खेल्छौं’ झण्डै क्रिकेट छाडेकी थिएँ- सबनम रार्इ

sabanam-rai_810

१५ मंसिर, काठमाडौं । पाकिस्तान विरुद्ध ४७ रनमा अलआउट । श्रीलंका विरुद्ध २३ र बंगलादेश विरुद्ध ४१ रनमा अलआउट ।

महिला एसिया कपमा नेपालको यस्तो प्रदर्शन देख्दा धेरैलाई लाग्छ, कस्तो झुर खेलेको ! हामी त धेरै कमजोर रहेछौं !

तर, यो निष्कर्ष निकाल्नुअघि एक पटक सोच्नुस् त, हाम्रा चेलीहरुले कसरी तयारी गर्छन् ?

मिडियम पेश बलर सबनम राई टिम अभावको समस्या राख्दै भन्छिन्, ‘एक जना ब्याट्सवुमन राखेर म बलिङ गर्छु । रुविना दिदीले कुनै बेला फिल्डिङ गरिदिनुहुन्छ, कोही बेला फिल्डिङ गर्नुहुन्छ । त्यसरी खेल्छौं ।’

झापाकी सबनमले विश्वकप छनोटमा डेब्यू गरिन् र अहिले थाइल्याण्डमा एसिया कप खेलिरहेकी छन् । तर, प्रतियोगिता अगाडि हुने छोटो अवधिको बन्द प्रशिक्षणलाई छाड्ने हो भने नेपाली महिला टोलीका धेरै सदस्यले राम्ररी खेल्नै पाएका हुँदैनन् ।

सशस्त्र प्रहरीको एपीएफ क्लबमा आबद्ध भएकाहरुले दैनिक अभ्यास गर्ने मौका पाएका छन् । तर, अरुका लागि अभ्यास गर्न चाहिने न्यूनतम टिम बनाउन नै हम्मेहम्मे पर्ने अवस्था छ ।

***

गृहजिल्ला झापामै १२ कक्षामा अध्ययनरत सबनम राईले क्रिकेट खेल्न थालेको ६/७ वर्ष भयो । बाल्यकालमा उनले ब्याट समाउने मौका पाइनन् । स्कूलमा पनि भलिबल मात्र खेलिन् ।

sabanam-rai

बैंकक उड्नुअघि अनलाइनखबरसँगको भेटमा उनले सम्झिइन्, ‘विरु श्रेष्ठ सरले स्कूलबाट खेल्न भन्नुभो । सुरुमा रहन नै लागेन । तर, साथीहरुको करमा क्रिकेट खेलेँ ।’

त्यसपछि झापाको मिलन क्रिकेट क्लबबाट खेलिन् । पूर्वाञ्चल हुँदै नेपालको राष्ट्रिय टोलीमा परेकी छन् ।

एक समय त यस्तो आयो, अरुलाई सम्झाउने र क्रिकेटमा ल्याउने प्रयास गर्दै हिँडेकी सबनम आफैंले क्रिकेट छाडेकी थिइन्

प्रतियोगिता नभएको बेला उनी झापामै बसेर अध्ययन गर्छिन् । दैनिक एक/डेढ घन्टा क्रिकेट खेल्छिन् । तर, टोली बनाउनै गाह्रो छ । ‘दुई जना, तीन जना भए पनि हामी खेल्छौं । रुविना (क्षेत्री) दिदीले क्याचहरु गराउनुहुन्छ । एक जना ब्याट्सवुमन राखेर बलिङ गर्छु’, उनले भनिन् ।

***

रुविना क्षेत्री र सबनम राईहरुले झापाका स्कूलहरुमा गएर क्रिकेट सिकाएका पनि छन् । तर, आकर्षण छैन । सबनमकै बहिनी क्रिकेट छाडेर फुटबल खेल्न थालेकी छन् । ‘स्पोर्टसमा लागेर काम छैन भनेर परिवारले खेल्न दिँदैनन्,’ तीतो अनुभव सुनाइन् ।

एक समय त यस्तो आयो, अरुलाई सम्झाउने र क्रिकेटमा ल्याउने प्रयास गर्दै हिँडेकी सबनम आफैंले क्रिकेट छाडेकी थिइन् ।

‘अब केही नहुने रहेछ, म पनि खेल्दिनँ भनेर ड्रेस, सुज सबै भाइबहिनीलाई दिएकी थिएँ’, सबनमले भनिन् ।

किन त ? उनले भनिन्, ‘खेल नभएको दुई वर्ष भइसकेको थियो ।’

त्यसपछि रुविनाले कर गरिन् । विश्वकप छनोटअघि ‘खेल्नुपर्छ, यो पटक चान्स छ’ भनेको उनलाई अहिले पनि याद छ ।

आमाले त कर गरेकै थिइन् । त्यसपछि उनी अभ्यासमा फर्किइन् र टोलीमा पर्न सफल भएकी छिन् । खेल्न प्रोत्साहित गरेकोले उनी रुविनालाई ‘थ्यांक्यू दिदी’ भन्न चाहन्छिन् ।
  ***

sabanam-rai_455सबनमलाई क्रिकेट खेल्न परिवारबाट कुनै अवरोध भएन । हुन त उनकी आमाले छोरीसँग क्रिकेटबारे भर्खर बुझ्दै छिन् । चौका भयो भन्दा ‘खै त बल उडेर गएको’ भन्छिन् ।

अलि-अलि बुझे पनि क्रिकेट खेल्न सबनमलाई प्रोत्साहन गरिरहिन् । पछिल्लो पटक छोरी राष्ट्रिय टोलीमा परेपछि उनी खुसी छन् । तर, बुबाले भने अहिलेसम्म छोरी क्रिकेट टोलीमा परेको मानेकै छैनन् ।

सबनमका अनुसार, उनको बुवाले भनेका छन्, ‘जुन दिन विकेट लिएर वुमन अफ दि म्याच हुन्छौ, तब मेरी छोरी टिममा परी भनेर मान्छु ।’

विश्वकप छनोटमा उनले बुवाको यो सपना पूरा गर्न सकिनन्, एसिया कपमा पनि सायदै पूरा होला ।

तर, सबनमको दृढ विश्वास छ, अब निरन्तर क्रिकेट खेल्छु र यो सफलता हात पारेरै छोड्छु ।

अनलाइन खबर बाट साभार

जापानी टोलीमाथि नेपालको जित, नवयुगको विजयी गोल

nepal-vs-japan-1
४ मंसिर काठमाडौं । नेपालले फ्रेन्ड्स अफ जापानमाथि जित हात पारेको छ । शनिबार भएको च्यारिटी खेलमा नेपालले फ्रेन्ड्स अफ जापानमाथि १-० को जित हात पारेको हो ।

सात दोबाटोस्थित एन्फा कम्प्लेक्समा भएको खेलमा नेपालका नवयुग श्रेष्ठले विजयी गोल गरे ।

nepal-vs-japan

खेलको पहिलो हाफ गोलरहित बराबरीमा सकिएको थियो । दोस्रो हाफको ५८ औं मिनेटमा नवयुगले गोल गरे । बिमल घर्ती मगरको पासमा बिक्रम लामाले प्रहार जापानी गोलरक्षकले बल रोकेका थिए ।

तर, नियन्त्रणमा लिन सकेनन् र त्यही मौकाको सदुपयोग गर्दै नवयुगले गोल गरेका हुन् ।

team-nepal

नेपाल र जापानबीच दौत्य सम्वन्ध स्थापना भएको ६० औं वर्षगाँठको अबसरमा अखिल नेपाल फुटबल संघ एन्फाले कलरबाथसाग मिलेर मैत्रिपूर्ण च्यारिटी खेल आयोजना गरेको थियो ।

स्रोत : अनलाइन खबर

एएफसी कप विजेता फुटबल टिमलाई नगर परिक्रमा गराइदै

afc-solidarity-cup-malaysia-photo2016-582c76d3478f37-51878863

काठमाडौं: एएफसी सोलिडारिटी कपको उपाधि विजेयता नेपाली फुटबल टिमलाई बुधबार राति नगर परिक्रम गराइएकाे छ । मंगलबार मलेसियामा सम्पन्न एफएसी सोलिडारिटी कपको फाइनलमा मकाउलाई १–० ले पराजित गर्दै च्याम्पियन बनेको नेपाल उपाधिसहित नेपाल आइपुगेपछि नगर परिक्रमा गराइएकाे हो ।

ऐतिहासिक उपलब्धिसहित स्वदेश फर्किएको नेपाली टोलीलाई त्रिभुवन अन्तराष्ट्रिय विमास्थलमा भव्य स्वागत गरेर नगर परिक्रमा गराएकाे अखिल नेपाल फुटबल संघ (एन्फा)ले जनाएकाे  छ ।

एन्फाका अनुसार त्रिभुवन अन्तराष्ट्रिय विमानस्थलबाट नेपाली टोलीलाई बाजागाजासहितको विजय र्‍याली सुरु भएकाे छ । बाजागाजा सहितको र्याली विमानस्थलबाट गौशाला, बत्तिसपुतली, मैतिदेवी, पुतलीसडक, घण्टाघर, शहिदगेट, त्रिपुरेश्वर, थापाथली, पुल्चोक, मंगलबजार, ग्वार्को हुँदै एन्फा मुख्यालय सातदोबाटो पुग्ने छ ।

अन्तराष्ट्रिय प्रतियोगितामा उपाधिको खडेरी परेका बेला ३५ वर्षपछि एएफसी सोलिडारिटी कपको उपाधि उचालेको नेपाली फुटबल टिमका प्रत्येक सदस्यलाई सरकारले तीन–तीन लाख दिने घोषणा गरिसकेको छ ।

विजयी नेपाली टिमका सबै सदस्यलाई प्रोत्साहन स्वरुप तीन–तीन लाख दिने घोषणा युवा तथा खेलकुद मन्त्री दलजीत श्रीपालीले गरेका हुन् । मलेसियाको कुचिङस्थित नेगेरी स्टेडियममा मंगलबार साँझ भएको खेलमा फिफा बरियतामा १० स्थान तल रहको मकाउलाई १–० गोल अन्तरले हराउँदै नेपालले उपाधि उचालेको हो।

योसँगै नेपालले अन्तर्राष्ट्रिय उपाधिमा ह्याट्रिक गरेको छ। नेपालका लागि खेलको ३० औं मिनेटमा सुजल श्रेष्ठले गरेको गोल नै निर्णायक बनेको थियो । भरत खबासले मिलाएको उत्कृष्ट पासमा सुजलले लोभलाग्दो हेडर गोल गरेका थिए।

सोलिडारिटी कपको उपाधि जित्दै नेपालले रच्यो इतिहास

nepal-3

३० कात्तिक, काठमाडौं । मकाउलाई पराजित गर्दै नेपालले एएफसी सोलिडारिटी कप फुटबलको उपाधि जितेको छ । यससँगै यू-२३ सहित उपाधिको हृयाटि्रक मात्र गरेन, पहिलो महादेशीय उपाधि पनि उचाल्यो ।

मलेसियाको कुचिङमा मंगलबार भएको फाइनल भिडन्तमा नेपालले मकाउलाई १-० गोल अन्तरले पराजित गरेको छ ।

नेपालको जितमा सुजल श्रेष्ठले निणर्ायक गोल गरे । खेलको २९ औं मिनेटमा भरत खवासको पासमा सुजलले हेड गोल गरेका थिए ।

पानी परेका कारण हिलाम्मे मैदानमा नेपालले मकाउमाथि लगातार दबाव दिएको थियो ।

nepal-champions

नेपालले माघमा बङ्गबन्धु कपको उपाधि जितेको थियो । तर, यो अन्तराष्ट्रिय मान्यता पाएको प्रतियोगिता थिएन । लगतै सागको फुटबलमा स्वर्ण जितेको नेपालको एकै क्यालेेण्डर वर्षमा यो तेस्रो उपाधि हो ।

नेपाल सोलिडारिटी कपको फाइनलमा, किरण बने नायक फोटो फिचर

bimals-goal-celebraion-2

२७ कात्तिक, काठमाडौं । लाओसलाई टाइब्रेकरमा हराउँदै नेपाल सोलिडारिटी कप फुटबलको फाइनलमा प्रवेश गरेको छ । नेपाल एएफसीले आयोजना गरेको कुनै पनि प्रतियोगिताको फाइनलमा पुगेको यो पहिलो पटक हो ।

शनिबार भएको प्रतिस्पर्धात्मक सेमिफाइनलको निर्धारित र अतिरिक्त समयको खेल २-२ को बराबरीमा सकिएपछि खेलको निर्णय टाइब्रेकरबाट लिइएको थियो ।

नेपालका तीन खेलाडीले लगातार गोल गरे भने पेनाल्टीमा नेपालका गोलकिपर किरण चेम्जाङले लाओसका खेलाडीको लगातार दुई प्रहार रोके । लाओसको तेस्रो पेनाल्टीले सही दिशा लिन सकेन र नेपाल टाइब्रेकरमा ३-० ले विजयी भएको छ ।

after-penalty-win-2

यसअघि निर्धारित समयको खेलमा भने लाओसले अग्रता लिएको थियो । १७ औं मिनेटमा गोल गरेको उसले पहिलो हाफसम्म त्यसलाई जोगाएर राख्यो ।

तर, दोस्रो हाफको सुरुमा नै नेपालमा नेपालले बराबरी गोल फर्कायो । नेपालका लागि विमल घर्ती मगरले गोल गरेका हुन् ।

दुबै टोलीले केही मौका पाएपनि थप गोल गर्न सकेन र, निर्धारित समयको खेल १-१ को बराबरीमा सकियो । अतिरिक्त समयको खेलको १०४ औं मिनेटमा अनन्त तामाङले गोल गर्दै नेपाललाई २-१ अग्रता दिलाए ।

तर, अन्त्यतिर नेपालले गोल खानपुग्यो । र,खेलको निर्णय टाइब्रेकरबाट लिइएको थियो ।

after-penalty-win-1

फाइनलमा मकाउ प्रतिद्वन्द्वी पायो

एएफसी सोलिडारिटी कपको फाइनलमा नेपालले मकाउ प्रतिद्वन्द्वी पाएको छ । शनिबार नै भएको दोस्रो अर्को सेमिफाइनलमा मकाउले ब्रनाईलाई टाइब्रेकरमै ३-१ ले हराएको छ ।

यसअघि निर्धारित समयको खेलमा ब्रुनाईले पहिलो हाफमा अग्र्रता लिएको थियो । तर, दोस्रो हाफमा मकाउ बराबरी गोल फर्काउन सफल भयो ।

९० मिनेटको खेल १-१ को बराबरीमा सकिएपछि थपिएको ३० मिनेटमा पनि दुबै टोलीले गोल गर्न सकेनन् र खेल टाइब्रेकरमा गयो । टाइब्रेकरमा मकाउका सबै खेलाडीले गोल गर्दा ब्रुनाईका दुई खेलाडीको प्रहार विपक्षी गोलरक्षकले रोकेका थिए ।

ananta-goal-celebration-1bimals-goal-celebraion-1nepal-vs-lawos-1nepal-vs-lawos-2
स्रोत : अनलाइन खबर

ब्रुनाईलाई हराउँदै नेपाल सोलिडारिटी कपको सेमिफाइनलमा

nepal

२३ कात्तिक, काठमाडौं । एएफसी सोलिडारिटी कप फुटबलमा नेपालले ब्रुनाईमाथि शानदार जित हात पारेको छ र, समूह विजेता बन्दै सेमिफाइनलमा पुगेको छ ।

मंगलबार मलेसियाको कुचिङमा भएको खेलमा नेपालले ब्रुनाईलाई ३-० गोल अन्तरको जित हात पारेको हो ।

नेपालले पहिलो हाफको अतिरिक्त समयमा नवयुग श्रेष्ठको गोलबाट अग्रता लिएको थियो । उनको प्रहार ब्रुनईका किपरले रोकेको बल रिबाउन्स भएर आएको बेलमा उनले नै गोल गरेका हुन् ।

 

दोस्रो हाफमा दुई गोल थप्न सफल भयो । ७१ औं मिनेटमा भरत खवासले उत्कृष्ट गोल गर्दै नेपालको अग्रता दोब्बर बनाएको थियो ।

खेलको ८० औं मिनेटमा नेपालले पेनाल्टी पायो, जसमा युवा स्ट्राइकर विमल घर्ती मगरले सहजै गोल गरे ।

आफ्नो पहिलो खेलमा टिमोर लिस्टेसँग गोलरहित बराबरी खेलेको नेपाल ब्रुनाईविरुद्धको जितसँगै ४ अंकसहित समूह एको विजेता बनेको छ । हारका बावजुत ब्रुनाई समूह उपविजेताका रुपमा अन्तिम चारमा पुगेको छ ।

हारपछि ब्रुनाईका प्रशिक्षकले आफूहरुले यो रिजल्ट अपेक्षा नगरेको बताए । साथै चोटका कारण आफ्ना केही प्रमुख खेलाडीलाई आराम दिएकाले पनि हार भएको उनले बताएका छन् ।

नेपालका कप्तान विराज महर्जनले आफ्नो टिमले राम्रो खेलेको भन्दै नजिताप्रति आफूहरु सन्तुष्ट रहेको बताएका छन् ।