Home / अन्तर्राष्ट्रिय खबर

अन्तर्राष्ट्रिय खबर

मेक्सिकोमा भएको गोली हानाहानमा १६ जनाको मृत्यु

 

मेक्सिको सिटी — मेक्सिकोमा दुई पक्ष बीच भएको गोली हानाहानको घटनामा परी कम्तीमा १६ जना व्यक्तिको मृत्यु भएको छ ।

प्रहरी र अपराधिक समुहकाबीच भएको भिडन्तमा परी मारिनेमा दश जना अपराधिक समुहका र ६ जना प्रहरी अधिकारीहरु रहेका जनाइएको छ ।
मेस्किकोको गुइरेरो राज्य अन्तर्गत पर्ने तटिय क्षेत्र झिहाउतानेगोमा भएको भिडन्तमा उनीहरु मारिएका अधिकारीहरुले बुधबार जानकारी दिएका छन् ।
गुइरेरोका सुरक्षा प्रवक्ता रोबर्ट अल्भारेज हेरेडियाले सो घटनामा मानवीय क्षति नै मंगलबार दिउसो पुष्टि गरेको बताएका छन् ।
ड्युटीमा खटिएका प्रहरीलाई अपराधिक समुहको तर्फबाट पहिला आक्रमण भएको र पछि प्रहरीले जवाफी कारबाही गरेको सुरक्षा प्रवक्ताको भनाई छ । दुई पक्षकाबीचमा झण्डै ३० मिनेट भिडन्त भएको थियो ।
राज्यका महान्यायाधिवक्ताले घटनाका बारेमा अनुसन्धान गरी यस्ता घटना दोहोरिन नदिनका लागि आवश्यक व्यवस्था गर्न निर्देशन दिएका छन् ।
गुइरेरो पछिल्लो दुई वर्षमा अत्याधिक धेरै हिंसा हुने मेक्सिकोको राज्य हो । यस अवधिमा यस राज्यमा मात्रै २२ सय भन्दा बढीको मृत्यु भइसकेको छ ।

रुसी सेनाको विमान सिरियामा दुर्घटना, ३९ जनाको मृत्यु

२३ फागुन, काठमाडौं । रुसी सेनाको कार्गो विमान मंगलबार सिरियामा दुर्घटना हुँदा ३९ जनाको ज्यान गएको छ ।

रुसको सुरक्षा मन्त्रालयलाई उद्धृत गर्दै रुसका सञ्चार माध्यमहरुले रसियन एएन–२६ मिलिटरी ट्रान्सपोर्ट प्लेन सिरियाकाे लताकिया राज्यस्थित हेमिम एयरबेसमा अवतरणका क्रममा दुर्घटना भएको जनाएका छन् ।

 

न्यूयोर्क टाइम्सका अनुसार मृत्यु हुनेमध्ये ३३ जना रसियन आर्मी र ६ जना चालक दलका सदस्य हुन् ।

विमान दुर्घटनाको कारण खुलेको छैन । आतंकवादी आक्रमण या प्राविधिक गडबडीमध्ये कुनै एक कारणले  विमान दुर्घटना भएको अनुमान गरिएको छ ।

सिरियामा हवाई हमला, बालबाबालिकासहित ७७ को मृत्यु


८ फागुन, काठमाडौं । सिरियाको राजधानी दमास्कसनजिक सरकारी सेनाले गरेको हवाइ आक्रमणमा ७७ जनाको मृत्यु भएको छ । अरु ३ सय जना घाइते भएका छन् ।

सरकारी सेनाले विद्रोहीलाई मारेको दावी गरे पनि मृत्यु हुनेमा २० जना बालबालिका र धेरै सर्वसाधारण छन् ।

राजधानी दमासकस नजिक गुटा भन्ने स्थानमा हवाइ र रकेट आक्रमण गरिएको हो । सरकारी सेनाले विद्रोहीलाई लक्षित गरी आक्रमण गरेको दावी गरेको छ । तर मृत्यु हुनेमा धेरैजसो सर्वसाधारण रहेको सिरियन अब्जरभेटरी ह्युमन राइट्सले जनाएको छ ।

चार लाखभन्दा बढी व्यक्तिहरुको बसोबास रहेको गुटालाई सन् २०१३ देखि विद्रोहीहरुले नियन्त्रणमा लिएका छन् । यसलाई विद्रोहीबाट मुक्त पार्ने प्रयासमा सरकार लागेको छ । सोमबार हवाइ आक्रमण गरेको सिरियाली सेनाले स्थल आक्रमण पनि गर्ने तयारी गरेको छ ।

चीनद्वारा अमेरिकालाई चेतावनी–युद्धको मानसिकता त्याग

बेइजिङ — चीनले अमेरिकालाई ‘शीतयुद्धकालीन मानसिकता’ त्याग्न चेतावनी दिएको छ । अमेरिकाले आफ्नो परमाणु हतियार कार्यक्रम ‘साना बम’ मार्फत विकसित गर्ने जनाएपछि आइतबार चीनले चेतावनी दिएको हो । चिनियाँ रक्षा मन्त्रालयले ‘विश्वकै ठूलो परमाणु हतियार सम्पन्न मुलुकले’ युद्धको मानसिकता छाड्ने पहल गर्नुको साटो विरुद्धमा लागेको भन्दै आलोचना गरेको छ ।

 

अमेरिकाले आफूसँग भएका हतियारहरू प्रयोग गर्न निकै ठूला भएको भन्दै नयाँ स–साना परमाणु हतियार विकास गर्ने योजना सार्वजनिक गरेको हो । रूसले भने अमेरिकी योजनाको यसअघि नै विरोध गरिसकेको छ ।
अमेरिकाले चीन, रूस, उत्तर कोरिया र इरान आफ्नो सुरक्षा खतराका रूपमा रहेको औंल्याउँदै साना हतियारको आवश्यकता भएको जनाउँदै आएको छ । चीनले आइतबार अमेरिकी योजनाको दृढतापूर्वक विरोध जनाएको हो । चिनियाँ रक्षा मन्त्रालयले आफ्नो रक्षात्मक नीतिको वासिङ्टनले फाइदा उठाएको जनाएको छ । मन्त्रालयद्वारा जारी विज्ञप्तिमा उल्लेख छ, ‘हामीलाई आशा छ अमेरिकाले आफ्नो शीतयुद्धकालीन मानसिकता त्याग्नेछ र निशस्त्रीकरण प्रतिको आफ्नो उत्तरदायित्व महसुस गर्नेछ ।’ चीनले यसअघि पनिपटकपटक अमेरिकाको रक्षा रणनीतिको विरोधका लागि ‘शीतयुद्ध’ को सन्दर्भ उल्लेख गर्ने गर्छ ।
अमेरिकी रक्षा मन्त्रालय पेन्टागनले शुक्रबार सार्वजनिक गरेको योजनामा जमिन, पन्डुब्बी तथा विमानबाट प्रहार गर्न सकिने ब्यालेस्टिक क्षेप्यास्त्रको आधुनिकीकरणमा जोड दिइएको छ । उक्त योजना पूर्व अमेरिकी राष्ट्रपति बाराक ओबामाको कार्यकालमा सुरु गरिएको थियो । यसअघि रूसी विदेश मन्त्रलायले अमेरिकी योजनाप्रति ‘पूर्णरूपमा निराश’ भएको बताएको थियो । विदेशमन्त्री सर्गेइ ल्याभ्रोभले राष्ट्रको सुरक्षाका लागि ‘आवश्यक उपायहरू अवलम्बन’ गर्ने बताएका थिए ।

ओलम्पिकपछि पनि वार्तालाई निरन्तरता दिनुपर्छः राष्ट्रपति इन

सोल — दक्षिण कोरियाली राष्ट्रपति मुन जाय इनले आगामी ओलम्पिक खेलकूदपछि पनि दुई कोरियाबीचको वार्तालाई जारी राख्नुपर्नेमा जोड दिएका छन् ।

 

सोमबार आफ्नो सचिवालयका अधिकारीहरुलाई गर्नुभएको सम्बोधनमा उनले सो धारणा राखेका हुन् । उनले भने, ‘उक्त खेलकूदपछि पनि वार्ताको वातावरण बनाउनुपर्छ ।’
उनले आफू वार्ताप्रति आशावादी भएको र आगामी दिनमा पनि वार्तालाई निरन्तरता दिनलाई गृहकार्यमा लागिपरेको बताए ।
आगामी फेब्रुअरी ९ देखि २७ सम्म दक्षिण कोरियामा आयोजना गरिएको शीतकालीन ओलम्पिक खेलमा उत्तर कोरियाले सहभागिता जनाउने भएको समाचार यसअघि नै आएको थियो ।
सो खेलकूदका कारण दुई कोरियाबीच गएको महिना दिनयता तीन पटकसम्म उच्चस्तरीय वार्ता भएको छ भने चार वर्षयता पहिलो पटक उत्तर कोरियाली अधिकारीहरुले दक्षिणको भ्रमण गरेका छन् ।
उत्तर कोरियाले आफ्ना खेलाडीको टोली र अन्य खेलकूद अधिकारी पठाउने जानकारी यसअघि नै दिइसकेको छ । यसले गर्दा यी दुई देशबीचको सम्बन्धमा पछिल्लो समयमा सुधार आएको देखिएको छ ।
उक्त खेलकूदमा २२ जना एथलेट्स र अरु खेलकूद अधिकारी उत्तरले दक्षिण पठाउन लागेको छ । ती खेलाडीको नामावली र उनीहरुले खेल्ने खेलका बारेमा ओलम्पिक कमिटीले अनुमोदन गरिसकेको बताइएको छ ।
उक्त खेलकूदलाई विगत लामो समयदेखि शत्रुतापूर्ण सम्बन्ध रहिआएका यी दुई देशको सम्बन्ध सुधारका लागि वातावरण थप सौहार्द बनाउने एक माध्यमका रुपमा विकास गर्न विश्व समुदायले नै आग्रह गरिरहेको छ ।

पाँचतारे होटल बन्दुकधारीको कब्जाबाट मुक्त एजेन्सी

काबुल — अफगानिस्तानको राजधानी काबुलमा रहेको पाँचतारे होटल इन्टरकन्टिनेन्टलमा ३ बन्दुकधारीहरुले आक्रमण गर्दा कम्तीमा छ जनाको ज्यान गएको छ ।

 

त्यहाँको विशेष तालिम प्राप्त सुरक्षाकर्मीले १२ घण्टा पछि होटललाई पुन: आफ्नो नियन्त्रणमा लिन सफल भएका छन् । अफगान गृहमन्त्रालयले सुरक्षा कारवाहीमा तीनैजना बन्दुकधारी मारिएको बताएको छ ।
गृह मन्त्रालयले दिएको जानकारी अनुसार शनिबार राति गरिएको सो आक्रमणमा परी छ जना घाइते भएका छन् भने १६० जनालाई भने उद्धर गरिएको छ ।
इन्टरकन्टिनेन्टल होटलमा विस्फोटक पदार्थ जडित ज्याकेट लगाएका तीन बन्दुकधारीले आक्रमण गरेका थिए । शनिबार राति होटलमा आक्रमण हुँदा त्यहाँ विदेशी पर्यटकका साथी उच्चपदस्थ सरकारी कर्मचारी पनि रहेको बताइएको छ ।
होटलमा हमला भएपछि प्रहरीले उक्त होटलमा घेरा हालि संदिग्धको खोजी गरेको थियो ।

टर्कीमा बस दुर्घटना, ११ को मृत्यु ४६ घाइते

इस्तानबुल — टर्कीमा भएको एउटा बस दुर्घटनामा ११ को मृत्यु भएको छ । उक्त घटनामा अन्य ४६ जना घाइते भएका छन् । घाइतेमध्ये केहीको अवस्था चिन्ताजनक जनक भएकोले मृतकको सङ्ख्या बढ्न सक्ने पनि अनुमान गरिएको छ ।

 

यात्रामा गइरहेको बस एक रुखसँग ठोक्किएर दुर्घटनामा परेको स्थानीय अधिकारीले जानकारी दिएका छन् ।
राजधानी अङ्कराबाट पश्चिमतर्फ पर्ने सहर बुर्सातर्फ गइरहेको रात्रि बस दुर्घटना भएको जनाइएको छ ।

कमाण्डरसहित छ तालिबानको मृत्यु

जलालाबाद — पूर्वी अफगान प्रान्त नान्गाहारमा तालिबान आतङ्ककारी समूह लुकेर बसेको स्थानलाई लक्ष्यगरी गरिएको हवाई कारबाहीमा एकजना कमाण्डरसहित छ जना तालिबान आतङ्ककारी मारिएका छन् । नान्गाहारको प्रान्तीय सरकारले बुधबार प्रेस विज्ञप्ति निकालेर जानकारी दिएको हो ।

 

अफगान गुप्तचर निकायले दिएको सूचनाको आधारमा खोगीआनी जिल्लामा मङ्गलबार साँझ तालिबान आतङ्ककारी लुकेर बसेको स्थानमा लक्ष्य गरेर हवाई कारबाही गरिएको विज्ञप्तिमा जनाइएको छ । कारबाहीको क्रममा एकजना कुख्यात तालिबान कमाण्डर मोहिदुल्लाह आलिज यासेरसहित छ आतङ्ककारीको घटनास्थालमा नै मृत्यु भएको पनि विज्ञप्तिमा जानकारी दिइएको छ ।
कारबाहीको विषयमा हालसम्म तालिबान आतङ्ककारी समूहको तर्फबाट भने कुनै टिप्पणी आएको छैन ।

ट्यांकर डुब्दा ३२ को ज्यान गयो

बेइजिङ — चीनको पूर्वी सामुद्रिक क्षेत्रमा एक सातादेखि जलिरहेको इरानी तेल ट्यांकर आइतबार डुबेपछि चालक दलका ३२ सदस्यको मृत्यु भएको इरानी अधिकारीले जनाएका छन् । चालक दलमा ३० इरानीसहित २ बंगलादेशी नागरिक थिए ।

 

चिनियाँ सेन्ट्रल टेलिभिजनका अनुसार उक्त ट्यांकर आइतबार भएको ठूलो विस्फोटलगत्तै डुबेको हो । टेलिभिजनका अनुसार ट्यांकर डुब्नुअघि भएको विस्फोटका कारण करिब १ किलोमिटर माथिसम्म आगो फैलिएको थियो । सान्ची नामक उक्त पानीजहाज चीनको सांघाईबाट २ सय ६० किलोमिटर टाढा एक कार्गो जहाजसँग ठोकिएको थियो । ट्यांकरले १ लाख ३६ हजार टन कच्चा तेल बोकेको थियो । १३ सामुद्रिक डुंगाको सहायताले इरानी कमान्डोले १० दिनदेखि आगलागी नियन्त्रणका लागि जारी राखेको प्रयास खराब मौसमका कारण असफल भएको हो । इरानी समूहका प्रवक्ता मोहम्मद रस्तादले भने, ‘अब कसैलाई जीवितै फेला पार्ने आशा सकिएको छ ।’
यसअघि शनिबार उद्धारकर्ताहरूले दुई जनाको शव भेटेका थिए । तर विषालु धूवाँ तथा उच्च तापक्रमका कारण उनीहरूले हतारमा पानीजहाजको ‘ब्याल्क बक्स’ लिएर फर्किएको जनाए ।
सान्ची पनामाले इरानसँग भाडामा लिएर चलाएको थियो । उक्त ट्यांकर इरानबाट दक्षिण कोरियातर्फ जाने क्रममा जनवरी ६ मा हङकङको सीएफ क्रिस्टलसँग ठोक्किएको थियो । क्रिस्टलका चालक दलका २१ सदस्यको भने सकुशल उद्धार गरिएको थियो ।
दुई जहाज ठोकिएलगत्तै सान्ची दक्षिण–पूर्वी क्षेत्रमा पर्ने जापानी टापु अमामी ओसिमातर्फ २ किलोमिटरभन्दा बढी बगेको थियो । उक्त ट्यांकरले जेटमा प्रयोग हुने तेल, पेट्रोल, डिजेल उत्पादन गर्न मिल्ने कच्चा तेल बोकेको थियो । दुर्घटनाको कारणहालसम्म थाहा हुन सकेको छैन । अधिकारीले घटनाबारेछानबिन भइरहेको जनाएका छन् ।

अमेरिकालाई इरानको चेतावनी १४ अधिकारीविरुद्ध प्रतिबन्धपछिको आक्रोश

तेहरान — इरानले अमेरिकाले आफ्नो न्यायपालिका प्रमुखमाथि प्रतिबन्ध लगाएर ‘लक्ष्मणरेखा पार गरेको’ आरोप लगाएको छ । अमेरिकाले शनिबार अयातुल्लाहा सदिक अमोलि–लारिजानीमाथि नयाँ प्रतिबन्ध लगाएको हो ।

इरानी विदेशमन्त्री मोहम्मद जवाद जरिफ

इरानी विदेश मन्त्रालयले उक्त कदमको कडा प्रतिकार गर्ने जनाएको छ । तर उक्त कदम के हुने भन्नेबारे भने मन्त्रलायले प्रस्ट पारेको छैन ।
अमेरिकी राष्ट्रपति डोनाल्ड ट्रम्पले इरानसँग सन् २०१५ मा भएको परमाणु सम्झौता अन्तिम एक पटकका प्रतिबन्ध लागू नगर्ने बताएका थिए । तर उनले १४ इरानीमाथि अधिकारको गलत प्रयोग गरेको भन्दै प्रतिबन्धको घोषणा गरेका हुन् ।
‘ट्रम्पको शत्रुतापूर्ण कदमले लक्ष्मणरेखा पार गरेको छ । यो अन्तर्राष्ट्रिय कानुनको पनि गम्भीर उल्लंघन हो ।’ विदेश मन्त्रलायले विज्ञप्तिमार्फत भनेको छ, ‘यसको इस्लामिक गणतन्त्रले पक्कै पनि गम्भीर प्रतिक्रियात्मक जवाफ दिनेछ ।’
मन्त्रलायका अनुसार ट्रम्पले ‘इरानी जनातामाथि निरन्तर रूपमा असफल शत्रुतापूर्ण व्यवहार गर्दै आएका’ छन् । यसअघि, इरानी विदेशमन्त्री मोहम्मद जवाद जरिफले वासिङ्टनले सम्झौताको पालना गरे मात्र इरानमाथि पनि सम्झौता पालना गर्न बाध्यात्मक स्थिति पैदा हुने चेतावनी दिएका थिए । ट्रम्पले युरोप र अमेरिकालाई ‘अन्तिम मौका’ दिने बताएका हुन् । २०१५ मा इरान र ६ शक्तिराष्ट्रबीच परमाणु सम्झौता भएको थियो । ट्रम्प प्रशासनले युरोपेली देशसँग उक्त सम्झौताविपरीत स्थायी प्रतिबन्धका लागि अनुरोध गर्दै आएको छ । उक्त सम्झौता सन् २०२५ मा सकिँदै छ ।
यसअघि शुक्रबार युरोपेली संघ (ईयू) ले अमेरिकालाई इरानी परमाणु सम्झौता नतोड्न आग्रह गरेको थियो । ईयूले उक्त सम्झौता क्षेत्रीय सुरक्षाका लागि निकै महत्त्वपूर्ण भएको उल्लेख गरेको थियो । बेलायत, फ्रान्स, जर्मनीलगायत युरोपेली संघका सदस्य राष्ट्रले इरानसँगको परमाणु सम्झौताप्रति समर्थन दोहोर्‍याउँदै आएका छन् । युरोपेली संघकी विदेश नीति प्रमुख फेडेरिका मोगेरिनीले शुक्रबार उक्त सम्झौता सकारात्मक
नतिजा ल्याइरहेको दाबी गरेकी थिइन् । उक्त सम्झौताअनुुसार आफ्नो परमाणु कार्यक्रमलाई सीमित तुल्याउने प्रतिबद्धता जनाएपछि इरानमाथिका प्रतिबन्ध हटाइएका थिए ।
ट्रम्पले भने उक्त सम्झौताको विरोध गर्दै आएका छन् । उनले ‘इतिहासकै खराब’ सम्झौता गरेको भन्दै पूर्वअमेरिकी राष्ट्रपति बाराक ओबामाको कडा आलोचना गर्ने गरेका छन् । बेलायती विदेशमन्त्री बोरिस जोन्सनले इरानलाई परमाणु अस्त्र हासिल गर्नबाट रोक्न उक्त सम्झौताभन्दा राम्रो अन्य नभएको तर्क गरेका छन् । उलने इरानलाई अन्तरमहादेशीय ब्यालेस्टिक क्षेप्यास्त्र कार्यक्रमसँग सम्बन्धित मुद्दामा जवाफदेही बनाउनुपर्नेमा जोड दिए ।