अब भानु माविको आफ्नै बस, वडाध्यक्षद्वय घिमिरेले गरे उद्घाटन

0
645
  • Save

मकवानपुरगढी- मकवानपुरगढी ३ मक्रान्चुलीमा रहेको भानु माविले आज (२७ गते मंगलबार) देखि आफ्नै पहेंलो बस संचालन गरेको छ ।

मकवानपुरगढी गाउँपालिका वडा नम्बर ३ र ५ का वडा अध्यक्षहरु भागवत घिमिरे र जित बहादुर घिमिरेले आज भानु माविको प्राङ्गणमा आज संयुक्तरूपमा बस संचालनको उद्घाटन गरेका छन् । ३ नं का वडाध्यक्ष भागवत घिमिरेले आफैले बस चलाएर बस संचालनको सुरुवाती गरेका हुन् ।

  • Save

कार्यक्रममा बोल्दै कार्यक्रमका प्रमुख अतिथि वडा ३ नं का वडाध्यक्ष तथा गाउँपालिकाका प्रबक्ता भागवत घिमिरेले गाउँपालिकाले भानु माविलाई नमुना विद्यालयका रूपमा संचालन गर्न चाहे अनुसार बागमती प्रदेश सरकारले पनि विद्यालयलाई प्रदेशको नमुना विद्यालयका रुपमा विकास गर्न आवश्यक भौतिक संरचना निर्माण लगायतमा सहयोग गरिरहेको बताए । बस संचालन पश्चात् साना विद्यार्थीहरुलाई विद्यालय आवतजावत गर्न धेरै नै सजिलो र सहज हुने उनले धारणा व्यक्त गरे ।

  • Save

५ नं का वडाध्यक्ष तथा गाउँपालिकाका सामाजिक विकास संयोजक जित बहादुर घिमिरेले विद्यालयलाई नमुना विद्यालयका रूपमा विकास गर्न आफु लगायत गाउँपालिकाबाट सक्दो सहयोग गर्न आफ्नो भुमिका रहिरहने धारणा व्यक्त गरे ।

विद्यालयले बोलपत्र मार्फत आईचर कम्पनीको बस रु. पच्चीस लाखमा खरिद गरेको र त्यसका लागि गाउँपालिकाले दश लाख र बाँकी पन्ध्रलाख रकम विद्यालयको आन्तरिक श्रोतबाट खर्च गरि बस खरिद गरिएको विद्यालय ब्यवस्थापन समितिका अध्यक्ष मान कुमारी पाख्रीनले बताइन् ।

  • Save

विद्यालयले यसै शैक्षिकसत्र देखि नै भाडामा बस लिई बन्दडाँडा , मोरङ्गे र देविडाँडा क्षेत्रबाट कक्षा ७ सम्मका विद्यार्थीहरुका लागी बस सेवा संचालन गरेको थियो । फलस्वरूप त्यस क्षेत्रबाट विद्यालयमा करिब एकसय जना विद्यार्थी थपिएको विद्यालयका सहायक प्रधानाध्यापक शिवराम फुयालले बताए । विद्यालयबाट भौगोलिक हिसाबले अलि टाढा रहेका साना विद्यार्थीहरुलाई बस सेवाले राहत पुर्याएको उनले बताए ।

हाल १५० जना विद्यार्थीले बस संचालनबाट सेवा लिइरहेका छन् । विद्यालयमा कक्षा ७ सम्म अध्ययन गर्ने विद्यार्थीको संख्या ३५० रहेको र विद्यालयमा कुल विद्यार्थी संख्या ५१५ रहेको जनाइएको छ ।

  • Save

कार्यक्रममा जनप्रतिनिधि, ब्यवस्थापन समिति , शिक्षक , विद्यार्थी , पत्रकार लगायत अभिभावकहरुको उपस्थिति रहेको थियो ।