निर्माणाधीन योजनाहरुको पालिका अध्यक्ष हुमागाईद्वारा अनुगमन

गाउँपालिका अध्यक्ष विदुर हुमागाई र ३ नम्बरका वडाध्यक्ष भागवत घिमिरेले निर्माणाधीन योजनाहरुका अनुगमन गरेका हुन् । अनुगमनका क्रममा पालिका अध्यक्ष हुमागाईले योजनाको काम समयमै सक्न निर्देशन दिएका छन् ।

0
142

मकवानपुरगढी- मकवानपुरगढी गाउँपालिका अध्यक्ष विदुर हुमागाईले शनिबार (आज) निर्माणाधीन विभिन्न योजनाहरुको अनुगमन गर्नुभएको छ ।

मकवानपुरगढी वडा नम्बर ३ देविडाँडा र वडा नम्बर ६ बाग्दली जोडिने सामरी खोलामा बेलिबृज (पुल) निर्माण योजना अन्तर्गत भइरहेको कामको अनुगमन गरिएको छ । समपुरक योजना अन्तर्गत संघीय सरकारको १ करोड १८ लाख र बाँकी गाउँपालिकाको लगानीमा निर्माण भइरहेको बेलिबृज (पुल) को कुल लागत ३.५ करोड लाग्ने अनुमान गरिएको छ ।

पुलको पिल्लर निर्माण यहि चैत्र महिना भित्र नै सकिने गरि निर्माण कार्य भैरहेको वडा नम्बर ३ का वडाध्यक्ष भागवत घिमिरेले बताउनु भएको छ । पुलको लम्बाइ लगभग ८० मिटर रहने र २ स्पानमा निर्माण गरिने जनाइएको छ । १ स्पानमा लाग्ने पुलको तयारी सामाग्री (फलाम) १ करोड १८ लाख ६५ हजारमा खरिद भइ निर्माण स्थलमा आइसकेको छ भने बाँकी १ स्पानमा लाग्ने सामाग्री केही सडक डिभिजन कार्यालय हेटौंडाबाट ल्याइने बाँकी सामान गाउँपालिकाले खरिद गरि पुल निर्माण गरिने वडाध्यक्ष घिमिरेले बताउनु भएको छ । गाउँपालिकाले निकै महत्वका साथ हेरेको यस गौरवको योजनालाई यसै आर्थिक वर्षमा निर्माण सम्पन्न गरि संचालनमा ल्याउने गरि काम भैरहेको पालिका अध्यक्ष विदुर हुमागाईले बताउनु भएको छ । अनुगमनमा गाउँपालिका अध्यक्ष हुमागाई र ३ नम्बरका वडाध्यक्ष भागवत घिमिरेको उपस्थिति रहेको थियो ।

यसैगरी बागमती प्रदेश सरकार सँगको समपुरक योजना अन्तर्गत निर्माण भइरहेको वडा नम्बर ३ अन्तर्गतकै बरबोट-सामरी पुल मोटर बाटो निर्माण कार्यको पनि पालिका अध्यक्ष हुमागाईले आजै अनुगमन निरीक्षण गर्नुभएको छ । उक्त सडक खण्डमा ६ मिटर चौडाइ रहेको करिब ७ सय मिटर लम्बाइमा स्ल्याब ढलान कार्य भइरहेको छ । योजनाको कुल लागत १ करोड रहेको छ ।

गएका वर्ष देखि नै निर्माणाधीन अवस्थामा रहेको वडा नम्बर ३ र ५ जोड्ने पक्की पुलको पनि आज अनुगमन गरिएको छ । बागमती प्रदेश पुर्वाधार विकास चितवनद्वारा काम भइरहेको यस पुलको पनि यसै आर्थिक वर्षमा निर्माण कार्य सक्ने लक्ष्य राखिएको छ ।

बस्ती तथा खेतीयोग्य जमिन संरक्षणका लागि चुनौतीका रुपमा रहेको सामरीखोला नियन्त्रणका लागि खोला उत्खननको काम भइरहेको छ । १५ दिनको समय सिमा भित्र १ लाख २५ हजार घनमिटर उत्खन गरि डम्पिङ गर्ने योजनाका साथ काम धमाधम भइरहेको छ । दैवीप्रकोप नियन्त्रणका लागि जिल्ला समन्वय समिती मकवानपुर र प्रमुख जिल्ला अधिकारी सँगको अनुमति अनुरुप खोला उत्खनन कार्य भइरहेको हो । यस कार्यबाट वडा नम्बर २,३,५ र ६ का जनता प्रत्यक्ष लाभान्वित हुनेछन् ।

सामरी खोलाको सिरानमा शिवम सिमेन्टको ढुङ्गा खानीहरु पर्ने भएकोले खानीबाट निस्कने ओभरबटम वर्षाको समयमा खोलाले बगाई ल्याउँदा सामरीखोलाको सतह बढ्न गइ खोला आसपासका बस्ती र खेतीयोग्य जमिन संरक्षण गर्न चुनौती भइरहेको छ ।