किसानले उत्पादन गरेको दुध खेर गएकोमा दुख लागेको छ – अध्यक्ष अधिकारी

0
139
अध्यक्ष : मकवानपुर जिल्ला दुग्ध उत्पादक सहकारी संघ लि.

मकवानपुर – कोरोना भाइरसको दोस्रो भेरिएन्टको महामारी विश्वभरि फैलिई रहेको बेला नेपालमा पनि यसको संक्रमण तिब्र रुपमा फैलिदो अवस्थामा छ । जसको कारण कैयौंको ज्यान गैसकेको छ भने हजारौं जना अहिलेपनी उपचाररत रहेका छन् ।

समुदाय स्तरमा महामारी फौलिंदै गएपछी देशका अधिकांश जिल्लाहरुमा निषेधाज्ञा जारी गरिएका छन् । जसको कारण शहर-बजार करिब पुर्णरुपमा बन्द गरिएका छन् भने अत्यावश्यक बाहेकका यातायात पनि पुर्णरुपमा बन्द गरिएका छन् ।

यसरी सबै क्षेत्र बन्द हुँदा त्यसको प्रत्यक्ष असर दुध क्षेत्रमा परेको छ । हरेक दिन बिहान-बेलुका नै उत्पादन हुने दूध बजारमा बिक्री वितरण नहुँदा किसानले घरमै ब्यवस्थापन गर्नुपरेको छ । थोरै मात्रामा भएको दुधलाई ता किसानले जसोतसो ब्यवस्थापन गरेपनी धेरै दूध उत्पादन गरिरहेका किसानलाई भने धेरै नै समस्या परिरहेको छ । उत्पादन भएको दुध घरमा खाएर नसकिने कारण किसानहरु दूध पोख्न बाध्य छन् ।

अन्य जिल्लाहरुमा जस्तै यो समस्या मकवानपुरका किसानहरुलाई पनि पर्न थालेको छ । यहाँ किसानहरूले उत्पादन गरेको दुध सहकारी संस्थाहरुबाट संकलन गरि मकवानपुर जिल्ला सहकारी संघको सहजीकरणमा मकवानपुरका उद्योगहरु लगायत पोखरा काठमाडौंका उद्योगहरुमा बिक्री वितरण गर्ने गरिएको छ ।

निषेधाज्ञाको कडाइ सँगै उद्योगबाट बजारमा बिक्री वितरण गरिने गरेको दूध बिक्री नहुँदा मकवानपुरबाट दुध लगिरहेका उद्योगहरुले दूध लान कटौती गरेका छन् । यता मकवानपुरमा रहेका हेटौंडा दुग्ध वितरण आयोजना (सरकारी संस्थान) , निजि क्षेत्रको हेटौंडा डेरी लगायत साना उद्योगहरुले दूध लान भारी कटौती गरेको तथा बन्दका कारण स्थानीय बजारमा दूध बिक्री न्यून रहेका कारण सहकारीहरुले दुध संकलन बन्द गर्नु परेको छ ।

बन्दका कारण किसानले निकै मिहिनेतका साथ उत्पादन गरिरहेको दूध खेर गइरहेकोमा मकवानपुर जिल्ला दुग्ध उत्पादक सहकारी संघका अध्यक्ष बासुदेव अधिकारीले दु:ख व्यक्त गर्नुभएको छ । यो विषम परिस्थिति कसैको नियन्त्रणमा नरहेको भन्दै महामारीबाट बच्न सावधानीका उपायहरु अपनाउन सम्पुर्ण किसानहरूलाई अनुरोध गर्नुभएको छ । किसानले उत्पादन गरेको दूध खेर जान नदिन राज्यले विषेश पहल गर्नुपर्ने अधिकारीले बताउनुभएको छ ।

मकवानपुरमा सहकारी संस्थाहरु मार्फत दैनिक करिब ५० हजार लिटर दूध संकलन भइरहेको र संकलन भएको दुधको बिक्री ब्यवस्थापन जिल्ला संघ मार्फत भइरहेको मकवानपुर जिल्ला दुग्ध उत्पादक सहकारी संघका ब्यवस्थापक कुमारमणी दाहालले बताउनुभयो । बन्द तथा निषेधाज्ञाको कारण दूध बिक्रीमा भारी कटौती भएकोले संस्थाहरुमा आलोपालोमा दुध संकलन गरिएको दाहालले बताउनुभयो ।

उता बन्दका कारण दुग्ध किसानलाई ठूलो समस्या तथा नोक्सानी भएको भन्दै किसानलाई राहत उपलब्ध गराउन नेपाल सरकार समक्ष केन्द्रिय दुग्ध सहकारी संघले माग गरेको छ ।