राष्ट्रिय युवा परिषदले बनायो कोरोना महामारी सूचना तथा सहजीकरण केन्द्र, जिल्ला स्तरमा युवा समितिले सहजीकरण गर्ने

कार्यकारी उपाध्यक्ष माधव ढुंगेलको संयोजकत्वमा १७ सदस्यीय केन्द्र स्थापना

0
100

काठमाडौं / नेपाल सरकार युवा तथा खेलकुद मन्त्रालय अन्तर्गत रहेको राष्ट्रिय युवा परिषद्ले कोरोना रोकथाम, नियन्त्रण र उपचार तथा अत्यावश्यक सामग्रीको उपलब्धताबारे समन्वय एवं सहजीकरण गर्न कोरोना महामारी सूचना तथा सहजीकरण केन्द्र स्थापना गरेको छ ।

परिषदले कार्यकारी उपाध्यक्ष माधव ढुंगेलको संयोजकत्वमा १७ सदस्यीय कोरोना महामारी सूचना तथा सहजीकरण केन्द्र स्थापना गरेको हो ।

परिषद्ले आइतबार भर्चुअल रुपमा पत्रकार सम्मेलन गर्दै प्रदेश, जिल्ला तथा स्थानिय तहमा समेत संयन्त्र निर्माण गरेर कोरोना महामारीविरुद्ध स्वयंसेवकीय भूमिका निर्वाह गर्न केन्द्र स्थापनव गरेको जानकारी दिएको हो ।
कार्यकारी उपाध्यक्ष ढुंगेलले राज्यले महामारी नियन्त्रणका लागि गरिरहेको प्रयासमा जोखिम मोलेरै महामारीविरुद्ध मैदानमा होमिएको जानकारी दिनुभयो ।
उहाले  बिरामीलाई अस्पताल, औषधि, सावधानीका सम्बन्धमा तत्काल प्रतिक्रिया दिन  चिकित्सकहरूको टोली पनि परिचालन गरेको जानकारी दिनुभयो ।

केन्द्रमा विभिन्न मन्त्रालयका प्रतिनिधि, नेफ्स्कुन, गैसस महासंघ लगायत संघ संस्थाहरु लगायत  विभिन्न सरकारी तथा गैरसरकारी संघसंस्थाका प्रतिनिधि सदस्य रहेका छन् ।
त्यस्तै जिल्ला स्तरमामा ७७ वटै  जिल्ला युवा समितिको अध्यक्षहरुको संयोजकत्वमा नेफ्स्कुन, गैसस महासंघ लगायत जिल्ला स्तरिय सरकारी तथा गैरसरकारी संघसंस्थाका प्रतिनिधि सदस्य रहेको केन्द्र स्थापना गरिएको छ ।

कोरोना महामारी सुचना तथा सहजीकरण केन्द्रले गर्ने काम
–प्रकोपको रोकथाम र उपचारमा संघ, प्रदेश र स्थानीय सरकारलाई सहजीकरण गर्ने ।
– राष्ट्रिय युवा परिषदमा प्राप्त हुन आएका सूचनाका आधारमा नागरिकको जीवनरक्षाका लागि तत्काल भरमग्दुर पहल गर्ने ।
– अस्पताल तथा अन्य उपचार केन्द्रहरूलाई मेडिकल सामग्री उपलब्ध गराउन प्रयत्न गर्ने ।
– राष्ट्रिय युवा परिषदमा सूचना तथा सञ्चार केन्द्रको सञ्चालन गर्ने ।
– कोभिडको असरले जनजीवनमा पारेको प्रभावलाई न्यूनीकरण गर्न मनोपरामर्श र चिकित्सकीय सेवा उपलब्ध गराउने ।
– प्रकोप रोकथामका लागि सचेतना सामग्री संकलन, उत्पादन, वितरण तथा प्रसारण गर्ने ।
– प्रकोपले पारेको प्रभावको यथार्थ अवस्थाबारे जानकारीका साथ सम्बोधन गर्न फिल्ड अध्ययन गर्ने ।
– औषधि तथा दैनिक अत्यावश्यकीय सामग्रीको खरिद तथा वितरणमा कालोबजारी वा भ्रष्टचार भएको पाइएमा सप्रमाण सरकारी नियामक निकायमा जानकारी गराउने ।
– प्रकोपको रोकथाम र उपचारसँग जोडिएर विकसित घटनाक्रमका आधारमा सम्बोधन गर्न सामुदायिक, निजी र गैरसरकारी क्षेत्रसँग समन्वय तथा सहकार्य गर्ने ।