बाढीपहिरो प्रभावितलाई एकद्वार नीतिबाट राहत बाँड्न गृह मन्त्रालयको निर्देशन

0
3

मकवानपुर । सरकारले बाढीपहिरो, डुबानलगायत प्राकृतिक प्रकोप पीडित तथा अन्य प्रभावित परिवारलाई एकद्वार प्रणालीबाट राहत वितरण गर्न निर्देशन दिएको छ ।

गृह मन्त्रालयले जिल्ला प्रशासन कार्यालयहरूलाई लिखित तथा मौखिक निर्देशन दिँदै राहत सामग्री स्थानीय तहमार्फत मात्रै वितरण गर्न आग्रह गरेको हो । पीडितलाई सहज र सरल रूपमा राहत सामग्री पु¥याउन स्थानीय तहमार्फत बन्दोबस्तीका सामान वितरणको व्यवस्था मिलाउन निर्देशन दिइएको राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अनिल पोखरेलले जानकारी दिनुभयो । गृहमन्त्री खगराज अधिकारीको अध्यक्षतामा गत बुधबार बसेको विपद् जोखिम न्यूनीकरण तथा व्यवस्थापन कार्यकारी समिति बैठकले पनि राहत एकद्वार नीतिबाटै वितरण गर्न निर्देशन दिने निर्णय गरेको थियो । समितिको निर्णय आज सबै जिल्ला प्रशासन कार्यालयलाई पठाइएको प्राधिकरणले जनाएको छ ।

घरबार गुमाएका र जोखिमका कारण बसिरहेको ठाउँबाट विस्थापित भएका परिवारलाई ५ जना सदस्यसम्म भए १५ हजार र त्यसभन्दा बढी भए २० हजार रुपैयाँ तत्काल उपलब्ध गराउन गृहले निर्देशन दिएको छ । जेठ ३० गतेदेखि परेको अविरल वर्षाका कारण सिन्धुपाल्चोक, मनाङ, कास्की, प्यूठान, जाजरकोटलगायत १९ जिल्ला प्रभावित भएका छन् ।

गृह मन्त्रालयका अनुसार सिन्धुपाल्चोकमा ३ सहित ११ जनाको मृत्यु भइसकेको छ । २५ जना अझै बेपत्ता छन् । नेपाली सेना, सशस्त्र प्रहरी, नेपाल प्रहरी र स्थानीयको सहयोगमा बेपत्ताको खोजीकार्य जारी छ । प्राधिकरणका प्रमुख कार्यकारी पोखरेलले बाढीपहिरो र डुबानलगायतका मनसुनजन्य प्रकोपबाट बासस्थान भत्किए हिमाली भेगमा ५ लाख, पहाडी जिल्लामा ४ लाख र तराईका पीडितलाई ३ लाख रुपैयाँ किस्तामा अनुदान दिइने जानकारी दिनुभयो ।